Kăl-Roma 3

1Adiš, ĕndek abăraj wa ihăn tumast n-ăgg-Ălyăhud? Meɣ daɣ: amili-i-dăɣ, ma infa? 2Ila tănfo măqqărăt ed kăl-Ălyăhud ĕntăneḍ a făll-dd-ăzzăbbăt Măssinăɣ măjrăd-net. 3Nĕssan a-s wăr has-ăsjădăn, ed, wăr-ămešălăn a-wa hasăn-innă măšan hakd a-wen-dăɣ, ajăn a-wen a hin-ăsibăṭṭălăn ălɣădalăt n-Măssinăɣ-hasăn? Ăbo, wăr-ămmukkăn a-wen ed, 4kunta dăgg-adĕm raẓẓăn dăɣ-tĕnna-năsăn, Măssinăɣ, tidĕt ɣas a t-dd-tĕffalăt s-ĕmmĕk wa s-tăn-innă ĕlkĕttab n-Măssinăɣ a-s innă: "Măssinăɣ, a innă-dăɣ, oɣad. Ere has-iškăn daɣ, ad-fălla-s ikrĕš tidĕt." 5Măšan, kunta iba n-iqqud-nănăɣ ĕnta, a iẓaẓharăn iqqud wa n-Măssinăɣ, ma nĕnnă dăɣ-a-wen? Ămăra, edăwănne wa ităjj ăgg-adĕm dăɣ-isĕstanăn-net a hawăn-tajjăɣ năkk-dăɣ. Ak ajăn Măssinăɣ-i-dăɣ, wăr-oɣed făl-a-s innin itakkăs dăɣ-năɣ ălxaqq? 6Aa făw ed ĕnnăr ha wăla-dăɣ tafrăɣt tiyyăt ɣas Măssinăɣ, ĕndek ĕmmĕk wa s-mad-išrăɣ ăddunya? 7Ămmukkăn a-s dăɣ-a-wa jănneɣ, ĕllan-t ăddinăt jannănen a-s: kunta bahu wa janneɣ, isinfilĕl-dd tidĕt i-ad-iwwaḍ semɣar făll-isĕm n-Măssinăɣ, adiš mafăl hi-itĕggar uḍlem, tumasăɣ anăsbăkkaḍ bănnan? 8Adiš šămad isălan ĕntăneḍ-den-dăɣ, nilbaset ɣas i-ad-dd-tarĕw tăllăbăst-nănăɣ-en-dăɣ imărkedăn. Tordam a-s bahu šund-wen-dăɣ, hălăɣ ad-t-sĕssăɣrăɣ. Ăddinăt wi tiwĕynen ănnămimatăn šund-win-dăɣ, iskar ăššăreɣa wa dăr-ănihăjjăn ɣur-Măssinăɣ. 9Adiš, ĕndek tidĕt dăɣ-a-wa-dăɣ? Ak, ajăn năkkăneḍ-i n-kăl-Ălyăhud, nufa ăddinăt wi iyyăḍnen? Ma n-ĕmmĕk? Ǝssĕjrăhăɣ-kăwăn-in a-s kăl-Ălyăhud hakd inĕẓẓulam, wăr-ĕẓleyăn, ănnihăḍ dăɣ-săn abăkkaḍ iket-dăɣ-năsăn. 10Isălan n-a-wen-dăɣ a dăɣ-hanăɣ-ăssewăl ĕlkĕttab n-Măssinăɣ a-s innă: "Wăr t-illa ăgg-adĕm oɣadăn, wăla-dăɣ iyyăn ɣas, 11wăr t-illa-i ijrahăn hărăt, wăla-i itattărăn ad-uksaḍ Măssinăɣ. 12Oškan iket-dăɣ-năsăn, wăr-ăɣnen hărăt, wăr tăn-iha wăla-dăɣ iyyăn ɣas itamašalăn a-wa olăɣăn. 13A-wa dd-izajjărăn imawăn-năsăn, ija mărkăhaw wa ija aẓĕkka ămerăn; ilsawăn-năsăn a-s saswadăn ăddinăt; a-wa jănnen s-iḍlay-năsăn, irn' ihărăynănăn n-emăjăl. 14Laqqănăn ăddinăt, sasmamăn fălla-săn s-a-wa dd-ijammăḍăn imawăn-năsăn, 15ărorădăn iji n-iman, 16edăgg ĕmmărăn-dăɣ, wăr dăɣ-s dd-tiyyĕn a săl ahălak d-ălmăṣṣibăt. 