Kăl-Roma 4

1Ămăra, ănnăbi Ibrahim-i hanăɣ-ăshăyăwăn, ma dăɣ-s-e-nănn, ma t-ikfăn idĕm dat-Măssinăɣ? 2Ǝnnăr timašalen-net a t-ĕkfănen idĕm dat-Măssinăɣ, umas-as a-wen abăraj, măšan, wăr-ăddobăt a-wen dat-Măssinăɣ 3ed, ĕlkĕttab n-Măssinăɣ iman-net a hanăɣ-innăn a-s: "Omăn Ibrahim s-Măssinăɣ, ikrăš data-s idĕm." 4Ăgg-adĕm ya, afăl ixdăm hărăt, timẓal-net dihen, wădden bănnan, ăniihăjja d-ălxaqq n-tide-net 5măšan ăgg-adĕm, immun-net s-Măssinăɣ a t-ihakkăn data-s idĕm, wădden ălxidmăt ija s-ăṣṣahăt-net. Ǝnta-den-dăɣ ĕmmĕk wa s-ihakk Măssinăɣ idĕm i-wi wăren ăddin. 6Dăɣ-tĕssĕba n-a-wen-dăɣ ijarrăw ăwadĕm ikrašăn idĕm ɣur-Măssinăɣ wăla imărkedăn a făl innă ămănokal Dawĕd: 7"Tĕnḍĕḍ i-wi s-hin-inša Măssinăɣ erk imojjan-năsăn, omăs-in ibăkkaḍăn-năsăn, 8tĕnḍĕḍ i-wa s-hin-inša Emăli ibăkkaḍăn-net, wăr tăn-dd-iḍkel dăɣ-meḍan." 9Ălxer-wen-dăɣ, ajăn wădden, ill'-e făll-wi ămelăynen hakd wi wăren ămelăy? Wădden, ătwănn'-anăɣ a-s: "Omăn Ibrahim s-Măssinăɣ, ikrăš data-s idĕm." 10Ǝmme d-ikrăš Ibrahim idĕm-wen-dăɣ dat-Măssinăɣ? Ak ajăn a-s t-ikrăš, ăzizăbbăt-dd Măssinăɣ amili meɣ? Ăbo, a-s ikrăš Ibrahim idĕm dat-Măssinăɣ, wăr fălla-s ins' absăr. 11Šămad oman s-Măssinăɣ, ikraš ɣur-s idĕm, ad-ămelăy i-ad-umas a-wen tamătart tăssitbătăt idĕm wa ikrăš. Otăs Măssinăɣ s-a-wen-dăɣ ad-umas Ibrahim abba n-e d t-illăm amumĕn dăɣ-tĕssĕba n-ad-ɣur-s ĕkrĕšăn wi ămelăynen hakd-dăɣ wi wăren ămelăy idĕm 12s-ĕmmĕk wa s-t-ɣur-s ikrăš Ibrahim-i s-ĕnta a-s abba n-ăddinăt-wi wăren ăsfălla făll-amili, ănn-ak wăr-omenăn ar s-Măssinăɣ s-ĕmmĕk wa s-săr-s omăn Ibrahim-i n-abba-nănăɣ-i ɣur-s ikrăšăn idĕm hărwa wăr t-immer absăr. 13Ijjăš Măssinăɣ ărkăwăl i-Ibrahim, inn'-as, ad-ikus ăddunya ĕnta d-ihăyawăn-net măšan, tăkasit-en, wădden alkum i-a-wa innă alămăr a has-tăt-e-ikfĕn, immun s-Măssinăɣ d-idĕm wa ɣur-s ikrăš a has-ijrăwăn a-wen. 14A-wen-dăɣ afăl kunta tăkasit-ten-dăɣ, alkum i-alămăr a-s ĕssĕbab-net, adiš ma infa immun s-Ɣisa Ălmasex ed, ărkăwăl-wa t-ăssitbătăn, ibbĕṭṭăl-in? 15Măšan, alămăr, wăr dd-itirĕw săr-năɣ ar aḍkăr n-Măssinăɣ ed, ĕnnăr wăr dd-ixlek, wăr-itĕmmĕl musnăt n-a-wa ămoos abăkkaḍ, wăr-itĕmmil dihen ere iwar uḍlem. 