Titus 3

1Sĕktĕw-dd imumĕnăn a-s iwar-tăn ad-sajadăn i-imizărăn n-ăkall d-kăl-ĕlxĕkum-net, mašălnet a-wa fălla-săn ătiwărhăn, ĕjĕnet hak ašăl făl amišĕl n-a-wa olăɣăn. 2Wăr tiẓĕmnet ăwadĕm wăl' iyyăn, wăr kănnăsnet, umasnet dăgg-ălɣafyăt s-ăẓedăn ulhawăn-năsăn i-ăddinăt iket-năsăn. 3Wăr hin-tĕttĕwăm a-s ibda, năkkăneḍ-dăɣ kăla nămoos ălžuhal s-wăr t-illa a ăssimɣărăn, nănimăšrăy i-Măssinăɣ, noška, wăr t-illa erk derhan d-Iblis s-wădden ănnihăḍ dăɣ-năɣ, wăr hanăɣ-išla ar tăllăbăst jer-iman-nănăɣ d-derhan n-a ila ăwadĕm wăr nĕla. 4Măšan, ašăl wa dd-ăsnăfalăl Măssinăɣ-i n-Ămaɣlas-nănăɣ milɣaw-net d-tărha-net i-dăgg-adĕm, iɣlăs-anăɣ dăɣ-ăššarăn-win-dăɣ. 5Iɣlăs-anăɣ, wădden a-s innin ill'-e a oɣadăn nămesăl, ănn-ak, iɣlăs-anăɣ dăɣ-tĕssĕba n-tĕmɣăre n-tăhanint-net, iššĕšdăj-anăɣ s-tărna n-Unfas Šăddijăn i-ad-numas ăddinăt ăynaynen; ikf'-anăɣ tămudre tăynayăt. 6Măssinăɣ a fălla-năɣ-dd-ăzzăbben Unfas Šăddijăn s-tănoflayt dăɣ-idĕm n-Ămaɣlas-nănăɣ, Ɣisa Ălmasex. 7A-wen, ij'-e dăɣ-ănnuɣmăt-net i-ad-numas s-tărna-net ăddinăt data-s lanen idĕm, numas imĕkkusa-net wi ăsjăr ăṭṭăma n-tămudre ta tăɣlălăt-i s-nĕjăr ăṭṭăma-net. 8A-wa măjrăd ănihăjjăn, ărheeɣ daɣ ad-t-sĕnnilĕsăd hullan i-ăddinăt i-ad-săr-s ĕssanăn, ĕdgĕẓăn wi n-imumĕnăn dăɣ-iji n-imărkedăn, ĕnta-den-dăɣ a-wa ăhusken infăn dăgg-adĕm iket-năsăn s-hărăt. 9Hekăyy! Wăr tănmăntăšăd măjrăd d-ăwadĕm wăl' iyyăn ed wăr t-illa a infa a-wen. Ăyy fălla-k abăraj dăɣ-ăṭṭarexăn d-hărăt n-imĕjridăn wăren ĕẓley d-taxxalen, wăr tăsjătăd măjrăd d-amsiwi-net wărăn oher hărăt dăɣ-isălan n-alămăr wa n-ănnăbi Mosa, wăr t-illa a-s infa a-wen-dăɣ, ĕšlĕy-as, mălayăɣna ɣas. 10E-d tĕnhăyăd ere ănimăšrăyăn, itattărăn băḍḍo-băḍḍo jer-ăddinăt, ăj'-as aɣătal wa ăzzarăn, tĕjĕd-as daɣ wa s-ĕssin. Afăl unjăy s-asjĕd-hak, sĕssijĕj-t iman-năk 11ed tĕssanăd a-s ăwadĕm šund-wen, ăbas tĕha tuksĕḍa n-Măssinăɣ ulh-net, immĕntăl i-iman-net, orăw-dd săr-săn ĕlhĕllak. 12Afăl săr-k-in ăšmašălăɣ Artimas meɣ Tušik, wăr tăjj a făl wăr hi-dd-tosed, ăqqalăɣ-ak dăɣ-aɣrĕm wa n-Nikabolis ed dihen-dăɣ ad-kittĕwăɣ ad-sĕssikĕyăɣ tajrĕst. 13Ǝdhĕl Zenas wa n-ănabdid ĕnta d-Ăbbăloš, udaɣ faw ad-ĕmɣutărăn s-hărăt dăɣ-asikĕl-năsăn. 14Wăr-ănhăjja ad-ămoosăn imumĕnăn, ăddinăt s-ăqqurăn ifassăn-năsăn, ĕlmĕdnet iji n-a-wa olăɣăn i-ad-ijjĕš ărramăt tămudre-năsăn dat-Măssinăɣ. 15Ăhuulăn-kăy-in ăddinăt wi ɣur-i t-ĕllănen iket-dăɣ-năsăn, tăhuulăd-in daɣ imărhan-nănăɣ wi dăr-nohăr ăddin iket-năsăn. Issĕnsa Măssinăɣ fălla-wăn ănnuɣmăt iket-dăɣ-năwăn. Amin!

will be added

X\