Kăl-Roma 13

1Ilzam hak ăwadĕm ad-ămašăl a-wa s-omăr ĕlxĕkum ed wăr t-tĕlla tĕmmĕnĕya warăt ărori n-ăkall-i-dăɣ s-wădden a-wa la dăɣ-tărna Măssinăɣ a dd-ifal; ĕnta daɣ a tăt-ăssiibdădăn. 2Tĕssĕba n-a-wen-dăɣ a făl ere issĕkfărăn iman-net i-ĕlxĕkum n-ĕddĕwĕl, ilmĕdet a-s wăr-iẓley d-a-s tĕnna n-Măssinăɣ a-s ănmăšrăy. Ere daɣ wa ănmăšrăyăn i-a-wa innă Măssinăɣ, ijmaḍ-t ăššăk a-s, tăborit n-ăššăreɣa n-Măssinăɣ a-s irha ad-tiḍĕw fălla-s. 3Ăwadĕm wa itamašalăn a lăbasăn, a ăssirmăɣăn ălqa/l/lităn, măšan wa itamašalăn a olaɣăn, wăr t-e-sărmăɣăn. Kunta tărhed ad-wăr kăy-issărmăɣ ĕlxĕkum, adiš mašăl a-wa fălla-k irha, dihen, ad-ɣur-s tĕkrĕšăd tisenen. 4Ǝlxĕkum, tănfo-năk a făl t-dd-ixlăk Măssinăɣ, măšan afăl wăr kăy-išla ar a-wa lăbasăn, adiš uksaḍ-t ed wădden bănnan a făl iṭṭaf tăborit ta n-ăššăreɣa. A-wen ălmăɣna-net, a-s, ilkam ad-dd-isĕnnĕfilĕl Măssinăɣ aḍkăr-net făll-wi tamašalnen a-wa lăbasăn. 5Uf'-awăn ad-tamašalăm a-wa fălla-wăn irha ĕlxĕkum wădden ɣas făl tuksĕḍa n-ad-fălla-wăn isiḍĕw Măssinăɣ aḍkăr-net, ănn-ak daɣ, i-ad-wăr t-illa făw a dăɣ-tĕššakăm iman-năwăn. 6Tĕssĕba n-a-wen-dăɣ a făl ɣaymăt tĕẓẓalăm tiwse ed kăl-tiwse-i dăɣ-wăn tăt-tattărnen, wăr-iẓley d-a-s Măssinăɣ a-s ăxdamăn. 7Hak ăwadĕm, ăkfăt-t a-wa fălla-wăn ila jer-tiwse wăla ăddăyyăt wăla tuksĕḍa wăla semɣar. 8Ayĕtma-ɣ, wăr kăwăn-irăwwăset ăwadĕm wăl' iyyăn a săl tărha. Ere wa s-ha tărha n-ăddinăt ulh-net, ăzizăbbăt ămišĕl n-a-wa fălla-s ifrăḍ alămăr iket-net. 9Wădden ătwănnă: "Wăr jed ĕzzĕna, wăr jed iman, wăr tokerăd, wăr tăsdărhănăd a ila ăwadĕm wăr led", d-a-wa săl a-wen. Alămărăn-win-dăɣ, ăsdăw-tăn-dd iket-dăɣ-năsăn wa innăn: "Ăj i-ănhăraj-năk tărha-ta-dăɣ jed i-iman-năk." 10Tărha, ere wa s-ha ulh-net, wăr mad-iɣšĕd hărăt i-ănhăraj-net. Ăwadĕm daɣ wa s-ha tărha n-ăddinăt wi iyyăḍnen ulh-net, šund ɣas ăzizăbbăt a-wa innă Măssinăɣ dăɣ-alămăr. 11Măjrăd-wa-dăɣ, ăjăt-as ĕnniyăt ed tĕh'-iwăn tijya n-ăzzăman a nĕha, ăbas ija ăssaɣăt n-eḍĕs, ĕnkărăt-dd. Ašăl wa n-ĕlɣĕllas, ăbas ujĕj, ojăr ihĕẓ wa dd-ija ašăl-i-dăɣ uhĕn ašăl wa d-tomănăm. 12Ehăḍ iglă, tifawt, tăsmăqqăt-dd, nĕkkĕset-in făll-iman-nănăɣ a-wa osăɣăn hărăt d-tihay, nasăɣet d-a-wa ohărăn hărăt d-ănnur. 13Nărjĕšet šund tarăhut a făll-anăɣ ijan, tumaset tămudre-nănăɣ, tămudre šăddiijăt s-wăr t-illa a nĕtajj dăɣ-ufăr, najĕjet iba n-asĕgdah dăɣ-hărăt d-tesăse n-asmĕd d-asri wa n-kĕššĕf d-asĕmmăḍĕs n-iman-nănăɣ d-hărăt n-kĕnis-kĕnisăn iyyăḍ wăren ĕnfa hărăt d-tismiten. 14Tumaset-awăn tămudre ta iṭṭăf Emăli Ɣisa Ălmasex šund asălso ăynayăn, ălsăt-t. Wăr tăsbălălăm erk derhanăn n-tiɣĕswen-nănăɣ, tiyyĕm-tăn ănnihăḍăn dăɣ-wăn.

will be added

X\