Kăl-Roma 5

1Ămăra d-hanăɣ-ikfă immun-nănăɣ idĕm dat-Măssinăɣ, imăl-t ălxer jere-năɣ dăr-s dăɣ-ăddimmăt n-Emăli-nănăɣ Ɣisa Ălmasex, 2ĕnta-en-dăɣ a hanăɣ-ijrăwăn tabarăt s-Măssinăɣ i-ad-nĕjrĕw ănnuɣmăt-net, intĕm immun-nănăɣ. Ǝnta-en-dăɣ ămăra a-s ăṭṭăma wa făll-năsifălla ed, nĕjar ăṭṭăma n-a-s ilkam ašăl wa d-fălla-năɣ dd-mad-izĕzzĕbbĕt Măssinăɣ ălxurmăt-net, a-wen-dăɣ a hanăɣ-ăsihălăylăyăn. 3Ălɣizabăt nĕnhăy-dăɣ, ad-săr-năɣ-dd-arĕw akuyĕd dăɣ-alkum-has, 4arĕw-dd săr-năɣ akuyĕd, immun išmărăn, arĕw săr-năɣ a-wen, ăṭṭăma ădduutten 5wăr henăt tikărras, itbat ed, Măssinăɣ iman-net a ijăn tărha-net dăɣ-ulhawăn-nănăɣ s-tărna n-Unfas Šăddijăn-i hanăɣ-ikfa. 6Ḍarăt-a-wen-dăɣ, Ălmasex, hărwa wăr t-illa ălfăyda hanăɣ-ihan a-wa-dăɣ hanăɣ-ija abăkkaḍ, tosă-dd tăqqăn ta issĕbdăd Măssinăɣ ɣas, ămmut dăɣ-ăddimmăt n-inăsbăkkaḍăn. 7Iẓẓĕwăt ere madăn-ăj iman-net dăɣ-miši dăɣ-tĕssĕba n-iyyăn kud-irha făw umas a-s ĕnta a ojărăn ălɣădalăt dăɣ-ăddunya, šărnaš d-e-isĕmmĕskĕl ăwadĕm iman-net iman n-iyyăn, a ija dăɣ-milɣaw-dăɣ. 8Măšan Măssinăɣ, ij'-anăɣ tărha-ta-dăɣ s-hărwa-dăɣ nămoos ăddinăt warăn ibăkkaḍăn-năsăn, ămmut Ălmasex dăɣ-tĕssĕba-nănăɣ. 9Ɣas, kunta nĕkrăš idĕm ogdăhăn d-a-wen-dăɣ ɣur-Măssinăɣ dăɣ-tĕssĕba n-ašni n-Ɣisa Ălmasex wa inɣălăn, ăb' ăṭṭăma n-ĕddĕttu wa ija igguẓ wa hanăɣ-e-ăj dăɣ-ăššar wa ilkămăn. 10Ɣas, kunta hărwa nămoos išĕnja n-Măssinăɣ, ăẓnămăẓăl-anăɣ Măssinăɣ d-iman-net s-tamăttant ta ija Rure-s, ăb' ăṭṭăma n-ĕddĕttu wa ija anmĕẓĕl-nănăɣ dăr-s dăɣ-tĕssĕba n-tanăkra ta dd-ija Ɣisa-i hanăɣ-iɣallăsăn jer-inĕmmuttan. 11A-wen-dăɣ a făl ămăra, năddiiwăt, năsifălla făll-Măssinăɣ dăɣ-idĕm n-Emăli-nănăɣ Ɣisa Ălmasex-i hanăɣ dăr-s ăẓnămăẓălăn. 12Adĕm a dd-orăwăn abăkkaḍ s-ăddunya iket-net, abăkkaḍ-wen-dăɣ ofa, a dd-orăwăn tamăttant s-ăddunya. Ǝmmĕk-wen-dăɣ a-s toḍa tamăttant făll-dăgg-adĕm iket-dăɣ-năsăn ed wăr t-illa făw ere s-wădden itra-dd abăkkaḍ-wen-dăɣ. 13Abăkkaḍ, ămoos a ihan ăddunya hărwa wăr dd-ăzzăbbăt Măssinăɣ alămăr făll-ănnăbi