Kăl-Roma 8

1Ămăra, ḍarăt-a-wen-dăɣ ătwănnăn, ăddinăt wi osăɣnen d-Ɣisa Ălmasex, ăbas t-illa făw-făw uḍlem tăn-iwarăn dat-Măssinăɣ ed ĕnniyăt-năsăn wădden tiɣĕswen-năsăn a dăɣ-săn ănnihăḍăn. 2Unfas Šăddijăn-i ihakkăn alămăr wa n-tămudre ta n-tidĕt dd-tirĕw tassaɣt d-Ɣisa Ălmasex, tărna-net a hi-tăsdărfet, tĕbḍ'-ahi d-alămăr wa n-abăkkaḍ d-tamăttant. 3A-wa s-kăla ămoos isĕssĕndar i-alămăr wa n-Mosa-i ănnihăḍăn dăɣ-e d t-illăm ăgg-adĕm dăɣ-tĕssĕba n-abror wa tĕja taɣĕssa-net, issărɣăs-t-dd Măssinăɣ ed, ăšmašăl-dd Rure-s, ămoos-dd ăgg-adĕm i-ad-umas tasĕbḍărt ta jarrăwăt i-ăgg-adĕm tenăšše n-ibăkkaḍăn ɣur-Măssinăɣ. 4A-wa fălla-năɣ ifrăḍ alămăr, ămešăl-t ed, ămăra, wădden a-wa tărha taɣĕssa-nănăɣ ɣas a dăɣ-năɣ ixkamăn, Unfas Šăddijăn n-Măssinăɣ a dăɣ-năɣ ănnihăḍăn. 5Ădduuttăt a-s ere ăttilălăn erhet n-taɣĕssa-net, wăr mad-ămašăl daɣ ɣas ar a-wa fălla-s tărha taɣĕssa-net măšan, wa s-Unfas n-Măssinăɣ a ăttilăl, wăr-e ămašăl ɣas ar erhet n-Unfas Šăddijăn. 6Ijmaḍ-t ăššăk a-s a-wa tărha taɣĕssa n-ăgg-adĕm, tamăttant ɣas a săr-s dd-itirĕw, a-s ija a-wen, Unfas ĕnta, tămudre ta n-tidĕt d-ălxer a dd-itiirĕw s-ăgg-adĕm. 7Ăwadĕm wa wărăn izĕnnĕzjumĕt ar dăɣ-a-wa fălla-s tărha taɣĕssa-net, ašănjo n-Măssinăɣ, wăr-ăddobăt asrĕs n-iman-net dat-alămăr n-Măssinăɣ, wăr t-ăddobăt kud t-irha-dăɣ. 8A-wen-dăɣ a făl ăddinăt wi ăttilălnen erhet n-tiɣĕswen-năsăn, wăr t-illa ĕmmĕk s-ĕjrăẓăn i-Măssinăɣ. 9Kăwăneḍ, ăbas tĕglam făll-derhan wa n-tiɣĕswen-năwăn, ănn-ak, jăm iman-năwăn daw-tărna n-Unfas wa ija Măssinăɣ dăɣ-ulhawăn-năwăn. Ere daɣ wa s-wăr-iha Unfas Šăddijăn n-Ălmasex ulh-net, wăr t-ila Ălmasex. 10Kunta daɣ iha Ălmasex ulhawăn-năwăn, kud-dăɣ tamăttant a mad-tĕjĕm dăɣ-abăkkaḍ, ill'-awăn-t ĕlɣĕllas ed ij'-iwăn Măssinăɣ dăɣ-tĕssĕba n-tassaɣt ta jăm d-Unfas Šăddijăn n-Ălmasex ăddinăt ɣur-s lanen idĕm. 11A-wen-dăɣ a făl kunta iha Unfas Šăddijăn n-Măssinăɣ-i dd-issĕnkărăn Ɣisa jer-inĕmmuttan ulhawăn-năwăn, adiš, ad-kăwăn-ăkf daɣ ĕnta-i dd-issĕnkărăn Ălmasex jer-inĕmmuttan tămudre ta dd-e-sĕnkărăt tiɣĕswen-năwăn jer-inĕmmuttan s-tărna n-Unfas wa izzăɣăn ulhawăn-năwăn. 12Ayĕtma-ɣ, kunta ill'-e fărĕḍ hanăɣ-iwarăn, ĕlmĕdăt a-s wădden wa n-alkum i-erk derhanăn n-tiɣĕswen-nănăɣ. 