Kăl-Roma 9

1Năkk-i s-ašăl-i-dăɣ osaɣăɣ d-Ɣisa Ălmasex, tidĕt a hawăn-janneɣ wădden bahu, Unfas Šăddijăn iman-net a hi-oɣadăn dăɣ-ĕnniyăt-in dăɣ-a-wa s-ărheɣ ad-hawăn-tăn-ănnăɣ. 2Ărɣan iman-in, ărɣan; jan tisnant wărăt kĕttĕl. 3Ăsniinăn daɣ hullan dăɣ-isălan n-a-wa dd-iqqălăn ayĕtma wi n-kăl-Iṣrayil. Diha t-ĕlleɣ, kud irha făw tĕwăr-ahi tilɣant, ĕnmĕjjĕjăɣet făw d-Ălmasex i-ad-dăr-s ĕnmihĕẓăn ĕntăneḍ, ĕjrĕwăn ĕlɣĕllas. 4Kăl-Iṣrayil, Măssinăɣ a tăn-dd-ijăn s-iman-net, ăswăr-tăn ănnur-net, ănmăjjaš dăr-săn ărkăwălăn n-tassaɣt, ăzzăbbăt fălla-săn alămăr wa n-Mosa, issĕlmăd-tăn ălɣibadăt n-Măssinăɣ wa n-tidĕt, ijjăš-asăn ărkăwălăn ăjjootnen. 5Ǝntăneḍ a lănen imărawăn-nănăɣ wi n-ibda dd-izjăr Ălmasex s-eɣăs-net ĕnta-i n-Măssinăɣ-i t-illan jĕnnĕj-hărăt iket-net. Namĕlet-t, amin! 6A-wa hawăn-jănneɣ, wădden i n-a-s innin ărkăwăl wa hasăn-ijjăš Măssinăɣ, ăbboṭṭăl-in. Ăbo, ănn-ak, wădden ăddinăt iket-năsăn wi-dd-ĕzjărnen Iṣrayil a ămoosnen dăgg-Iṣrayil wi n-tidĕt. 7Wădden daɣ ăddinăt iket-năsăn wi dd-ĕzjărnen Ibrahim a-s ihăyawăn-net wi n-tidĕt, ĕktĕwăt-dd a-s Măssinăɣ iman-net a innăn i-Ibrahim: "Isxaqq a hak dd-e-ĕzjărăn ihăyawăn." 8A-wen ălmăɣna-net a-s wădden aratăn wi s-dd-issĕbăb ăgg-adĕm, a-s wi n-Măssinăɣ, ănn-ak, aratăn-net a tăn-ămoosăn, wi s-dd-issĕbăb ărkăwăl wa ijjăš i-Ibrahim. 9Ărkăwăl-en, ĕnta da a-wa dăɣ-s innă Măssinăɣ i-Ibrahim: "Ad-kăy-dd-ăqqĕlăɣ dăɣ-ăzzăman šund wa-dăɣ, a-s kăy-dd-e-ăqqĕlăɣ s-ăzzăman-en, tĕkraš-ak Sarăta alyaḍ." 10A-wa has-innă Măssinăɣ, wădden Sarăta ɣas a ɣur-dd-imdă, inn'-en daɣ i-Răbka ta n-hănne-s n-Isxaqq-i n-abba-nănăɣ iket-nănăɣ ed tĕkrăš-as eknewăn s-ĕmmĕk-wen-dăɣ. 11Hărwa wăr-ĕwen eknewăn-en-dăɣ, hărwa wăr-ămešălăn a olăɣăn wăla a lăbasăn a-s immĕjrăd Măssinăɣ i-Răbka, issĕlmăd-tăt s-wa ăsnăfrăn jere-săn; ămoos a-wen erhet n-Măssinăɣ wădden făl tĕssĕba n-emărked jan i-ad-dd-iɣăr s-iman-net wa s-irha. 12A-s ităjj a-wen, innă Măssinăɣ i-Răbka: "Ad-ăkkălăt wa n-amăqqar i-wa n-amăḍray." 13Ǝnta-den-dăɣ a-wa ijăn ed innă Măssinăɣ iman-net: "Ăssofăɣ Yaqub uhĕn Iso." 14Ak ajăn a-wa ija Măssinăɣ, ajăn ad-hanăɣ-isĕwwĕnn a-s Măssinăɣ, wăr-oɣed? Aa făw, wădden a ijan a-wen 15ed Măssinăɣ iman-net a innăn i-Mosa: "Sanseɣ ărrăxmăt-in făll-ere wa s-ărheɣ, naqq'-ahi tăhanint n-ere wa s-ărheɣ." 16A-wen wădden a dd-izjarăn erhet n-ăgg-adĕm wăla ăṣṣahăt-net, tăhanint n-Măssinăɣ a dd-ifal. 17Iktab dăɣ-ĕlkĕttab a-s innă Măssinăɣ i-Firɣăwna: "Jeɣ-kăy ĕssĕbab i-ad-sĕlmĕdăɣ s-tărna-nin i-ad-itwăxṭĕb isĕm-in făll-ărori n-ăkall iket-net." 18A-wen-dăɣ a făl ere wa s-oḍăn Măssinăɣ tăhanint, oḍăn-as-tăt, wa s-ăsɣăr ulh-net daɣ, ad-iɣar. 19Ămmukkăn a-s afăl ĕslăn iyyăḍ dăɣ-wăn i-măjrăd-wen-dăɣ, ad-dd-ĕggĕdăn, ĕnnĕn: Măssinăɣ adiš, ma s-isawar dăgg-adĕm uḍlem? Ajăn mi ăddooben aẓĕẓẓĕwi n-iman-net data-s? Wădden a-wa s-irha ɣas a itajj. 