Kăl-Roma 15

1Năkkăneḍ-i ăṣṣohătnen dăɣ-immun-nănăɣ s-Măssinăɣ, nĕšmăret i-wi s-rĕkkĕm wa-năsăn. Wăr nĕtumaset ăddinăt wăren zĕnĕzjumut ar dăɣ-iman wi-năsăn ɣas, 2ănn-ak, nĕdgĕẓet dăɣ-a-wa infăn ăddinăt wi iyyăḍnen i-ad-ĕṣṣuhun dăɣ-immun 3făl-a-s Ălmasex ya, wădden iman wi-net ɣas a dăɣ-ăznăzjamăt. Isălan-net ĕnta-en-dăɣ a dăɣ-innă ĕlkĕttab: "Innă Măssinăɣ: Ăddinăt wi kăy-gaggărnen, năkk, a gaggărăn." 4Ǝlkĕttabăn wi ărĕwnen, a-wa dăɣ-săn iktăbăn iket-net, iktab i-ad-hanăɣ-umas isĕkta hanăɣ-samătarnen i-ad-nĕšmăr dăɣ-alkum i-Măssinăɣ, ismaḍăn ulhawăn-nănăɣ, nĕkrĕš ăṭṭăma itbatăn. 5Măssinăɣ-i ihakkăn ĕššĕmurăt dăɣ-alkum-has, isasmaḍ ulhawăn, ăddoobăt ad-săr-năɣ dd-arĕw tanmĕnnak jer-iman-nănăɣ, nalăh d-Ɣisa Ălmasex. 6Afăl ija a-wen, ad-nĕṭṭĕf iyyăn n-ĕnniyăt, năqqayĕm nĕtĕmmal Măssinăɣ-i n-Abba-i dd-izjăr Emăli-nănăɣ Ɣisa Ălmasex. 7Nĕmăqbĕlăt jer-iman-năwăn s-ĕmmĕk wa s-kăwăn-iqbăl Ălmasex i-ad-itwĕsĕmɣăr isĕm n-Măssinăɣ. 8Tĕssanăm a-s Ălmasex, Măssinăɣ a t-dd-ăšmašălăn s-kăl-Ălyăhud i-ad-tăn-isĕlmĕd a-s ărkăwălăn wi ijjăš ibda i-imɣarăn-năsăn ĕnta a ɣur-dd-ĕmdăn, ĕnta a-s tasĕtbat-năsăn, Măssinăɣ daɣ, wăr-irăẓẓ dăɣ-tĕnna-net. 9S-tizarăt, kăl-Ălyăhud a-s dd-osa, tĕzzar, ĕlkămăn-asăn ăddinăt-wi iyyăḍnen wăren ămoos dăgg-Ălyăhud. A-wen, ij'-e Măssinăɣ i-ad-t-amĕlăn inĕẓẓulam dăɣ-tĕssĕba n-tăhanint-net s-ĕmmĕk wa s-tăn-innă ĕlkĕttab n-Măssinăɣ a-s innă: "Ad-kăy-amĕlăɣ jer-tiwsaten, itwĕsĕmɣăr isĕm-năk." 10Iktab daɣ a-s: "Ya tiwsaten! Ahărmăt tedăwit d-tamĕtte ta n-Emăli." 11Iktab daɣ a-s: "Ya tiwsaten! Amĕlmăt Emăli iket-dăɣ-năkmăt, ĕẓẓĕjmăt imăslan-năkmăt, tamĕlmăt-t." 12Isălan n-a-wen-dăɣ a dăɣ-innă ănnăbi Saya: "Ilkam ad-ikrĕš Yasa ahăya, ad-imnukĕl făll-tiwsaten n-ăddunya iket-dăɣ-năsnăt, ad-umas ăṭṭăma-năsnăt." 13Ikf'-iwăn Măssinăɣ-i s-ĕnta ɣas a isajarăn ăṭṭăma, isanăflay dăɣ-tedăwit d-ălxer dăɣ-ăddimmăt n-immun-năwăn i-ad-imɣar ăṭṭăma-năwăn săr-s s-tărna n-Unfas Šăddijăn. 14Ayĕtma-ɣ, ĕkkasăɣ ăššăk a-s tĕjlayăm dăɣ-a-wa hăm, wăr t-illa musnăt hin-toḍanăm, tăddoobem daɣ ad-tĕnmĕkfĕm ăddăbaratăn jer-iman-năwăn dăɣ-isălan n-immun. 15Măšan hakd a-wen-dăɣ, ijjăš-ahi-dd derhan n-ad-kăwăn-dd-sĕktoɣ hărătăn iyyăḍ s-hi-ikfa Măssinăɣ turhajăt-năsăn d-iba n-tasăja n-ad-hawăn-tăn-in-sĕssiwĕḍăɣ. 16Ǝnta a hi-ăsnăfrănăn dăɣ-ănnuɣmăt-net i-ad-umasăɣ akli n-Ɣisa Ălmasex ixdamăn jer-ăddinăt-wi wăren ămoos dăgg-Ălyăhud i-ad-tăn-săslăɣ Ălĕnžil n-Măssinăɣ ĕntăneḍ-dăɣ, umasăn šund takute ăššišdăj Unfas Šăddijăn, takute has-tĕjraẓăt. 