Kăl-Roma 11

1Ăssistănăɣ-kăwăn ămăra, ak ajăn Măssinăɣ ijăr-in tamĕtte ta n-kăl-Iṣrayil ăsnăfrăn? Ăbo! Năkk-i hawăn-ăssewălăn, ăgg-Iṣrayil n-ahăya n-Ibrahim la tawset ta n-Bănyamin a ămoosăɣ. 2Măssinăɣ, tawset ta ăsnăfrăn i-iman-net hărwa wăr dd-tăxlek ăddunya, wăr tăt-in-ijer. Ǝktĕwăt-dd ɣas a-wa innă ănnăbi Ɣĕli dăɣ-isălan n-kăl-Iṣrayil a-s hasăn-iškă s-Măssinăɣ, inn'-as: 3"Emăli, tamĕtte-ta-hi, tănɣă ănnăbităn-năk, tărẓă idăggan wi dăɣ-tajjănăt tikutawen-năk. Năkk daɣ-i dd-ăqqimăn, tĕzzan săr-i, tărha ad-tăj iman-in." 4Innă a-wen ɣas, inn'-as Măssinăɣ: "Ɣĕli, ănset ĕnniyăt-năk, leɣ ĕssa afḍăn n-ăhalĕs wăr-iha wăl' iyyăn s-kăla irkăɣ dat-Baal-i n-ămănokal n-ăṣṣănămăn." 5A-wa ijăn dăɣ-ăzzăman-wen-dăɣ, ĕnta daɣ a ijan dăɣ-ăzzăman-wa-dăɣ, iɣlaf Măssinăɣ dăɣ-ănnuɣmăt-net tamĕtte wărăt tĕjjĕt dd-ăsinăfrăn jer-kăl-Iṣrayil. 6Šămad ănnuɣmăt n-Măssinăɣ a ăsnăfrănăn tamĕtte-ten-dăɣ i-ad-tăt-iɣlĕs, adiš, wădden imărkedăn-năsăn a tăn-e-iɣlĕsăn ed, afăl ija a-wen, ad-ăbas ămoos ănnuɣmăt, ănnuɣmăt wa n-tidĕt. 7A-wen-š, ma ămoos ălmăɣna-net? Ajăn a-wa s-ĕmmăɣăn kăl-Iṣrayil, wăr t-ĕjrewăn? Ǝjrăwăn-t dăɣ-săn lab wi dăɣ-săn ăsnăfrăn Măssinăɣ. Wi iyyăḍnen wăren ĕjrew a-wen, asɣăr a has-jăn ulhawăn-năsăn. 8Isălan n-a-wen-dăɣ a dăɣ-innă ĕlkĕttab n-Măssinăɣ: "Iššĕšlăl-tăn-in Măssinăɣ i-ad-wăr hĕnnĕyăn, wăr sĕllĕn. Ǝnta-den-dăɣ a-wa ijrăwăn kăl-Iṣrayil har ašăl-i-dăɣ." 9Olăs daɣ ḍarăt-a-wen, innă ănnăbi Dawĕd: "Umasnet imjora-năsăn a hasăn-iha sunsĕj, ăttărmăsnet dăɣ-tănḍărbaten; iḍĕwet-dd fălla-săn ălmăṣṣibăt tăn-in-immărăn. 10Tĕwăret tĕmĕlle tiṭṭawen-năsăn i-ad-ăbas hannăyăn, ăjĕnet alĕḍḍeš wa-dăɣ făll-hak iyyăn dăɣ-săn, umaset ɣas, šund ăẓuk a ăllinjăt." 11Ak ejăḍăl wa jăn kăl-Iṣrayil, i n-hărkuk meɣ? Ăbo! Ănn-ak šăɣšad-năsăn ĕntăneḍ-en-dăɣ a dd-orăwăn tašlĕlt i-ĕlɣĕllas i-tiwsaten ti iyyăḍnen i-ad-asĕmĕn kăl-Iṣrayil. 