Mosa măšan, ibăkkaḍăn wi ămešălăn ăddinăt dat-ăzabbu n-alămăr-wen-dăɣ, wăr tăn-ixseb Măssinăɣ făll-dăgg-adĕm 14măšan, hakd a-wen-dăɣ, a-wen, wăr hin-ikkes a-s a dd-tăxlăk ăddunya-dăɣ, ɣur-Adĕm hundăɣ har ănnăbi Mosa, tamătten ăddinăt wăren ămešăl abăkkaḍ olăhăn d-wa ămešăl Adĕm-i ămoosăn tele n-wa s-ătwănna ilkam ad-dd-ass. 15Ănnuɣmăt wa ihăkk Măssinăɣ bănnan d-abăkkaḍ wa ămešăl Adĕm, wădden a oharăn hărăt. Tĕssĕba n-abăkkaḍ wa ofa iyyăn n-ăhalĕs, Adĕm, a făll-dd-toḍa tamăttant făll-e d t-illăm ăgg-adĕm, măšan ănnuɣmăt wa ihăkk Măssinăɣ d-ănnuɣmăt wa săr-năɣ dd-orăw iyyăn n-ăhalĕs, Ɣisa Ălmasex, ih'-e ălfăyda măqqoorăn. 16A-wen wădden făw a-s ăddobăt ăwadĕm ad-t-isĕnnĕfăqq ed, dăɣ-tĕssĕba n-anmĕšri n-iyyăn n-ăhalĕs ɣas a făl dd-oḍa ăššăreɣa n-Măssinăɣ-wa ăswărăn uḍlem e d t-illăm ăgg-adĕm măšan, ănnuɣmăt wa dd-ăzzăbbăt Măssinăɣ, ikf'-anăɣ idĕm ɣur-Măssinăɣ, ăsdărfăt-anăɣ. 17Ɣas, kunta šăɣšad n-iyyăn n-ăhalĕs a săr-năɣ dd-orăwăn tărna ta fălla-năɣ tĕkrăš tamăttant, ăb' ăṭṭăma n-ărrĕzăɣ wa măqqărăn săr-năɣ dd-mad-arĕw ănnuɣmăt n-Măssinăɣ wa hanăɣ-ikfăn tămudre d-Tĕmmĕnĕya dăɣ-tĕssĕba n-Ɣisa Ălmasex-i n-iyyăn. 18A-wen-dăɣ a făl kunta šăɣšad n-iyyăn n-ăhalĕs a dd-orăwăn uḍlem făll-e d t-illăm ăgg-adĕm, orăw-dd săr-năɣ daɣ iqqud n-iyyăn n-ăhalĕs, Ɣisa Ălmasex, ajăraw n-idĕm ɣur-Măssinăɣ d-tămudre tăɣlalăt. 19Ǝmmĕk-wa-dăɣ s-anmĕšri n-iyyăn n-ăhalĕs a ijăn e d t-illăm ăgg-adĕm anăsbăkkaḍ dat-Măssinăɣ, ĕmmĕk-wen-dăɣ daɣ a-s iqqud n-iyyăn n-ăhalĕs, a ijrăwăn idĕm ɣur-Măssinăɣ i-e d t-illăm ăgg-adĕm. 20Alămăr, ăzzăbbăt-t-dd Măssinăɣ făll-Mosa i-ad-isĕlmĕd dăgg-adĕm a-s inăsbăkkaḍăn a ămoosăn măšan, ĕjut dd-ija abăkkaḍ-dăɣ, ăsjăt-dd fălla-s Măssinăɣ ănnuɣmăt 21dăɣ-ittus n-a-s ĕmmĕk-wa-dăɣ s-kăla fălla-năɣ ixkăm abăkkaḍ-i săr-năɣ dd-orăwăn tamăttant, ad-fălla-năɣ ixkĕm ămăra ănnuɣmăt n-Măssinăɣ wa ihăkkăn idĕm ɣur-s i-ad-nĕjrĕw tămudre ta tăɣlălăt s-ămoos Ɣisa Ălmasex-i n-Emăli-nănăɣ ĕssĕbab-net i-e d t-illăm ăgg-adĕm.

will be added

X\