2 Tesalonaika 3

1Ru wadan, ŋai teig taog, maŋ niŋema wo agudani wa. Ago dop Anut maŋ ibinawamap iŋsan ru imaspalup aben fidian lo yau kisaek oŋ a. Anut asumiani dop panu panu asau ak san tamolpein, luluŋad lo iŋanen ru tubun mi iŋsad leil lo ilasa wa, nek ibol aŋsem luluŋam lo ilasa na yak ago mi a. 2Agod taida mi, aŋ agudani dop tamol saiadi, agod tamol a iŋsad kagin naok senamo geig ak dida, iŋsad tuod lo maŋ patuma ipasi wa. Man dugo, tamol fidian iŋ ilo rumok amad tia ya. 3Aloŋ ak, Tubun en iŋ awa yabek tamol mi a. Amaiak niŋen o iŋ aŋ isatuanaŋ a. Agod iŋsen mi dumui igo, Satan muruan ipanaŋ o igane dop, naon dal ifutani wa. 4Agod Tubun en aŋ niŋemi wo mel e rumok en maŋ ikubiai panama ya. Ru kagin dugo gubak mi mupanaŋ an aŋ agane da, agod murna dop nek ago mi agane yau a. 5Ŋai Anut ŋugudani dop Tubun en aŋ dal ikubiai panaŋ a, an lo Anut san ilo panek ka bubem lo yen a, agod nek Kristus itur sakar na yak igo, aŋ dam ka ago agane wa. 6Maŋ teim taom, Tubun ak Jesus Kristus yaŋan lo maŋ ru kagin en mupanaŋ da. Teid taod Kris adi ensauta a urat digane wo dumoi go, iŋsad madok an san piteŋanek maŋ awama lo aŋane yan ta diri dupani na dan, aŋ siŋired na ta au na wa. Tamol naok ago yak dam dadi ta ator na wa. 7Man dugo, aŋ aŋsem maŋsama kagin naok dugo woŋ ari apani san aloŋ uyanan a. Aŋ ilom isou, saen maŋ aŋ luluŋam lo tumado se yan miyalis man tia ya. 8Maŋ aenta sad anaŋ mani se yan, pempem madad na ya. Rumok geig, maŋ nal fidian tidom ad urat migane da. Fun dugo, maŋ tamolpein aenta aŋ luluŋam lo dumado dan maŋ kagin dupanama se yan lo muruan mupidinai man mamoi a. 9Rumok geig, maŋ tamol yaŋama tubun ak mi a. Amaiak niŋen o iloma ibol tap man, maŋ ka aŋ musumianaŋ dop kagin apanama wa. Gug ago migane wan mamoi a. Man dugo, maŋ aŋsam tinanou igo woŋ mumado da, an lo aŋsem ale dop maŋsama madok en mi ari wa. 10Agod saen imug mi maŋ aŋ da tumado se yan maŋ ru e dabai en mupanaŋ a. “Tamol ta urat igane wo imoi tap, aenta sad anaŋ ta yani na wa.” 11An niŋen o maŋ durupaiama ya, tamolpein kadi urat digane wo dumoig urat ta digane na da. Kawan dutor dop tamolpein aenta sad muruan lo kabuŋad mi disoduduni da. 12Tubun ak Jesus Kristus yaŋan lo, maŋ tamolpein naok ago yan dutokubol pe urat digane wo mususuŋanai dop ru dabai mupidinai da. An lo iŋ moni diŋanep ate iŋaned anaŋ ka didad a. 13Agod aŋ fidian niŋemi wo man maŋ igo mabol da. Aŋ kagin uyan ak agane wo ilom ta isali na wa. 14Aria, talpein ta ru kubiaeŋ girek en lo migire idu yen ta iloŋ na tap, talpein an aŋ ale wo uyan dop ida ta ator na wa. Man dugo, aŋ ago agane dop man, iŋ miai ifuni wa. 15Ak man aŋsam ager tamol igo woŋ ta agane na wa. Tia, ru dabai ak arupei dop ru kagin dam apani wa. Nek ibol aŋanem teim mok lo agane dak ago mi agane wa. 16Tubun ak iŋsen maror san fun. Iŋ nal fidian ka bubem lo maror ipanaŋ ak, dal funfun lo dam mi a. Anut ka aŋ fidian da amado wa. 17Ŋai Pol ru wadan ŋaiseg banig mok nam ŋigire ya. Ŋai girek fidian ŋigire den lo ago ŋigane da. Ata wo, ŋai banig mok nam girek e ŋigire den lo, tamolpein fidian duloŋ man, girek en ŋaisag na mok ipalu ya. 18Idsad Tubun ak Jesus Kristus san ilo panek aŋ fidian da amado.

will be added

X\