Kăl-Roma 2

1Ăywa, kăyy-i isawarăn ăddinăt wi iyyăḍnen uḍlem, ere tămoosăd-dăɣ, ăbas hak t-illa ăsaru; dĕdi-dăɣ făw d-sawarăd ăddinăt wi iyyăḍnen uḍlem, ad-satbatăd a-s kăyy iman-năk, iwar-kăy uḍlem ed a-wa-dăɣ tăn-sawarăd a xaddămăd kăyy iman-năk. 2Wăr t-ih' ăššăk, nĕssan iket-dăɣ-nănăɣ, a-s ăddinăt wi tamašalnen hărătăn-win-dăɣ lăbasnen, ad-tăn-išrăɣ Măssinăɣ s-ăššăreɣa wăr-iha bahu. 3Uhĕn kăyy, ma ɣur-k ijan? Kăyy-i s-a-wa tăjjăd, i lăbasăn, sawarăd uḍlem ăddinăt, torded a-s ad-tăɣlĕsăd dăɣ-ăššăreɣa n-Măssinăɣ wa ilkămăn? 4Meɣ kăyy šăɣnet, wăr tĕssĕfrărăd tĕmɣăre n-milɣaw wa ija Măssinăɣ d-taẓidert-net d-marušăt-net? Ăniihăjja s-orăw-dd săr-k a-wen-dăɣ tămujriẓt, tutabăd. 5Măšan, kăyy wa hannăyăɣ, ăqqur ulh-năk, wăr tărhed ad-tutabăd. Ăššar ɣas n-Măssinăɣ a-s ilkam ad-t-dd-izĕzzĕbbĕt fălla-k ašăl wa n-aḍkăr-net d-ăššăreɣa-net wa oɣădăn. 6Ašăl-en, hak ăwadĕm d-a-wa has-jăn imojjan-net. 7Ăddinăt-wi ăkoyădnen dăɣ-amišĕl n-a-wa olăɣăn d-tĕmmal n-Măssinăɣ d-semɣar-net d-umăɣ i-tămudre ta n-tidĕt, ad-tăn-ăkf Măssinăɣ tămudre ta tăɣlălăt 8măšan, wi has-ăffullăgnen, ăssofnen iba n-iqqud uhĕn tidĕt, ad-tăn-isĕlmĕd a-s wăr has-ijreẓ ălxal-năsăn, izĕzzubbĕt-dd aḍkăr-net fălla-săn. 9Ad-tărmĕs tissust d-tiẓẓurt e d t-illăm ăgg-adĕm itamašalăn a lăbasăn, isănt a-wen s-kăl-Ălyăhud, akĕy s-tiwsaten ti iyyăḍnen n-inĕẓẓulam. 10Măšan, ăddinăt-wi tamašalnen a-wa olăɣăn, ad-ĕjrĕwăn semɣar d-tĕmmal d-ălxer ɣur-Măssinăɣ, isănt a-wen s-kăl-Ălyăhud, akĕy s-tiwsaten ti iyyăḍnen 11făl-a-s Măssinăɣ, wăr-ăẓmăẓlăy ăddinăt. 12Ăddinăt wi ofănen abăkkaḍ a-s ija a-wen ĕžhalăn i-a-wa innă alămăr n-Măssinăɣ wa dd-ăzzăbbăt făll-ănnăbi Mosa, ad-dd-ĕtwăɣrĕn s-ăššăreɣa ĕntăneḍ-dăɣ măšan, wăr mad-ĕtwĕšrăɣăn s-tijĕttewen ti n-alămăr-wen-dăɣ. Kăl-Ălyăhud-i ha tijya n-a-wa innă alămăr, wăr t-illa a hasăn-idrajăn dăɣ-s, tijĕttewen n-alămăr-en-dăɣ a-s tăn-e-išrăɣ Măssinăɣ. 13Wădden ăddinăt-wi sajadnen i-a-wa innă alămăr s-timĕẓẓujen-năsăn a he-ĕkrĕšnen idĕm ɣur-Măssinăɣ, ănn-ak, wi has-sajadnen s-ulhawăn-năsăn, tamašalăn a-wa dăɣ-s iktăbăn, a data-s-e-ĕkrĕšnen idĕm. 14Kunta tiwsaten ti n-inĕẓẓulam, wăr-ĕssennăt s-alămăr wa dd-ăzzăbbăt Măssinăɣ făll-ănnăbi Mosa, măšan tamašalnăt d-iman-năsnăt dăɣ-ălžăhalăt a-wa dăɣ-s ătwănnăn, ăssiilmăd-anăɣ a-wen-dăɣ a-s, ĕssannăt a-wa olăɣăn d-iman-năsnăt, ămešălnăt-t. 15Ǝnta-den-dăɣ a-wa hanăɣ-isalmadăn a-s a-wa innă alămăr n-Măssinăɣ, iktab-t dăɣ-ulhawăn-năsnăt i-ad-t-ămašălnăt, ăssiilmăd-tănăt daɣ ĕnniyăt-năsnăt săr-s, măqqăr daɣ iššaki wa jănăt dăɣ-iman-năsnăt, tănăt-isalmadăn s-išk wa jănăt kud-dăɣ dehiyyăn unjaynăt s-a-wen. 16Wăr t-illa a-s wădden ilkam ad-itbĕt, infilĕl-dd iket-dăɣ-net ašăl wa ilkămăn d-e-išrăɣ Măssinăɣ ăddinăt s-Ɣisa Ălmasex, isĕnnĕfilĕl-dd a-wa iffărăn dăɣ-ulhawăn n-dăgg-adĕm s-ĕmmĕk wa s-tăn-innă Ălĕnžil-i xaṭṭăbăɣ. 