Titus 1

1A-wa năkk, Bulĕs wa n-akli n-Măssinăɣ, d-ănămmašul n-Ɣisa Ălmasex. Măssinăɣ a hi-dd-iɣrăn s-iman-net i-ad-ĕlmĕdăn wi ăsnăfrăn immun săr-s, ĕzzĕyăn tidĕt-net, ĕṭṭĕfăn tămudre tăddiinăt, 2ĕjrĕn ăṭṭăma n-tămudre ta tăɣlălăt s-ijjăš Măssinăɣ-i wărăn irĕẓẓ dăɣ-tĕnna-net ărkăwăl-net, hărwa wăr dd-tăxlek ăddunya. 3Tosă-dd tăqqăn ta issĕbdăd i-a-wen ɣas, ăšmašăl-ahi i-ad-ăxṭĕbăɣ a-wa s-ăru săr-s omăr Măssinăɣ-i n-Ămaɣlas-nănăɣ dăɣ-măjrăd-net. 4A-wen-dăɣ a săr-i dd-orăwăn, ad-hak-in-ĕktĕbăɣ kăyy Titus-i n-alyaḍ-in itbătăn dăɣ-immun wa nohăr. Ăhuulăɣ-kăy-in, ĕttarăɣ s-Măssinăɣ-i n-Abba-nănăɣ d-Ɣisa Ălmasex-i n-Ămaɣlas-nănăɣ a kăy-ikfăn ănnuɣmăt d-ălxer. 5Ăzzăman wa d-kăy-in-oyyeɣ dăɣ-ăkall wa n-Kritus, ăsmătărăɣ-kăy d-ad-hin-sĕmdĕwăd a-wa hin-ăqqiimăn dăɣ-ĕššăɣĕlăn n-ălkănisăt, sĕnnĕfrĕnăd jer-imumĕnăn dăɣ-hak aɣrĕm, inušămăn jănen ĕnniyăt i-ălkănisăt s-ĕmmĕk wa s-kăy-omărăɣ s-a-wen. 6Ǝnneɣ-ak, ănušăm, umaset ere wăr-iwer uḍlem wăl' iyyăn, ăhalĕs n-iyyăt tamăḍt, umasnet aratăn-net imumĕnăn wăren ămoos inĕbbudar. 7Ănušăm ijan ĕnniyăt i-ălkănisăt, wăr-ufa ad-t-iwar uḍlem ed ĕnta a issăɣlăf Măssinăɣ tamĕtte-net. Wăr-itumaset anăkfor, emĕkkenẓăr, emăsăw n-asmĕd, emĕkkennĕs, wăr-isădărhanet terše n-ehăre s-taxărbĕnit, 8umaset ere ih' amăjaru, isĕmmidĕwet amišĕl n-a-wa olăɣăn, umaset emăssărho, ere oɣadăn, iṭṭĕfet tămudre šăddijăt, ănnăhăḍet dăɣ-iman-net. 9Intĕmet hullan dăɣ-uḍĕf n-măjrăd n-Măssinăɣ-i wăr-ih' ăššăk s-ĕmmĕk wa s-ătwăsăɣra ašăl ăzzarăn i-ad-udabăt ĕnta-dăɣ asĕmmĕtăr n-ăddinăt dăɣ-isălan n-tijĕttewen ti n-teɣăre ta n-tidĕt tădduttet, isĕbbuggĕt inămăšrayăn. 10Inămăšrayăn ya, hekăyy! Ǝllan-t s-ĕjut jer-ălmăssexităn wi n-kăl-Ălyăhud, wăr sĕjĕdăn i-a-wa hasăn-itawănnen, ăsijătăn măjrăd wărăn infa hărăt d-tikărras n-ăddinăt. 11Sĕssuḍĕf-tăn imawăn-năsăn făl-a-s, šinmĕšrĕyăn tihusay n-timĕzzaɣ n-ihănan ĕmdanen, saɣren a wărăn il' ĕmmĕk i-ad-ăbbăɣărăn s-taxărbĕnit. 12Tĕgla tanfust dăɣ-isălan-năsăn har innă făw iyyăn dăɣ-wi jăn ănnăbităn-năsăn: "Onin kăl-Kritus-i wăren ošel ar dăɣ-bahu, iket n-iwăɣsan, wăr kĕttĕwăm ar a jăm dăɣ tisatten-năwăn uhĕn-dăɣ wăr kăla tăɣnăm." 13Ijmaḍ-t ăššăk a-s a-wa fălla-săn ătwănnăn, tidĕt. Dăɣ-tĕssĕba n-a-wen-dăɣ a făl ărheɣ fălla-k a-s i dăɣ-săn tĕnhăyăd ifraɣ, ăɣtĕl-t i-ad-itbĕt immun-net. 14Wăr lăkkămnet i-tinfusen n-kăl-Ălyăhud ti n-ibda wăla alkum i-ălɣadatăn n-ăddinăt wi ĕnkărnen tidĕt, ăssofăn bahu tidĕt. 15Ăwadĕm wa s-šăddij ulh-net, šăddij-as daɣ hărăt iket-net; măšan ăddinăt wi n-inămăšrayăn s-ămmiḍăsăn ulhawăn-năsăn, wăr t-illa a data-săn šăddiijăn ed ĕnniyăt-năsăn hakd-dăɣ ammas n-ulhawăn-năsăn, ămmiḍăs. 16Jannen s-imawăn-năsăn, ĕzzayăn Măssinăɣ a-s ija a-wen, tikĕddulăn-t s-imojjan-năsăn, ăsikărakăḍăn, imĕffellĕgăn n-imănkarăn wăr t-illa făw a olaɣăn s-ăddoben amišĕl-net.

will be added

X\