Kăl-Roma 16

1Ăssiɣlăfăɣ-kăwăn Fibya ta n-wălătma-năɣ dăɣ-ăddin, tĕdhăl s-a ăjjeen ălkănisăt ta n-aɣrĕm wa n-Sinkĕrya. 2Afăl ašăl wa d-kăwăn-in-tosa, sĕbbărrĕkăt-tăt s-asĕbbărrĕk wa dăr-ăniihăjjăn imĕššeddĕjăn ilă Emăli, a-s tămɣatăr-dăɣ, ăkfăt-as-t. Sărho-net, ijmaḍ-t ăššăk a-s ănnuflăyăn dăɣ-s ăddinăt ăjjootnen heɣ năkk iman-in. 3Tăhuulăm-ah'-in Briska d-Akilas-i n-imadhalăn-in dăɣ-ălxidmăt wa nĕha i-Ɣisa Ălmasex. 4Irăš-asăn Măssinăɣ; jăn iman-năsăn dăɣ-miši i-ad-hi-ĕdhĕlăn. A-wen, wădden năkk ɣas a t-ijannen, jannen-t daɣ imumĕnăn wi hănen ălkănisăten ti n-tiwsaten ti iyyăḍnen. 5Tăhuulăm-ah'-in ălkănisăt ta tăžžămmaɣăt dăɣ-ehăn-năsăn. Tăhuulăm-ah'-in Ibăntus-i ĕkneɣ tărha, ĕnta-en-dăɣ a ăzzarăn s-immun s-Ălmasex dăɣ-teje ta n-Azya. 6Tăhuulăm-ah'-in Măryăma, tĕdgăẓ hullan dăɣ-ălxidmăt wa ha fălla-wăn. 7Tăhuulăm-ah'-in Idrinikus d-Yunya-i n-kăl-ăkall-in, kăla dăr-săn ohărăɣ takărmut. Meddĕn, a-wa ătiwăsămɣărnen jer-inĕmmušal, ăzzarăn-ahi immun s-Ălmasex. 8Tăhuulăm-ah'-in Ănbliyatus-i ĕkneɣ tărha dăɣ-Emăli. 9Tăhuulăm-ah'-in Urban wa n-ămadhal-in dăɣ-a-wa heɣ i-Ălmasex, ăhuulăɣ-in Stakis-i ĕkneɣ tărha. 10Tăhuulăm-ah'-in Ăbbelis, ănhăynăhăy dăɣ-immun-net, măšan, itbat. Tăhuulăm-ah'-in ehăn wa n-Aristubul. 11Tăhuulăm-ah'-in Haruddin-i n-ašăqqaɣ-in. Tăhuulăm-ah'-in imumĕnăn wi ila Emăli ĕzzăɣnen ehăn wa n-Narsisus. 12Tăhuulăm-ah'-in Trifina d-Trifusa, ĕdgăẓnăt hullan dăɣ-a-wa hănăt i-Emăli. Tăhuulăm-ah'-in Bărsidya ta n-wălătma-năɣ dăɣ-ăddin-i ĕkneɣ tărha dăɣ-Emăli, tĕdgăẓ ĕnta-dăɣ hullan dăɣ-a-wa ha i-Emăli. 13Tăhuulăm-ah'-in Rufus, ăhalĕs n-nefran n-Emăli a ămoos. ((Tăhuulăm-ah'-in daɣ ma-s-i wărăt tĕẓley d-ta-nin.)) 14Tăhuulăm-ah'-in Asinkiritus d-Fălɣun d-Armis d-Băṭrubbas d-Irmas d-ayĕtma-wi ĕzzăɣnen ɣur-săn. 15Tăhuulăm-ah'-in Făylalug d-Yulya. Tăhuulăm-ah'-in Nere d-wălătma-s ĕnta d-Olinbas d-imĕššeddĕjăn iket-năsăn wi t-ĕllănen ɣur-săn. 16Nĕmĕjjăt jer-iman-năwăn isofan n-tărha tĕmdat, ăhuulnăt-kăwăn-in ălkănisăten n-Ălmasex iket-dăɣ-năsnăt. 