12Ɣas kunta wăla šăɣšad-năsăn dăɣ, ălfăyda a dd-orăw s-ăddunya, ăb' ăṭṭăma n-tĕmɣăre ta he-ăj ălfăyda wa săr-s dd-e-arĕwăn afăl dd-ĕqqălăn Măssinăɣ i-ad-utabăn. Ijmaḍ-t ăššăk a-s ad-umas a-wen ălxer măqqoorăn. 13Ămăra kăwăneḍ-i n-inĕẓẓulam a-s ămmijrădăɣ: Năkk-i-hi, Măssinăɣ a hi-ijăn ănămmašul-hawăn, išl'-ahi daɣ ămašal hi-ijraẓăn. 14Ija ɣur-i a-s ămašal wa hi-issăɣlăf Măssinăɣ ija tĕmɣăre-ta-dăɣ s-afăl t-in-ăssawăḍăɣ, ad-dd-arĕw a-wen tismiten n-kăl-tumast-in, utabăn, iɣlĕs Măssinăɣ iyyăḍ dăɣ-săn 15făl-a-s, kunta ămăra, ij'-en Măssinăɣ s-edes i-ad-dd-arĕw a-wen tanmĕẓalt n-ăddunya d-Măssinăɣ, ma he-ăj afăl ătubăn kăl-Iṣrayil? Ad-umas a-wen tăkunt tolăhăt d-ăddinăt ăba, olăsăn-dd tanăkra jer-inĕmmuttan. 16Kunta afărs n-tajĕlla wa n-eɣăf a ikăt ăwadĕm i-Măssinăɣ, adiš tajĕlla daɣ, iket-net ti-net ed šăddiij. A-wen-dăɣ a ijăn a-s kunta ikewăn n-ahĕšk, i n-Măssinăɣ, adiš, ilĕktan-net daɣ, iket-năsăn, i-net ed šăddiij. 17Tamĕtte ta n-Iṣrayil, tolăh d-ahĕšk n-ĕzzăytun s-hin-inkăḍ Măssinăɣ hărăt dăɣ-ilĕktan-net tĕzzar issărmăm-kăy-dd kăyy-i wărăn ămoos ăgg-Ălyăhud i-ad-kăy-infĕw kăyy-dăɣ a-wa dd-itĕffalăn ikewăn, isidorăn ahĕšk iket-net. 18Tĕssĕba n-a-wen-dăɣ a făl, kăyy-i n-ănăẓẓalim, he kăyy! Wăr tĕlkehăd ilĕktan wi hin-ĕttĕnkăḍnen. Ma dăɣ-tabărajăd? Wădden kăyy a iṭṭafăn tămudre i-ikewăn, ănn-ak, ikewăn a hak-tăt-ĕṭṭafnen. 19Ămmukkăn a-s ad-hi-tĕnnĕd a-s: ajăn wădden ilĕktan, ĕttĕnkăḍăn-in i-ad-dd-ĕtwĕsărmămăɣ dăɣ-edăgg-năsăn? 20Tidĕt lab a-wen măšan, ĕlmĕd a-s iba n-immun-năsăn a făl hin-ĕttĕnkăḍăn, tătwăsărmămăd-dd dăɣ-edăgg-năsăn ed tomănăd. Ɣas, wăr sakaf iman-năk, uksaḍ Măssinăɣ! 21Făl-a-s Măssinăɣ wăr-oyya ilĕktan-wi s-alăṣăl-dăɣ, ărmamăn d-ahĕšk ăb' ăṭṭăma n-kăyy-i s-a ăynayăn dd-tĕjjăšăd a-wa-dăɣ iket-net. 22Ǝnhĕywăt ɣas ĕmmĕk wa s-isalmad Măssinăɣ milɣaw-net wa ăddewăn d-aḍkăr-net: wi t-wăren ăksuḍ, ad-ĕnmĕnhĕyăn d-ălmăṣṣibăt-net, wi t-ăksuḍnen, ad-ăɣlĕsăn dăɣ-ăššar-net. Ɣas, ăj ăṭṭăma-năk dăɣ-milɣaw n-Măssinăɣ ed afăl wăr jed a-wen, ad-hin-tăttănkăḍăd šund elăkăt. 