Kăl-Roma 6

1Măjrăd-wa-dăɣ, ma ămoos ălmăɣna-net? Adiš năkfet ɣas ămăra iman-nănăɣ i-abăkkaḍ i-ad-itwĕnhĕy ĕjut n-ănnuɣmăt n-Măssinăɣ. 2Xăša! Năkkăneḍ-i ămmutnen dăɣ-isălan n-abăkkaḍ, ĕndek ĕmmĕk wa s-has-e nĕddar, nĕhakk'-e iman-nănăɣ daɣ? Wăr-ămmukkăn a-wen. 3Ajăn wăr tĕssenăm a-s năkkăneḍ-i ătwăsălmăɣnen dăɣ-aman s-isĕm n-Ɣisa Ălmasex i-ad-dăr-s nasăɣ, atwĕsĕlmaɣ-nănăɣ-en, ălmăɣna-net a-s nohăr dăr-s tamăttant ta ija, 4ămoos a-wen šund ɣas a-s ašăl wa d-ijjăš Ălmasex aẓĕkka, nohăr-t dăr-s, nohăr dăr-s daɣ tanăkra ta dd-ija jer-inĕmmuttan s-ĕmmĕk wa s-dd-inkăr jere-săn s-tărna n-ălxurmăt n-Abba Măssinăɣ i-ad-nĕkrĕš ašăl, nărjĕš dăɣ-tămudre ta tăynayăt ihăkk. 5Ădduuttăt daɣ a-s kunta nohăr dăr-s aẓĕkka, ad-dăr-s nahăr daɣ tămudre ed, inkăr-dd jer-inĕmmuttan 6făl-a-s nĕlmĕdet a-s ăgg-adĕm n-anăsbăkkaḍ wa s-kăla t-nămoos, ătwăṣlăb d-Ɣisa făll-tajĕttewt i-ad-hin-tămmăt tasna ta tărĕwăt i-ad-ăba s-năkkilăt i-abăkkaḍ 7ed, ere wa ămmun ya, ibḍa s-iyyăt d-a-wa s-itawănna abăkkaḍ. 8Ɣas, šămad ădduuttăt a-s nohăr d-Ălmasex tamăttant, adiš, ădduuttăt a-s ad-dăr-s nahăr daɣ tămudre ed, 9nĕssan daɣ a-s Ălmasex-i dd-inkărăn jer-inĕmmuttan, ăbas ilkam ad-olas tamăttant tiyyăt făl-a-s ăbas fălla-s tĕla tamăttant tărna. 10Ija tiyyăt tamăttant i-ad-ăbas ila abăkkaḍ ăššar; ămăra dd-iddăr, iddar i-amišĕl n-erhet n-Măssinăɣ. 11A-wen-dăɣ a făl kăwăneḍ, ăjăt iman-năwăn ăddinăt ămmutnen dăɣ-isălan n-a-wa ămoosăn abăkkaḍ dăɣ-a-s tămoosăm ămăra ăddinăt ĕddarnen i-Măssinăɣ dăɣ-tassaɣt-năwăn d-Ɣisa Ălmasex. 12Wăr toyyem abăkkaḍ ănnihăḍ dăɣ-taɣĕssa-năwăn-i făll-la tamăttant tărna i-ad-tăttălălăm erk derhanăn-net. 13Wăr toyyem ašrut n-taɣĕssa-năwăn wăl' iyyăn ănniihăḍ dăɣ-s Iblis, isawăjj'-et a wărăn oɣed, ănn-ak, ăkfăt iman-năwăn i-Măssinăɣ, talĕhĕm d-ăddinăt ăynaynen, tĕkfĕm-t daɣ tiɣĕswen-năwăn, tămašălăm iqqud. 14Afăl jăm a-wen, wăr dăɣ-wăn-e-ănnăhăḍ abăkkaḍ ed, ăbas t-tĕllam daw-ălxikmăt n-alămăr, ănn-ak, mălăm ămăra daw-ănnuɣmăt n-Măssinăɣ. 15Ma ămoos daɣ ălmăɣna n-măjrăd-wa-dăɣ s-iket t-jeɣ n-a-s ăbas-t-nĕlla daw-alămăr wa n-Mosa, nĕmăl-t ămăra daw-ănnuɣmăt n-Măssinăɣ? Ak ajăn a-wen ălmăɣna-net, niḍĕwet ɣas dăɣ-abăkkaḍ? Xăša! 16Ajăn wăr tĕssenăm a-s ere tĕkfăm tanhaḍt făll-iman-năwăn dăɣ, ad-has-tăkkălem, ad-tamašalăm erhet-net, umas măssi-wăn. Ǝmmĕk-wen-dăɣ daɣ a-s afăl toyyăm abăkkaḍ ănnihăḍ dăɣ-wăn, ad-has-tăkkălem, arĕw-dd săr-wăn a-wen-dăɣ tamăttant. Umasăt eklan n-Măssinăɣ i-ad-săr-wăn dd-arĕw a-wen tămudre toɣadăt. 17Namĕlet Măssinăɣ ed kunta ibda tăkkilem i-abăkkaḍ, ašăl-i, tamašalăm s-taɣărha tĕjlayăt tijĕttewen n-ăddin ti tĕlmădăm. 18Tĕntăšăm-dd iman-năwăn dăɣ-tanhaḍt n-abăkkaḍ i-ad-dăɣ-wăn ănnăhăḍ ămăra amišĕl n-a-wa oɣădăn. 19Măjrăd šund wa tajjăn dăgg-adĕm a hawăn-in-jeɣ i-ad-tudabem ujreh n-isălan-wi-dăɣ. Ɣas, kunta ibda, tăsnăhăḍăm abăkkaḍ dăɣ-tiɣĕswen-năwăn s-iba n-tĕšĕdje d-azzal ḍarăt a-wa ăsikărakăḍăn, adiš ămăra, sĕnnĕhăḍăt iman-năwăn dăɣ-amišĕl n-a-wa oɣădăn dăɣ-ittus n-ad-tĕzzăɣăm tămudre šăddijăt. 20Ibda, a-s dăɣ-wăn ănnihăḍ abăkkaḍ, wădden wăr tăkkulăm dăɣ-iji n-a-wa oɣădăn măšan, 21ĕndek a-wa săr-wăn dd-iššĕšrăy a-wen? Ajăn wădden, wăr săr-wăn dd-iššĕšrăy a-wen ar tăkrakiḍt n-a-wa tamašalăm ed tamăttant dat-Măssinăɣ ɣas a săr-wăn dd-orăw a-wen. 22Măšan ămăra d-kăwăn-ăsdărfăt Măssinăɣ dăɣ-isălan n-abăkkaḍ, ĕnta a-s tămoosăm eklan-net i-ad-tamašalăm a-wa šăddijăn săr-wăn dd-madăn-isăɣsĕl tămudre ta tăɣlălăt ed, 23ălxaqq n-abăkkaḍ, tamăttant, măšan, ănnuɣmăt n-Măssinăɣ wa ihăkk bănnan a t-ămoosăn, tămudre ta tăɣlălăt dăɣ-idĕm n-Emăli-nănăɣ Ɣisa Ălmasex.

will be added

X\