16Dăɣ-tĕssĕba n-a-wen-dăɣ a făl, ere wa omănăn s-Măssinăɣ ɣas a-s tĕtwar tăkasit-ten-dăɣ i-ad-tumas isuf ătiwăjjănen dăɣ-ănnuɣmăt-net. Ɣas, a-wen-dăɣ a dd-orăwăn a-s ărkăwăl wa ijjăš Măssinăɣ i-Ibrahim, oharăn-t dăr-s ihăyawăn-net iket-dăɣ-năsăn jer-wi ĕṭṭăfnen alămăr hakd wi omănnen s-Măssinăɣ s-ĕmmĕk wa s-săr-s omăn Ibrahim-i n-abba-nănăɣ iket-dăɣ-nănăɣ. 17Isălan n-a-wen-dăɣ a făl innă ĕlkĕttab n-Măssinăɣ: "Ibrahim, jeɣ-kăy abba n-abrĕk n-tiwsaten." Ɣas, Ibrahim-en-dăɣ dat-Măssinăɣ-i dd-isankarăn inĕmmuttan, ixallăk-dd a wărăn t-illa, a-s abba-nănăɣ dăɣ-tĕssĕba n-immun wa ija s-Măssinăɣ. 18Ibda, wăr t-illa ăṭṭăma ijar Ibrahim măšan, omăn s-Măssinăɣ ɣas, ikrăš-t. Tĕssĕba n-a-wen-dăɣ a făl t-ija Măssinăɣ: "Abba n-tiwsaten ăjjootnen", inn'-as: "Ad-ĕtĕyăn ihăyawăn-năk, agdăhăn d-etran." 19A-s ijă Măssinăɣ măjrăd-wen-dăɣ, ikn' Ibrahim tušăre, lămmeḍ hullan dăɣ-taɣĕssa-net ed ila temeḍe n-awătay măšan, wăr-ifneẓ immun-net. Sarăta daɣ i n-hănne-s, wăr tănmăjjaj d-a-wen, ăbas tĕjar ăṭṭăma n-ad-tĕkrĕš ara. 20Hakd a-wen-dăɣ, wăr-ifneẓ immun n-Ibrahim, wăr ij' ăššăk dăɣ-ărkăwăl wa has-ijjăš Măssinăɣ, ikf'-e immun-net ăṣṣahăt n-ad-iflĕs Măssinăɣ, ad-t-itĕmmal, 21ikkas ăššăk n-a-s ărkăwăl wa has-ijjăš Măssinăɣ, ad-t-ăj. 22Tĕssĕba n-a-wen-dăɣ a făl ikrăš idĕm ɣur-s, ăḍḍin jer-imaɣdalăn 23măšan, tifer-tin-dăɣ n-a-s ikrăš idĕm dat-Măssinăɣ, wădden ĕnta ɣas a-s ătwănnănăt, 24ătwănnănăt-anăɣ năkkăneḍ dăɣ-i ăsseḍăn Măssinăɣ dăɣ-imaɣdalăn dăɣ-tĕssĕba n-immun wa săr-s nĕja ĕnta-i dd-issĕnkărăn Emăli-nănăɣ Ɣisa jer-inĕmmuttan. 25Ǝnta-en-dăɣ a ămmun dăɣ-tĕssĕba n-timĕntal n-ibăkkaḍăn-nănăɣ tĕzzar, issĕnkăr-t-dd Măssinăɣ jer-inĕmmuttan i-ad-nĕkrĕš idĕm data-s.

will be added

X\