17Ayĕtma, ăsimătărăɣ-kăwăn d-ad-tagĕẓăm iman-năwăn dăɣ-ăddinăt-wi dd-tirĕwnen tăbĕḍḍawt jere-wăn, tattărăn ere ăšnămăšrăyăn. Ăddinăt-en, wăr-ĕlkemăn i-a-wa kăwăn-nĕssăɣra, sĕnnĕmĕjjĕjăt iman-năwăn dăr-săn s-iyyăt. 18Wădden Ălmasex-i n-Emăli-nănăɣ a-s ăxdamăn, a ăstărăjjen dăɣ-tisatten-năsăn ɣas a-s ĕmmaɣăn. Ǝkkan jer-ăddinăt wi s-wăr ikna immun-năsăn tenă/n/ne, takărrasăn-tăn s-tăẓude n-ilĕs d-tilăqqad. 19Kăwăneḍ, ăjjĕyhăn ăddinăt iket-dăɣ-năsăn a-s tĕssanăm a-wa hăm, sajadăm i-măjrăd n-Măssinăɣ. Ăddiweɣ hullan dăɣ-isălan-năwăn, siwĕḍăt hărwa făll-a-wen, tumasăm imĕssorha tamašalnen a-wa olăɣăn, wăr toseɣăm făw hărăt d-a-wa lăbasăn. 20Ǝlmĕdăt a-s Măssinăɣ-i n-Măssi-s n-ălxer, šik dăɣ a-s-e-ilkăẓ Iblis daw-iḍarăn-năwăn, ikf'-iwăn Emăli-nănăɣ Ɣisa ănnuɣmăt-net. 21Ăhuul-kăwăn-in Timoti-i n-ămadhal-in, ăhuul-kăwăn-in Lisyus d-Yasun d-Sosibăṭrus; dăgg-ăkall-in ĕntăneḍ-dăɣ. 22Năkk Tărtĕyas-i isaktab Bulĕs tăkarḍe-ta-dăɣ, ăhuulăɣ-kăwăn-in dăɣ-idĕm n-tassaɣt ta nĕja d-Emăli. 23Ăhuul-kăwăn-in Gayĕs-i ɣur-tizĕbbuɣ, ĕnta daɣ a ɣur-tažămmaɣ ălkănisăt. Ăhuul-kăwăn-in Irastus wa n-ănaẓraf n-aɣrĕm, ăhuul-kăwăn-in ă/n/na-năɣ Kartus. (( 24Ikf'-iwăn Emăli-nănăɣ Ɣisa Ălmasex ănnuɣmăt-net. Amin!)) 25Tĕmmal i-Măssinăɣ-i ilăn tărna n-ad-kăwăn-isĕṣṣuhĕt dăɣ-immun-năwăn s-ĕmmĕk wa s-t-xaṭṭăbăɣ dăɣ-Ălĕnžil-i ămoosăn măjrăd n-Ɣisa Ălmasex. Ălĕnžil, isălan-net, kăla ămoosăn ĕddăraj măšan, ăsnăfalăl-tăn-dd Măssinăɣ. 26Ašăl-i, isălan-en, ĕlmădăn săr-săn ăddinăt, ĕktăbăn-tăn daɣ ănnăbităn s-a-wa s-hasăn-omăr Măssinăɣ-i n-Amăɣlol. A-wa s-kăla iffăr dd-ănfalălăn, ăsnăfalăl-t-dd Măssinăɣ i-ad-isĕlmĕd tiwsaten ti n-inĕẓẓulam s-Ălĕnžil, amĕnnăt s-Ɣisa, ămašălnăt erhet n-Măssinăɣ. 27Măssinăɣ ɣas a-s Ămusăn. Namĕlet isĕm-net hărkuk dăɣ-ăddimmăt n-Ɣisa Ălmasex. Amin!

will be added

X\