20Uhĕn kăyy-i n-ăgg-adĕm dd-tajjăšăn inĕzjam šund-win-dăɣ, mi tămoosăd făw tamăzaɣăd d-Măssinăɣ? Kăla tĕnhăyăd aɣăsis isastan ere wa t-iknăn d-ăddălil wa făl t-dd-ikna. 21Wădden ere wa ikannăn iɣsas, a-wa s-irha ɣas a itajj, tălaɣt a iḍarrăẓ tĕzzar ikĕn săr-s jer-aɣăsis ilan ălqim d-i t-wărăn ila. Tălaɣt-en-dăɣ a-s ikann a-wen-dăɣ iket-net. 22Măssinăɣ daɣ, isakna aḍkăr-net i-ad-isĕlmĕd s-tărna-net. Ăhoja ăẓiẓăydăr i-wi ăniihăjjănen d-aḍkăr-net wăren ănhăjja ar d-ĕlhĕllak 23măšan wi s-oḍăn tăhanint s-irha ad-t-sĕmɣărăn, irha daɣ ad-tăn-isĕnnĕflĕy dăɣ-ălxurmăt-net. 24Teɣăre ta hanăɣ-dd-ija Măssinăɣ s-iman-net năkkăneḍ-i n-kăl-Ălyăhud, ĕnta daɣ a dd-ija i-tiwsaten ti iyyăḍnen n-inĕẓẓulam 25s-ĕmmĕk wa s-tăn-innă ănnăbi Ozi dăɣ-ĕlkĕttab-net a-s innă, innă Măssinăɣ: "Tamĕtte ta s-ibda wăr tămoos ta-nin, ĕnta ămăra a he-ăjăɣ tamĕtte-nin. Tamĕtte ta s-ibda tătiwăksăn, ĕnta a he-tumasăt ta ĕkneɣ tărha." 26Edăgg daɣ wa-dăɣ hasăn-ătwănnă: "Wăr tămoosăm tamĕtte n-Măssinăɣ", edăgg-wen-dăɣ iman-net a dăɣ-e-ĕtwăɣrĕn s-isĕm: "Aratăn n-Măssinăɣ wa iddarăn." 27Ănnăbi Saya ĕnta, innă: "kăl-Ălyăhud, kud-ărhan ĕjĕn ĕjut wa wăr jenăt timĕtwen n-ăkall dăɣ-asălim n-ejărew wa sĕmmăn tasĕkkemt dăɣ-săn ɣas a he-ijrĕwăn ĕlɣĕllas" 28Emăli daɣ a-wa s-innă, ad-t-ăj, ăššăreɣa wa s-innă ilkam ad-t-dd-izĕzzubbĕt făll-ăddunya, ad-t-ăj šik šik. 29Olăs daɣ ănnăbi Saya innă: "Ǝnnăr wăr hanăɣ-dd-oyya Măssinăɣ-i n-Măssi-s n-ajhanăn hărăt dăɣ-ĕzzurĕyăt-nănăɣ, ašăl-i-dăɣ, noolăh ɣas d-iɣărman wi n-Sodoma d-Gomora-i ihlăk." 30Ma săl a-wen? Inĕẓẓulam-i wăren tĕmmăɣ i-iqqud dat-Măssinăɣ, ij'-en immun-năsăn s-Măssinăɣ imaɣdalăn data-s lanen idĕm. Immun-năsăn s-Măssinăɣ a săr-săn dd-orăwăn a-wen. 31A-s ija a-wen kăl-Iṣrayil ĕntăneḍ, amišĕl n-a-wa innă alămăr a-s tattărăn ad-tăn-ăkf idĕm dat-Măssinăɣ măšan, indăr-asăn ad-dd-săɣsĕlăn a-wen. 32A-wen-š ma t-ijăn? Adiš ĕttărăn ad-ĕjrĕwăn iqqud išlayăn i-wa ihakk immun s-Măssinăɣ. Ǝttărăn ajăraw n-a-wen s-a-wa tamašalăn, ămoosăn ɣas šund ăddinăt s-tărsal tăhunt har išwar oḍan. 33Ija a-wen s-ĕmmĕk-wa-dăɣ s-ătwănnă, innă Măssinăɣ dăɣ-isălan n-Ɣisa: "Ǝnhĕywăt! Sanseɣ tăhunt rassălăt i-ăddinăt dăɣ-aɣrĕm wa n-Sayon. Ad-tumas ĕssĕbab n-ejăḍăl i-iyyăḍ măšan, ere fălla-s ăshătălăn-dăɣ, wăr-ilkem ad-ămmujrăẓ."

will be added

X\