Kăl-Roma 7

1Ayĕtma-ɣ! Ǝssanăɣ a-s a-wa s-ĕkkeɣ tĕnna-net dăɣ-isălan n-a-wa innă alămăr, wăr has-tĕžhelăm. A ikkăs ăwadĕm iddar-dăɣ, ifraḍ fălla-s amišĕl n-alămăr. 2Ălmital da ăssiifhămăn a-wen: tamăḍt tădobănăt, a ikka ăhalĕs-net iddar, wăr has-t-illa dăɣ-a-wa innă alămăr a dăɣ-s tărkĕb eɣăf-net măšan afăl ašăl wa d-ăba ăhalĕs-net, tĕjrăw ya iman-net, ad-ăbas fălla-s ifraḍ a-wa innă alămăr. 3Afăl tărkăb eɣăf-net dăɣ-ăhalĕs-net, tĕglă, tĕjă adubĕn iyyăn ăynayăn, a-di tĕzna măšan, afăl ijmaḍ ăhalĕs-net ăddunya, tĕjrăw ya iman-net dăɣ-a-wa iɣtăs alămăr dăɣ-isălan-win-dăɣ. Afăl tolăs adubĕn ḍarăt iba n-ăhalĕs-net, wăr mad-has-umas a-wen ĕzzĕna. 4Ămăra, ayĕtma-ɣ, šund a-wen-dăɣ a jam kăwăneḍ-dăɣ: dăɣ-tĕssĕba n-tassaɣt ta jăm d-taɣĕssa n-Ălmasex, tămoosăm i-a-wa innă alămăr ăddinăt s-ăbas ĕddarăn. Ămoos a-s ĕnta a kăwăn-ikrăšăn, ĕnta-i dd-inkărăn jer-inĕmmuttan i-ad-tamašalăm erhet n-Măssinăɣ. 5Ibda a-s nĕlkăm i-erk derhanăn n-tiɣĕswen-nănăɣ d-mălayăɣnatăn wi iyyăḍnen, ăllil-anăɣ alămăr s-a-wen ed, wăr săr-năɣ dd-orew a-wen a săl tamăttant măšan, 6ămăra d-nămmut dăɣ-isălan n-a-wa fălla-năɣ ifrăḍ alămăr-i hanăɣ-ikrădăn dăɣ-tišĕm n-tansit n-tiɣĕswen-nănăɣ, năddoobăt amišĕl n-erhet n-Măssinăɣ s-tasna tăynayăt dăɣ-ixkam Unfas Šăddijăn. Ǝnta-en-dăɣ a-s tărna ta ihăkk, tĕẓlay d-tărna ta ila alămăr-i s-ălkaḍ ɣas a făll-tĕktab. 7Ma ămoos ălmăɣna n-măjrăd-wen-dăɣ? Adiš alămăr wa n-Mosa, ĕnta a hanăɣ-isiḍĕwăn dăɣ-abăkkaḍ? Xăša! Ănn-ak alămăr-en-dăɣ a hi-issĕlmădăn s-abăkkaḍ ed, ĕnnăr wăr hi-innă alămăr: "Wăr tăsdărhănăd a ila ăwadĕm wăr led", wăr lĕmmĕdăɣ s-a-wen. 8A-wen-dăɣ a făl aɣătal-wen-dăɣ hi-ija alămăr a ijrăwăn i-abăkkaḍ tašlĕlt ta săr-i-dd-torăwăt e d t-illăm erk derhan. Ǝnnăr wăr dd-ixlek alămăr, wăr hi-tĕjjĕš tijya n-a-wa s-itawănna abăkkaḍ. 9Ibda, ĕddarăɣ wăla alămăr măšan, ăzzubbăt-dd a-wa ifrăḍ alămăr ɣas, innăhăḍ dăɣ-i abăkkaḍ, ămoos šund a-s ăbas ĕddarăɣ. 10Fărĕḍ n-alămăr wa s-ănihăjja a-s tămudre a săr-i dd-orăw, tamăttant ɣas a săr-i dd-iwwăy 11ed, ămoos-dd fărĕḍ-wen-dăɣ ăsaru wa s-hi-ăsjăḍlăt abăkkaḍ dăɣ-tamăttant. 