Titus 2

1Dăɣ-a-wa kăy-dd-iqqălăn kăyy Titus, wăr săɣra ăddinăt ar tidĕt n-tijĕttewen n-teɣăre ta n-tidĕt tădduttet. 2Ănn i-imɣarăn, ad-ănnăhăḍăn dăɣ-iman-năsăn, nĕhĕjjĕnet d-semɣar, jarrăhăn, šăddij immun-năsăn, ărhan ăddinăt, ĕṣbarăn. 3Ănn i-timɣaren, ad-ĕjĕnăt šund a-wen-dăɣ, wăr tănăt-ităjjăšet ănnămima, wăr săsakaynet dăɣ-tesăse n-asmĕd, umasnet tinĕsdebbăren n-a-wa olăɣăn; 4sĕmmĕtărnet tiḍeḍen ti măḍroynen s-iket ădobănnăt d-tărha n-meddĕn-năsnăt d-aratăn-năsnăt, 5sĕlmĕdnet-tănăt taɣimit tĕṣtarăt dăɣ-ihănan-năsnăt, d-iba n-tikra i-meddĕn-năsnăt, d-uḍĕf n-ihănan-năsnăt s-sărho, d-milɣaw d-asrĕs n-iman dat-meddĕn-năsnăt i-udaɣ ad-ijrĕw ăwadĕm ăsaru, s-oẓăm măjrăd n-Măssinăɣ dăɣ-isălan n-adubĕn. 6Ănn šund a-wen-dăɣ i-imawaḍăn, sĕmmĕtăr-tăn d-ad-tăn-iwar sărho dăɣ-hărăt iket-net. 7Kăyy daɣ-i n-ămizăr-năsăn, umas-asăn dăɣ-a-wa tăjjăd ere hasăn-tĕha tĕttĕlal, saɣră ăddinăt tijĕttewen ti n-teɣăre ta n-tidĕt tădduttet s-ulh šăddiijăn, nĕhĕjj d-semɣar, 8tajj măjrăd oɣadăn wăr ha tamɣĕnnant i-ad-ĕkrukĕḍăn imiksănăn, iba-hasăn tašlĕlt s-hanăɣ-oẓămăn. 9Eklan, ănn'-asăn: sajadăt hărkuk i-mĕssaw-wăn, tajjăt-asăn a-wa fălla-wăn ărhăn, wăr hasăn-tăšmăšăkkem măjrăd, 10wăr dăɣ-săn tikĕrăt hărăt, ĕflĕsnet-kăwăn hărkuk i-ad-sĕmɣărăn ăddinăt a-wa innă Măssinăɣ-i n-Ămaɣlas-nănăɣ. 11Ănnuɣmăt wa iɣallăsăn, ăsnăfalăl-t-dd Măssinăɣ i-e d t-illăm ăgg-adĕm. 12Ănnuɣmăt-net en-dăɣ a hanăɣ-isălmadăn a-s, iwar-anăɣ ad-nĕbḍĕw d-iba n-ăddin d-azzal ḍarăt wălăt ăddunya, nĕṭṭĕfet dăɣ-ăddunya-ta-dăɣ, tămudre tăddiinăt, toɣadăt dăɣ-sărho. 13A-wen-dăɣ a hanăɣ-iwarăn iket-di dd-itis ălxer wa măqqărăn s-nĕjăr ăṭṭăma-net, a t-ămoosăn: uɣĕl n-Ɣisa Ălmasex-i n-Măssinăɣ wa măqqărăn ilăn ălxurmăt, ĕnta a-s Ămaɣlas-nănăɣ. 14Ǝnta-en-dăɣ a ikfăn iman-net, inɣăl ašni-net, ămmut dăɣ-idăggan-nănăɣ i-ad-hanăɣ-dd-ikkĕs dăɣ-e d t-illăm iba n-iqqud, iššĕšdăj-anăɣ, ij'-anăɣ tamĕtte-net tĕdgaẓăt hak ašăl dăɣ-iji n-imărkedăn. 15Isălan-wi-dăɣ, sĕmmĕtăr săr-săn ăddinăt, săɣĕr-asăn-tăn, tăɣtĕlăd-tăn săr-săn s-ĕmmĕk wa s-t-e-ăj ere ăzzarăn i-ăddinăt, wăr kăy-ilăkkăhet ăwadĕm.

will be added

X\