1 Jon 4

1Turag muroug, aŋ ur fidian sad ru ilom lo ta rumok na wa. Tia, ur an sad ru abitinae ale gup a, kabelan ur an Anut san boi, tia, Satan san boi, aŋ an ale aloŋ uyan a. Man dugo, profet sewak wei mi aben fidian lo dufufurak go diau a. 2Ur a Jesus Kristus iŋ tamol mok oŋ tan na ipalu yak ago dubol dan, iŋ Anut san a. Dal an lo mi aŋ Anut san Ur ka ale aloŋ a. 3Ak man ur a Jesus Kristus iŋ tamol mok oŋ ta ilasa na yak ago dubol dan, iŋ Anut san tia ya. Iŋ man tamol a iŋsan yaŋak “Kristus san ager” dubol dan san ur mi a. Ur an ipalu wo ru an aloŋ se yan, gamu tan en lo imado la ya. 4O nanug muroug, aŋ Anut san muroun a, agod aŋ profet sewak adi ariŋanai a. Man dugo, Ur aŋ lo yen dan iŋsan dabai man, ur a profet sewak adi lo yen dan san dabai iriŋani a. 5Profet sewak adi iŋ tan en san muroun mi a, amaiak niŋen o ru a dubol dan, nek tan en san mi a. An lo dop tan en san tamolpein kukudod dugurep iŋ awad duloŋ da. 6Gug id man Anut san muroun a. Ago yak niŋen o talpein a Anut iloŋ an, id awad iloŋ da, ak man a iŋ Anut san muroun tia yan, id awad ta iloŋ na da. Dal an lo dop ur dugon rumok san, agod ur dugon sewak san dam ka kuai tem tile taloŋ a. 7O turag muroug, id nug niŋen o pempem tamat a, man dugo, Anut iŋsan bunun man ilo panek san fun mok a. Talpein a ilo panek aman da yan, iŋ Anut lo foun ilasa ya, agod iŋ Anut iloŋ da. 8Gug talpein a ilo panek an tia yan, iŋ Anut iloŋ man tia ya. Man dugo, Anut man iŋsen ilo panek mok a. 9Anut iŋsan ilo panek a id luluŋad lo kuai tem ikubiai panad an san dal igo ya. Iŋanen Nanun kisaek o lian amaiak tan en lo iganeg ipalu ya, an lo dop iŋsen tinin lo kumaen tumado san tiŋane wa. 10Ilo panek e ŋai niŋen o ŋabol den igo ya. Id malan malan Anut niŋen o ta tamat na ya, tia, iŋ imug id niŋed o imat a. Agod Taman san ilo wananan a idsad aupasek igane ilasa dan, Nanun iŋsen yabiani wo iganeg ipalu ya. 11Turag muroug, Anut id niŋed o ago imat tap, id dam nug niŋen o tamat a. 12Tamol ta iŋ Anut ile man tia ya. Gug id nug niŋen o tamat tap, Anut id da tumado wa, an lo dop iŋsan ilo panek id lo yan italbusip nuŋon ifu wa. 13Id igo taloŋ a, id iŋ da tumado da, agod iŋ dam id da tumado dan, rumok a. Man dugo, iŋanen Urgun titin aenta iŋaneg id ipanad a. 14Agod id malad lo Anut iŋanen Nanun idinig tan en san tamolpein patud ipasi wo ipalu yan tile ya, agod an niŋen o tamolpein aenkadi tabol duloŋ da. 15Talpein a Jesus iŋ Anut Nanun mok ibol ilasa dan, Anut iŋ da dumado da, agod iŋ dam Anut da dumado da. 16Dal an lo id Anut san ilo panek ipanad dan taloŋ a, agod id ilod lo rumok a. Anut iŋ mi ilo panek. Ago yak niŋen o talpein a ilo panek aman da yan, iŋ ilon lo Anut imado da, agod Anut ilon lo iŋ dam imado da. 17Dal an lo ilo panek id lo yen dan italbusip itaot geig a. An lo dop bitinaek san nal lo id Anut naon na tatur san niŋen o ta tarer na wa. Man dugo, tan en lo id man, nek iŋ igo mi id dam ago mi a. 18Ilo panek man tinin rurek an tia ya. Tia, ilo panek itaot geig an ilo irer ikudip patun fo ilasa da. Man dugo, ilo irer man naon panek san mel mi a, an lo dop talpein a irer dan, ilo panek san kagin lo tamol itaot mok ta ilasa na ya. 19Id aenta niŋedi wo tamat san fun man iŋ imug id niŋed o imat a. 20Talpein ta igo ibol, “Ŋai Anut niŋen o ŋamat da,” gug turan ta ile saian tap, iŋ sewak tamol. Man dugo, iŋ turan a ile yan niŋen o ta imat na tap, iŋ Anut a ta ile na dan niŋen o imat san tia geig a. 21Agod taida mi, iŋsen ru kubiaeŋ en ipanad a, ta iŋ Anut niŋen o imat dan turan dam niŋen o imat da.

will be added

X\