12Hakd a-wen-dăɣ, alămăr, wăr t-illa a t-ijrawăn, Măssinăɣ ad-dd-ifal, a-wen-dăɣ a-s: šăddiij, oɣad, ifran. 13Adiš, ma n-ĕmmĕk n-a-s a-wa olăɣăn, orăw-dd săr-i tamăttant? A-wen ya, wăr il' ĕmmĕk. Tidĕt ĕnta da: alămăr-en-dăɣ šăddijăn, a săr-i dd-orăwăn ăsaru wa dd-ăwwăyăn asĕnnĕfilĕl wa dd-ija abăkkaḍ iman-net dăɣ-i. 14Nĕssan, ădduuttăt daɣ a-wen, a-s alămăr, Unfas n-Măssinăɣ a-s ĕssĕbab-net măšan ălwăxla a-s năkk-i-dăɣ n-ăgg-adĕm, a wăr-iha ălfăyda s-ămešălăɣ a-wa ifrăḍ ed, ăkkileɣ i-abăkkaḍ šund ažĕnš a hi-ijă. 15A-wa tamašalăɣ, iqqan eɣăf-in, indăr-ahi ad-t-ĕjrăhăɣ ed a-wa s-ărheɣ amišĕl-net, wăr t-tĕmišilăɣ; a-wa-dăɣ dăr-okăḍăɣ ɣas a tamašalăɣ. 16Ɣas, šămad a-wa dăr-okăḍăɣ ɣas a tamašalăɣ, ĕnta-den-dăɣ a-wa ămoosăn tajuhe ɣur-i n-a-s alămăr-i-dăɣ, wăr t-illa ălɣib t-iwarăn. 17Tidĕt-dăɣ a-s abăkkaḍ wa dăɣ-i ănnihăḍăn a itamašalăn hărătăn-win-dăɣ, wădden năkk 18ed, ĕssanăɣ a-s a-wa olăɣăn, năkk-i n-ăgg-adĕm, wăr iha taɣĕssa-nin. A-wa olăɣăn, ărheeɣ iji-net măšan, indar-ahi. Ijmaḍ-t ăššăk a-s ĕkfărăɣ dăɣ-amišĕl n-a-wen-dăɣ, 19wăr tĕmišilăɣ a-wa olăɣăn, wăr tĕmišilăɣ ɣas ar a-wa lăbasăn dăr-ĕkneɣ mikḍaw. 20Šămad ăbas tamašalăɣ ar a-wa dăr-okăḍăɣ, adiš, ăbas năkk a itamašalăn tăllăbăst-ten-dăɣ, ănn-ak abăkkaḍ wa ḍăɣ-i ănnihăḍăn a t-itamašalăn. 21Issĕjrăh-ah'-in a-wen-dăɣ hărăt iyyăn: ăsidărhănăɣ iji n-a olaɣăn măšan a-wa lăbasăn a făll-i ikarrăšăn ašăl. 22Dăɣ-ammas n-ulh-in, ijraẓ-ahi alămăr n-Măssinăɣ 23măšan, taɣĕssa-nin ĕnta, ih'-et alămăr iyyăn săl wa ărheɣ. Alămăr-wen-dăɣ a hi-iknasăn hak ašăl, iṭṭaf-ahi dăɣ-tišĕm n-alămăr n-abăkkaḍ wa dăɣ-i ănnihăḍăn. 24Amăskoy năkk-i s-wăr t-illa ălfăyda hi-ihan! Mi hi-e-aḍĕnăn tăhanint, ikkĕs-ahi-dd dăɣ-taɣĕssa-ta-dăɣ hi-tăhobet s-tamăttant? 25Tĕmmal i-Măssinăɣ dăɣ-ăddimmăt n-Ɣisa Ălmasex-i n-Emăli-nănăɣ hanăɣ-ijrăwăn ad-dd-nĕkkĕs errawăn-nănăɣ dăɣ-a-wen-dăɣ. Ămăra, ĕnniyăt-in, alămăr wa n-Măssinăɣ a-s ăkkiilăt, a-s ija a-wen, taɣĕssa-nin ĕnta, alămăr wa n-abăkkaḍ a-s tăkkilăt.

will be added

X\