Kăl-Roma 12

1Ayĕtma-ɣ! Jarăɣ-kăwăn s-idĕm n-tĕmɣăre n-tăhanint ta hanăɣ-oḍăn Măssinăɣ, ăkfăt-t iman-nawăn dăɣ-tiɣĕswen-năwăn iket-di tĕddarăm s-ălxal šaddijăn, ĕnta-den-dăɣ takute ta has-tĕjrăẓăt, ĕnta-den-dăɣ ălɣibadăt wa n-tidĕt. 2Wăr tĕlkemăm i-a-wa făll-tĕgl' ăddunya-ta-dăɣ, ănn-ak ăyyăt Măssinăɣ ad-isĕynĕy ĕnniyătăn-năwăn i-ad-tudabem aẓĕmmăẓli dăɣ-a-wa ămoosăn erhet-net, wa olăɣăn, a-wa has-ijrăẓăn d-a-wa ifrănăn. 3Ǝttarăɣ dăɣ-hak iyyăn dăɣ-wăn dăɣ-idĕm n-ănnuɣmăt wa făll-i issĕnsă Măssinăɣ d-ad-wăr-ija wăl' iyyăn dăɣ-wăn iman-net jĕnnĕj-a-wa t-ija Măssinăɣ. Isărĕset hak iyyăn iman-net dat-amidi-net s-a-wa ilăn ĕmmĕk. A-wa s-kăwăn-ikfă Măssinăɣ turhajăt n-iji-net, ăjăt-t s-a-wa dăr-ogdăh immun-năwăn. 4Wădden taɣĕssa n-ăgg-adĕm tiyyăt ɣas măšan, ĕjjĕtnăt tiẓunawen-net, hakd a-wen-dăɣ, wăr t-tĕlla tăẓunt tolăhăt d-tamidit-net ălxidmăt, hak iyyăt d-a-wa tĕnfa. 5Ǝmmĕk-wen-dăɣ a-s năkkăneḍ-i omănnen s-Măssinăɣ, nĕjjĕt, măšan dăɣ-tĕssĕba n-tassaɣt-nănăɣ d-Ălmasex, nămoos šund tiyyăt taɣĕssa s-hak iyyăn dăɣ-năɣ-dăɣ ănimăṭṭaf d-amidi-net. 6Măssinăɣ, dăɣ-ănnuɣmăt-net, ij'-anăɣ isuf s-hak iyyăn-dăɣ iẓlay d-wa n-amidi-net. A-wen-dăɣ a făl wa ijrăwăn ɣur-Măssinăɣ măjrăd s-ila s-ad-t-isuɣĕl i-ăddinăt, ixṭĕbet s-ălxal wa ihălăn ebre n-immun. 7Wa ijrawăn ɣur-Măssinăɣ turhajăt n-ad-idhĕl ăddinăt wi iyyăḍnen, ijlĕyet dăɣ-a-wen; wa isăɣren, isăɣret s-sărho. 8Wa ijrăwăn turhajăt n-a-s e-d immĕjrăd, isĕsmăḍ ulhawăn n-imidiwăn-net, išlĕwet-t a-wen; wa ijrăwăn turhajăt n-ihuk, wăr-itĕmĕjruẓet a-wa ikfa; wa ikfă Măssinăɣ turhajăt n-ad-izar i-ăddinăt, ijlĕyet dăɣ-a-wen. Wa n-ămadhal n-tilăqqiwen, idhĕlet-tănăt s-ulh ăsriiwăn. 9Tărha ta n-tidĕt, wăr ɣĕddăr, akĕḍăt d-a-wa lăbasăn, ĕjlĕyăt hullan dăɣ-amišĕl n-a-wa olăɣăn. 10Nĕmărhăt hullan jer-iman-năwăn šund ă/n/natăn, nĕsĕmɣărăt, zăzrăt ăddinăt wi iyyăḍnen iman-năwăn. 11Ǝdgĕẓăt dăɣ-a-wa hăm, ăyyăt fălla-wăn sendad, ukasăt dăɣ-ălxidmăt n-Emăli s-ĕnniyăt imdan. 12Isĕddĕwĕtet-kăwăn ăṭṭăma wa kăwăn-ăsjăr Măssinăɣ, ijjĕšet-kăwăn ăṣṣăbarăt afăl kăwăn-tărmăs tissust, ĕjlĕyăt dăɣ-tamădilt n-Măssinăɣ. 13Imĕššeddĕjăn wi tărmas tămăɣatert, ĕdhĕlăt-tăn, sĕmmĕjurĕtăt wi kăwăn-dd-tisĕnen. 14Ǝdĕlăt Măssinăɣ i-ăddinăt-wi kăwăn-ɣazzăbnen, ărhăt-asăn ălxer, wăr hasăn-jem terk tettert. 15Ahrăt tedăwit d-wi ăddiwătnen, tahĕrĕm imeṭṭawăn d-wi hallănen. 16Nĕmĕnnĕkăt jer-iman-năwăn s-ălxal, wăr tĕtterăm a-wa dăr-wăr togdehăm wăla a-wa wăr tămoosăm, sărĕsăt iman-năwăn, wăr jem iman-năwăn ăddinăt s-wăr t-illa a-s wădden ĕssanăn-t. 17Wăr ẓelăm tăllăbăst s-tăllăbăst i-ăwadĕm, mašălăt a-wa olăɣăn i-ăddinăt iket-năsăn. 18A tĕkkăs talɣa, tăqqal-kăwăn-dd, imĕlet ălxer jere-wăn d-ăddinăt iket-năsăn. 19Ayĕtma-i ĕkneɣ tărha, wăr tĕkkesăm eɣa i-iman-năwăn, săɣlĕfăt talɣa-năwăn i-Măssinăɣ ed Emăli iman-net innă dăɣ-ĕlkĕttab-net: "Năkk a hawăn-e-ikkĕsăn eɣa, năkk a hawăn-e-ikkĕsăn ălxăr." 20Olăs daɣ, inn'-anăɣ măjrăd n-Măssinăɣ: "Ašănjo-năk wa inăqq laẓ, šăkš'-e; kunta ăffud, săsw'-e ed afăl has-jed a-wen, ad-t-tănɣ tăkrakiḍt wărăt tĕẓley d-a-s tahĕst a jed făll-eɣăf-net." 21Wăr toyyed tăllăbăst tĕkraš fălla-k ašăl, ănn-ak, mišĕl a-wa olăɣăn i-ad-tĕkrĕšăd ašăl făll-tăllăbăst.

will be added

X\