13Ere ăttilălăn erhet n-taɣĕssa-net, tamăttant ɣas a dd-e-arĕw s-iman-net măšan, ere wa hin-ijărăn s-tărna n-Unfas Šăddijăn erhet n-taɣĕssa-net, tămudre ta n-tidĕt a dăɣ-s tĕlkamăt. 14Ere wa s-Unfas n-Măssinăɣ a t-oɣadăn, ara n-Măssinăɣ a ămoos. 15Unfas daɣ wa kăwăn-ikfă Măssinăɣ, wădden Unfas kăwăn-ijan eklan s-hărkuk han tarĕmmeɣt, ănn-ak, ikf'-iwăn Măssinăɣ Unfas-net i-ad-talăhăm d-ăddinăt dd-ija s-iman-net. A-wen-dăɣ a hanăɣ-ikfăn turhajăt n-ad-nĕɣarr Măssinăɣ s-isĕm: "Abba". 16Tărna n-Unfas Šăddijăn-en-dăɣ hanăɣ-ikfa Măssinăɣ a hanăɣ-ămoosăn tajuhe ta hanăɣ-satbatăt n-a-s tidĕt-dăɣ a-s aratăn n-Măssinăɣ a nămoos. 17Ɣas, šămad ădduuttăt a-s aratăn n-Măssinăɣ a nămoos, adiš, nămoos imĕkkusa, ad-hanăɣ-ăkf Măssinăɣ a-wa s-hanăɣ-ijjăš ărkăwăl-net, nahăr daɣ d-Ălmasex terše-net. Kunta nărḍa s-ad-dăr-s nahăr aɣăna wa inhăy, adiš, ad-dăr-s nahăr ălxurmăt-net. 18Ija ɣur-i a-s tersĕmmawen ti nĕhannăy ămăra-dăɣ, wădden wăla a ĕnḍărrăn edes i-ălxurmăt wa s-ilkam ad-hanăɣ-dd-infilĕl. 19Ălxurmăt wa s-ăqqalăn aratăn n-Măssinăɣ, wădden ĕntăneḍ ɣas a irmas iba n-taẓidert n-ad-ăj; a-wa iwărăn ărori n-ăkall iket-net a ărorădăn ad-dd-ass. 20Ămoos a-wa iwărăn ărori n-ăkall a wărăn issen e-s ihăl, wădden ad-t-dd-ikkasăn a-wen, Măssinăɣ a has-iɣtăsăn a-wen. Măšan, a-wen, wăr hin-ikkes ăṭṭăma wa ăsjăr Măssinăɣ taxlĕkt iket-net. 21Imal-dd ašăl d-mad-isĕttăɣlĕl Măssinăɣ taxlĕkt-net iket-net dăɣ-ĕlhĕllak wa s-tăšewăj, ĕjrĕwăn aratăn n-Măssinăɣ ălxurmăt wa s-hasăn-innă. 22Nĕssan a-s ašăl-i-dăɣ, taxlĕkt iket-net a tăššoršăt, tĕkna tiẓẓurt tolăhăt d-ta rammăsăt tamăḍt jarrăwăt eɣăf-net. 23Wădden daɣ ĕnta ɣas a irmas a-wen-dăɣ, irmas-anăɣ năkkăneḍ dăɣ-i ija Măssinăɣ tiɣăffaddiwen n-Unfas-net. Năkkăneḍ daɣ, nĕtihnĕffit dăɣ-iman-nănăɣ, năqqal i-ašăl wa d-e-numas s-tidĕt-dăɣ aratăn n-Măssinăɣ, ikkĕs-anăɣ dăɣ-tissust ta dăɣ-hanăɣ-jănăt tiɣĕswen-ti-dăɣ. 24Ed năkkăneḍ, tidĕt-dăɣ a-s ĕlɣĕllas-nănăɣ itbat măšan har ămăra-dăɣ, ămoos a dăɣ-nĕjar ăṭṭăma. Ăywa, ăṭṭăma wa ihannăy ăwadĕm, ad-ăbas ămoos ăṭṭăma; ĕndek ăṭṭăma wa ilkămăn dăɣ-a-wa-s išwăr, inhăy-t ăwadĕm? Wăr t-illa. 25Măšan afăl ăṭṭăma-nănăɣ, ămoos a wăr nĕhĕnnĕy, dihen, ad-has-nĕqqĕl s-taẓidert d-ulh ijlayăn. 26A-wen-dăɣ făw a făl hanăɣ-itilal Unfas Šăddijăn dăɣ-tĕlĕmḍe-nănăɣ ed a-wa s-ăniihăjja ad-t-nĕttăr dăɣ-Măssinăɣ, wăr t-nĕssen. Ǝnta-en-dăɣ a hanăɣ-itĕddalăn Măssinăɣ s-tihnĕffa wăren la afĕssăr. 