17A-wa s-itawănna tabarăt n-ălxer, wăr hen zăbo-net, 18wăr ha tuksĕḍa n-Măssinăɣ tiṭṭawen-năsăn." 19Nĕssan ya a-s a-wa innă alămăr wa n-Mosa iket-net, inn'-en i-ăddinăt ĕssannen s-alămăr-en, hakd a-wen-dăɣ, han-tăn-i ăsisăndărnen. A-wen, ădduuttăt i-ad-wăr-itĕmmil ăwadĕm itabărajăn dat-Măssinăɣ ed ăddunya iket-dăɣ-net, a iwar uḍlem dat-Măssinăɣ. 20A-wen ălmăɣna-net a-s wădden amišĕl n-a-wa innă alămăr a hanăɣ-ihakkăn idĕm dat-Măssinăɣ ed wăr t-ih' ăššăk a-s a-wa innă alămăr, indăr i-dăgg-adĕm ad-t-ămašălăn. Ǝnta-den-dăɣ a-wa ăssiitbătăn a-s ăgg-adĕm-i-dăɣ, tidĕt-dăɣ a-s anăsbăkkaḍ a ămoos. 21Ămăra, a-wa hanăɣ-ihakkăn idĕm dat-Măssinăɣ, ăsnăfalăl-anăɣ-t-dd. Iktab dăɣ-alămăr d-a-wa ĕnnăn ĕlkĕttabăn wi n-ănnăbităn, 22ăsdătten iket-dăɣ-năsăn a-s immun s-Ɣisa Ălmasex a ihakkăn imumĕnăn idĕm dat-Măssinăɣ, a-wen, wăr săr-s iẓley dăgg-adĕm. 23Dăgg-adĕm iket-dăɣ-năsăn a ofăn abăkkaḍ, ibḍ'-en a-wen d-ănnur n-Măssinăɣ 24măšan, hakd a-wen-dăɣ, iɣtăs Măssinăɣ dăɣ-ănnuɣmăt-net n-a-s ere omănăn s-Ɣisa Ălmasex-dăɣ, ad-ikrĕš idĕm dat-Măssinăɣ ed ămoos-as Ɣisa Ălmasex, Ămaɣlas wa has-in-inaššăn ibăkkaḍăn-net bănnan. 25Măssinăɣ dăɣ-tărha-net i-iqqud, ija Ɣisa tasĕbḍărt i-ad-isĕlmĕd s-iqqud, inɣăl ašni-net făll-tajĕttewt, ămmut dăɣ-idăggan-nănăɣ i-ad-iẓĕl ibăkkaḍăn-nănăɣ. Ibda, Măssinăɣ dăɣ-taẓidert-net, wăr-išreɣ ibăkkaḍăn wi ămešălăn ăddinăt 26măšan ămăra, takute n-tăfaṣke-ta-dăɣ ijă a hanăɣ-salmadăt s-iqqud n-a-wa ija, a-wen-dăɣ a hanăɣ-isalmadăn a-s ila tărna n-ad-ăkf idĕm dat-Măssinăɣ i-ere wa omănăn s-Ɣisa. 27Ǝndek ɣas a-wa dăɣ-mad-ăbbărăj ăgg-adĕm? Wăr t-illa ed ămăra, immun s-Ɣisa Ălmasex a iɣallăsăn wădden amišĕl n-a-wa ifrăḍ alămăr. 28Ǝnta-den-dăɣ a-wa hanăɣ-isawănnen a-s: immun a ihakkăn ăgg-adĕm idĕm dat-Măssinăɣ wădden amišĕl n-a-wa fălla-s ifrăḍ alămăr. 29Meɣ daɣ a tordam a-s Măssinăɣ-i-dăɣ, i n-kăl-Ălyăhud wădden in-inĕẓẓulam? 30I năsăn lab iket-dăɣ-năsăn ed Măssinăɣ, iyyăn ɣas, ĕnta a ihakkăn ere wa săr-s omănăn idĕm, tawset t-lăt-dăɣ, jer-ti n-kăl-Ălyăhud-i jănen amili hărăt wăla ti n-inĕẓẓulam-i wăren ĕja amili hărăt. 31Ajăn a-wen-š ălmăɣna-net a hin-ikkasăn alămăr wa n-ănnăbi Mosa făl-a-s innin nĕnna a-s immun a ih' ălfăyda? Ăbo, wăr nĕnnă a-wen, alămăr, ih' edăgg-net.

will be added

X\