17Kăyy-i ijănnen ăgg-Ălyăhud a tămoosăd, tabărajăd n-a-s il'-ik Măssinăɣ, tăsifăllăd făll-a-wa s-tamašalăd a-wa innă alămăr wa n-Mosa, 18ija ɣur-k a-s tĕssanăd a-wa fălla-k irha Măssinăɣ, issĕlmăd-kăy alămăr jer-a-wa olăɣăn d-a-wa lăbasăn, 19tĕkkasăd ăššăk a-s ăddinăt wi iyyăḍnen, imĕddorɣal, kăyy a-s ămalway-năsăn, kăyy a-s ănnur i-wi ĕzzăɣnen dăɣ-tihay; 20tărhed tumast n-ălɣalim i-ălžuhal, emăssăɣăr n-aratăn, tĕflasăd iman-năk s-tidĕt ta kăy-issăɣra alămăr wa n-Mosa. 21Uhĕn kăyy-i s-hărkuk tĕmmaɣăd i-ere tĕssăɣrăd, ma s-hak-indar ad-săɣrĕd iman-năk? Xaṭṭăbăd i-ăddinăt iba n-tikra, a-s ija a-wen, tikĕrĕd; 22xaṭṭăbăd-asăn tăxărme n-ĕzzĕna, a-s ija a-wen, zinnud; janned-asăn, udaɣ ad-ɣabbădăn ăṣṣănămăn, a-s ija a-wen, tikĕrĕd a-wa ihăn ihănan wi dăɣ-ĕzzăɣăn ăṣṣănămăn-win-dăɣ, ad-t-in-žanšed. 23Tabărajăd n-a-s tĕssanăd alămăr wa n-Mosa, a-s ija a-wen, tănimăšrăyăd-as; ĕnta-den-dăɣ iba n-tuksĕḍa-năk i-Măssinăɣ. 24A-wen-dăɣ a făl inna ĕlkĕttab n-Măssinăɣ dăɣ-isălan n-kăl-Ălyăhud: "Tĕssĕba-năwăn kăwăneḍ-di-dăɣ a făl wăr-ătwăsămɣăr isĕm n-Măssinăɣ jer-inĕẓẓulam." 25Tidĕt, amili infa hărăt afăl itamašăl ăwadĕm a-wa fălla-s ifraḍ alămăr măšan, ere iraẓẓăn a-wa innă alămăr, wăr-iẓley amili-net d-iba-net 26făl-a-s, kunta ere wa wărăn ămelăy, ilkam i-a-wa ifrăḍ alămăr făll-ăgg-adĕm, ajăn wădden dat-Măssinăɣ, ad-ăbas iẓlay d-wa ămelăyăn. 27Kăwăneḍ, tĕssanăm a-wa fălla-wăn ifrăḍ alămăr, samalayăm iman-năwăn, a-s ija a-wen, wăr kăwăn-išla ar terăẓẓe n-a-wa fălla-wăn ifrăḍ alămăr, kunta inĕẓẓulam ĕntăneḍ, wăr sĕmilĕyăn iman-năsăn măšan, tamašalăn a-wa fălla-săn ifrăḍ alămăr, ĕntăneḍ-en-dăɣ a-s ilkam ad-kăwăn-sĕḍlĕmăn dat-Măssinăɣ, sĕkkĕrukĕḍăn-kăwăn. 28Săjdăt ămăra, tidĕt, ĕnta da: ăgg-Ălyăhud wa n-tidĕt, wădden ere iwar ešwăl ilan mănhoy wăla amili, ănn-ak, 29ămoos-t ere wa s-ăsmalăy Măssinăɣ ulh-net, wădden ere wa ɣur-ija a-s itamašal a-wa innă alămăr dăɣ-tăkarḍe-net. Ǝnta-den-dăɣ, ăgg-Ălyăhud wa n-tidĕt. Ḍarăt-a-wen daɣ, amili wa n-tidĕt, a t-ămoosăn a-wa ija Unfas Šăddijăn n-Măssinăɣ dăɣ-ulh n-ăgg-adĕm wădden hărăt n-taknĕsset jat dăɣ-taɣĕssa. Amili wa dd-orăw Unfas Šăddijăn s-ăgg-adĕm, kud irha wăr-ikreš idĕm dat-dăgg-adĕm, ad-t-ikrĕš dat-Măssinăɣ.

will be added

X\