27Tidĕt a-wen, Măssinăɣ-i issanăn a-wa ihăn ulhawăn, issan daɣ a-wa ihăn ĕnniyăt n-Unfas. A-wen-dăɣ a făl ĕnta, erhet n-Măssinăɣ a itattăr i-imĕššeddĕjăn. 28Ḍarăt-a-wen daɣ, nĕssan a-s ăddinăt wi ărhănen Măssinăɣ d-ăddinăt wi dd-iɣră s-iman-net dăɣ-erhet-net, a tăn-irmăsăn-dăɣ, a ămoos-dăɣ, Măssinăɣ iman-net a itajjăn a-s tišrayăten n-tanfust-ten-dăɣ tăn-tărmăsăt, i n-tănfo-năsăn. 29Măssinăɣ ăddinăt wi ăsnăfrăn dat-axălak i-ad-umasăn aratăn-net, iɣtăs-asăn milhaw d-Rure-s i-ad-umas Rure-s teɣăfădde n-ă/n/natăn ăjjootnen. 30Măssinăɣ, ăddinăt wi s-dd-iɣtăs a-wen, iɣr'-en-dd s-iman-net; wi dd-iɣra s-iman-net, ikf'-en idĕm data-s, wi ikfa idĕm data-s, ikf'-en daɣ ălxurmăt-net. 31Šămad isălan-den-dăɣ, ma s-năddoobăt tĕnna-net daɣ? Kunta Măssinăɣ-i-dăɣ, tidĕt-dăɣ a-s ašrut wa-nănăɣ a iha, mi fălla-năɣ ilan tărna? 32Zĕnnĕzjumĕtăt ɣas: kunta Măssinăɣ, Rure-s iman-net wa n-iyyăn ila, wăr t-iɣles dăɣ-tamăttant, ănn-ak, oyy'-e ămmut dăɣ-tĕssĕba-nănăɣ, ĕndek ɣas ḍarăt-a-wen-dăɣ a-wa hanăɣ mad-unjĕy? Wăr t-illa. 33Ăddinăt wi ăsnăfrăn Măssinăɣ, mi tăn-e-isĕwărăn uḍlem? Wăr t-illa ed Măssinăɣ iman-net a tăn-ikfăn idĕm data-s. 34Mi ăddoben ad-tăn-isĕwăr uḍlem? Ajăn wădden Ălmasex ămmut măšan, isălan, wăr-ĕmden dihen ɣas, a ojărăn a-wen, inkăr-dd jer-inĕmmuttan, ikk' išĕnnawăn, ăqqima dihen daw-aɣil n-Măssinăɣ, itattăr-anăɣ s-Măssinăɣ. 35Ǝndek ɣas a-wa-dăɣ hanăɣ-e-ibḍĕwăn d-tărha ta hanăɣ-ija Ălmasex? Ak tirĕmmaɣ meɣ erk ĕmmĕk, ak ălɣizabăt meɣ laẓ meɣ ɣĕllĕl, ak miši meɣ tăkoba? Wăr t-illa făw a hanăɣ-dăr-s-e-ibḍĕwăn, a ămoos-dăɣ. 36Dăɣ-isălan n-a-wen-dăɣ a dăɣ-hanăɣ-innă ĕlkĕttab n-Măssinăɣ: "Tĕssĕba-năk, Măssinăɣ a făl nĕtamăttat hak ašăl, jăn-anăɣ ăddinăt ɣas šund taɣsiwen dăɣ-wăr-ilkem a săl aɣăras." 37Măšan, hakd a-wen-dăɣ, dăɣ-a-wen-dăɣ iket-net, nămoos imărnan, nokăy făw tumast n-imărnan, nĕkrăš ašăl imdan făll-išĕnja-nănăɣ s-turhajăt n-Wa hanăɣ-irhăn. 38Ǝkkasăɣ ăššăk a-s wăr t-illa făw a hanăɣ-e-ibḍĕwăn d-tărha ta hanăɣ-ija Măssinăɣ: ak tamăttant wăla tămudre wăla ănjălosăn wăla išĕnnawăn wăla kăl-tărna, a-wa t-illăn d-a-wa ilkămăn, 39kăl-ăṣṣahăt wi n-išĕnnawăn d-a-wa iwărăn ărori n-ăkall, wăr t-illa făw a dd-ătiwăxlăkăn ăddooben ad-hanăɣ-ibḍĕw d-tărha n-Măssinăɣ ta hanăɣ-dd-ăsnăfalăl dăɣ-Emăli-nănăɣ Ɣisa Ălmasex.

will be added

X\