17Abăraj-in, tassaɣt d-Ɣisa Ălmasex ed Măssinăɣ a hi-ijăn dăɣ-ămašal-wa-dăɣ. 18Kunta hannăyăm a-s hălăɣ măjrăd, ărheeɣ ad-tĕlmĕdăm a-s a-wa jănneɣ iket-net, jănneɣ-t dăɣ-isălan n-a-wa ija Ălmasex s-iman wi-nin jer-inĕẓẓulam i-ad-ămašălăn erhet n-Măssinăɣ. 19A-wen ij'-e Măssinăɣ s-a-wa xaṭṭăbăɣ d-a-wa tajjăɣ. Ăssewăḍ făll-a-wen a-s ikf'-ahi turhajăt s-tărna n-Unfas-net amišĕl n-ijităn n-Măssinăɣ d-hărătăn ăssuksăḍnen ăqqannen eɣăf. A dd-fălăɣ Yărussălăm har ăkall wa n-Ilirya, wăr t-illa edăgg s-wădden jeɣ dăɣ-s isălan n-Ălĕnžil n-Ălmasex. 20Dăɣ-iji n-isălan-en, jeɣ ittus i-iman-in n-a-s wăr sĕllĕnžeɣ ar idăggan wi s-kăla wăr ĕslen i-isĕm n-Ălmasex ed, wăr-ărheɣ ad-ădyăɣ făll-ăssas ăssinta ăwadĕm dat-i. 21Jeɣ a-wen dăɣ-ĕnniyăt n-ad-ămašălăɣ a-wa innă ĕlkĕttab n-Măssinăɣ a-s innă: "Wi s-wăr kăla ĕslăn i-isĕm-net, ad-t-ĕnhĕyăn; wi s-wăr kăla ĕslăn i-isălan-net, ad-t-ĕjrăhăn." 22Ǝnta-den-dăɣ a ija a-wa-dăɣ, a-wa hi-ikkăsăn ad-kăwăn-in-asăɣ. 23Ămăra, hannăyăɣ a-s ăbas hi-iṭṭaf hărăt dăɣ-idăggan-win-dăɣ, wăr-ărheɣ ɣas ămăra ar ad-kăwăn-in-ăkkăɣ ed a ilan iwĕtyan ăsidărhănăɣ a-wen, 24ĕnhĕyăɣ-kăwăn afăl ĕkkeɣ ăkall wa n-Isbanya. Dihen, afăl ĕkkăsăɣ tenere-năwăn, ad-hi-tĕjĕm ăddăbara s-hin-ăwwăḍăɣ siha s-ĕkkeɣ. 25Iket-di d-ităjj a-wen-dăɣ, ĕkkeɣ Yărussălam, ăwwayăɣ tirjit i-imĕššeddĕjăn wi t-ĕllănen dihen, tărmăs tămăɣatert. 26Ǝssăɣlăfăn-ahi imĕššeddĕjăn wi hănen ălkănisăten ti hănen tajiwen ti n-Masidunya d-Akaya tasĕssiwit jan i-ălmăssexităn wi n-kăl-Ălyăhud tărmăs tămăɣatert dăɣ-Yărussălăm. 27A-wa jăn, wădden ăwadĕm a hasăn-t-ăšhăššălăn, a tăn-dd-ikkasăn, ănihăjja daɣ a-wa jăn ed kunta imumĕnăn wi n-kăl-Ălyăhud, ĕntăneḍ a ăzozăynen Măssinăɣ i-inĕẓẓulam, ăniihăjja s-ămăra-dăɣ d-tăn-tărmăs tămăɣatert, kăwăneḍ a hasăn-tăt-itakkăsăn s-a-wa tĕṭṭăfăm. 28Afăl hin-ăssawăḍăɣ isălan-win-dăɣ har jeɣ tasĕssiwit-ten-dăɣ jer-ifassăn n-kăl-Yărussălam, ad-kăwăn-in-ĕmmărăɣ tĕzzar akĕyăɣ s-Isbanya. 29Ǝssanăɣ a-s a-s kăwăn-in-e-asăɣ, ad-hi-umas a-wen imraš ăjjootnen săr-i dd-oraw Ălmasex. 30Ayĕtma-ɣ, jeɣ-awăn idĕm Emăli-nănăɣ Ɣisa Ălmasex d-tărha ta ija Unfas Šăddijăn dăɣ-ulhawăn-nănăɣ, d-ad-tăqqaymĕm hin-tĕddalăm Măssinăɣ, tahĕrĕm dăr-i anmănɣ wa heɣ 31i-ad-dd-ĕzjărăɣ ifassăn n-inămăšrayăn wi hănen Ălyăhudĕyăt, tumas tadhĕlt ta ăwwăyăɣ i-imĕššeddĕjăn wi hănen Yărussălam ĕssĕbab n-tedăwit. 32Afăl otăs Măssinăɣ a-wen, a-s kăwăn-in-mad-asăɣ, ĕjraẓăn-ahi iman-in, ĕjrĕwăɣ ya s-ad-ăjăɣ išilan n-tăsonfat ɣur-wăn. 33Oyyeɣ-kăwăn d-ălxer n-Măssinăɣ. Amin!

will be added

X\