Kăl-Roma 14

1Ayĕtma-ɣ, ăwadĕm wa s-rĕkkĕm immun-net, arăt-as ifassăn-năwăn, wăr has-jem erk măjrăd. 2Ǝllan-t ăddinăt ordanen a-s wăr t-illa amĕnsi s-wădden ăddooben tetăte-net, ĕllan-t daɣ iyyăḍ s-rĕkkĕm immun-năsăn wăren tĕtt ar isudar wi n-išĕkraš. 3Ămăra, wăr-isămăḍrayet wa s-a ijrăw-dăɣ, ad-t-ăkš, wa iyyăḍăn igdălăn i-iman-net tetăte n-imĕnsiwăn iyyăḍ; wăr-isăwaret daɣ wa wărăn itĕtt hărăt iyyăn uḍlem ere wa s-a ijrăw-dăɣ, ad-t-ăkš ed ij'-as Măssinăɣ edăgg ĕnta-dăɣ. 4Ak kăyy făw-i isawarăn akli n-iyyăn uḍlem, mi tămoosăd? Ajăn wădden jer-ibdad wăla oḍa, măssi-s a iqqal a-wen, ma tăkkuulăd? Ǝlmĕd a-s ad-ibdĕd făll-iman-net ed Emăli-i t-illăn ila tărna n-ehel-net. 5Iyyăḍ ăddinăt, ija ɣur-săn a-s ill'-e ašăl ufăn iyyăn, ija ɣur-iyyăḍ a-s, a-di, wăr-ĕẓleyăn hărăt; ăyyăt hak ăwadĕm d-a-wa orda, igdăh ɣas ad-ikna ukĕs n-ăššăk dăɣ-a-wa iha. 6Wa ăẓinămăẓlăyăn išilan, iṭṭaf ălxal-wa dăɣ-ašăl-wa, iẓĕnnĕmĕẓlĕyet-tăn i-ad-isĕmɣăr Emăli s-a-wen; ere daɣ wa s-a ijrăw, ad-t-ăkš, isĕmɣăret Măssinăɣ ed a ijrăw-dăɣ, ad-irĕš i-Măssinăɣ isuf-win-dăɣ t-ija. Ere daɣ wa s-ill'-e a wăr-itĕtt, isamɣar Emăli dăɣ-a-wen-dăɣ ed ĕnta dăɣ, itumay i-Măssinăɣ a-wa has-ija. 7Wăr t-illa dăɣ-năɣ ere wărăn idder ar i-iman wi-net ɣas, wăr t-illa daɣ ere madăn-ămmăt i-iman wi-net ɣas. 8Ɣas kunta nĕddar, Emăli a-s nĕddar, kunta daɣ nămmut, ĕnta a-s nămmut. A-wen-dăɣ a făl jer-nĕddar wăla nămmut, Emăli a hanăɣ-ilăn. 9Wăr t-iha ăššăk a-s Ălmasex ămmut, inkăr-dd jer-inĕmmuttan i-ad-ixkĕm făll-inĕmmuttan hakd-dăɣ d-ăddinăt wi ĕddărnen. 10Adiš, kăyy, ma s-ḍallămăd ă/n/na-k, samăḍrayăt-t? Iket-dăɣ-nănăɣ, ilkam ad-dd-nĕbdĕd dat-Măssinăɣ i-ad-hanăɣ-išrăɣ? 11A-wen-dăɣ a dăɣ-hanăɣ-ăssewăl ĕlkĕttab n-Măssinăɣ a-s innă: "Innă Emăli: Năkk ĕddarăɣ, wăr t-illa ăgg-adĕm s-wădden ilkam ad-dat-i irkăɣ, ilkam ad-hi-amĕlăn iket-dăɣ-năsăn." 12Ašăl-en n-tebădde dat-Măssinăɣ, hak ăgg-adĕm d-a-wa has-jăn imojjan-net. 13Năyyet anmĕšraɣ jer-iman-nănăɣ, ĕṭṭĕfăt ĕnniyăt n-ad-wăr jem dat-ă/n/na-wăn a t-isijărtăqqilăn wăla a t-e-isiḍĕwĕn dăɣ-immun-net. 14Dăɣ-a-wa ordeɣ, a-wen daɣ torda săr-i dd-falăt Emăli Ɣisa, ĕkkasăɣ daɣ ăššăk dăɣ-a-wen, wăr t-illa făw a itamăkšen xăramăn, măšan afăl issăxrăm ăwadĕm hărăt i-iman-net, adiš, xăram-as. 15Kunta kăyy, tĕssĕba n-a itakkăn emm-năk a făl mad-šĕnnĕmšrĕyăd ă/n/na-k, adiš, ĕndek tărha dăɣ-a-wen? Wăr tăšnămăšrăyăd ă/n/na-k dăɣ-tĕssĕba n-a itakkăn emm ed ĕnta-dăɣ, tĕssĕba-net a dăɣ-ămmut Ălmasex. 16Wăr hawăn-itumaset hărăt tărham ĕssĕbab făl kăwăn-tiẓĕmĕn ăddinăt, ĕbḍĕwăt dăr-s 17ed, isălan wi n-Tĕmmĕnĕya n-Măssinăɣ, wădden isălan n-tetăte d-tesăse ɣas, isălan n-iqqud d-ălxer d-tedăwit s-tărna n-Unfas Šăddijăn. 18Ere wa itamašalăn erhet n-Ălmasex s-a-wen-dăɣ, ad-ijrĕẓ ălxal-net i-Măssinăɣ, ĕqqĕsăn-as dăgg-adĕm. 19Ayĕtma-ɣ, nĕdgĕẓet dăɣ-umăɣ n-ălxer d-anmĕdhal jer-iman-nănăɣ i-ad-nĕṣṣuhĕt dăɣ-immun-nănăɣ. 20Wăr-itumaset a itakkăn emm ĕssĕbab inaxxăsăn a-wa ija Măssinăɣ dăɣ-ulh n-ă/n/na-k. Ădduuttăt a-s wăr t-illa hărăt s-wădden šăddij măšan hakd a-wen-dăɣ uf'-ak, ad-tajĕlĕd hărăt uhĕn, ad-siḍĕwăd ă/n/na-k dăɣ-abăkkaḍ. 21Uf'-ak ad-tĕyyĕd fălla-k isan hakd-dăɣ asmĕd d-a-wa săl a-wen iket-net ăddooben ad-išĕnmĕšrĕy ă/n/na-k. 22A-wa dăɣ-tĕkkasăd ăššăk, ĕṭṭĕf-t jere-k d-Măssinăɣ, igdăh dihen-dăɣ. Tĕnḍĕḍ i-ere wa wărăn iššek iman-net dăɣ-ijităn-net. 23Ere wa ăssokăn hărăt emm-net uhĕn-dăɣ iššak iman-net, ăwadĕm-en, asiḍĕw ɣas a itajj iman-net dăɣ-ăššăreɣa n-Măssinăɣ. A ij' ăwadĕm-dăɣ, dăɣ-iššak iman-net, abăkkaḍ.

will be added

X\