23Afăl dd-ĕzjărăn kăl-Ălyăhud tăɣart n-ulh ta tăn-tărmăsăt, ad-ĕtwĕsărmĕmăn dăɣ-edăgg-năsăn ed Măssinăɣ ila tărna s-tăn-dd-ăssoɣăl idăggan-năsăn. 24Kăyy ibda, wăr tĕẓleyăd d-elăkăt irmamăn dăɣ-ahĕšk n-tăkoyt, tătwănkăḍăd-dd fălla-s, tătwăsărmămăd dăɣ-ahĕšk n-ĕzzăytun olaɣăn kud-dăɣ a-wen, ĕssin ihĕškan wăren oleh iyyăn n-ĕẓẓĕnĕf. Kăl-Iṣrayil-i s-alăṣăl-dăɣ ărmamăn d-ahĕšk-en, răqqiis i-Măssinăɣ, ad-tăn-dd-isuɣĕl edăgg-năsăn. 25Ayĕtma, ĕkkasăɣ-kăwăn dăɣ-taɣdărt dăɣ-isălan n-ĕddăraj wa s-kăla ăttunkăl dd-ănfalălăn i-ad-wăr tordem iman-năwăn tayĕtte. Ǝlmĕdăt a-s tăɣart n-ulh ta tărmăsăt tĕššĕm n-kăl-Iṣrayil ămăra-dăɣ, ti n-ad-dd-ĕjjĕšnăt tiwsaten ti iyyăḍnen iket-dăɣ-năsnăt, amĕnnăt s Măssinăɣ, iɣlĕs-tănăt. 26Ǝnta-den-dăɣ ĕmmĕk wa s-mad-ĕɣlĕsăn kăl-Iṣrayil iket-dăɣ-năsăn s-ĕmmĕk wa s-tăn-innă ĕlkĕttab n-Măssinăɣ a-s innă: "Taḍaɣt ta n-Sayon ad-dd-e-ifĕl ămukăs n-tekăriḍt wa hin-e-ikkĕsăn iba n-ăddin făll-ihăyawăn n-Yaqub. 27Dihen, ad-dăr-săn ahărăɣ ărkăwăl n-tassaɣt, amĕsăɣ-in ibăkkaḍăn-năsăn iket-dăɣ-năsăn." 28Afăl tăqqăl tanfust s-isălan n-anmĕšri wa jăn i-Ălĕnžil, ij'-en a-wen-dăɣ išĕnja n-Măssinăɣ iket-dăɣ-năsăn, măšan ămoos-awăn a-wen kăwăneḍ, tănfo măšan, afăl tăqqăl tanfust s-ebre n-nefran wa n-Măssinăɣ, iṭṭaf-asăn ărkăwăl dăɣ-idĕm n-imărawăn-năsăn 29ed Măssinăɣ, wăr-ităqqĕl s-a-wa ikfă, wăr-ităqqĕl s-ămašal-net. 30Ibda, tăḍḍinăm dăɣ-inămăšrayăn măšan ašăl-i, tĕlmădăm s-tăhanint n-Măssinăɣ ed ănmăšrăyăn kăl-Ălyăhud. 31Anmĕšri-năsăn ad-dd-orăwăn tăhanint-ten-dăɣ dăɣ-a-s irha Măssinăɣ ad-ămarĕnăt tiṭṭawen-năsăn i-ad-ĕlmĕdăn ĕntăneḍ-dăɣ ămăra s-tăhanint-net. 32Măssinăɣ a oyyăn dăgg-adĕm oḍan dăɣ-tanmĕšrayt i-ad-isĕlmĕd hak iyyăn dăɣ-săn s-tăhanint-net. 33Isălan n-a-wen-dăɣ a dăɣ-ăssewăl ĕlkĕttab n-Măssinăɣ a-s innă: "Tĕmɣăre n-tihusay ij'-enăt ărrĕzăɣ wa n-Măssinăɣ Mi ăddoben ad-dd-isăɣlĕy sărho-net wăla tayĕtte-net A-wa ităjj, ojăr tayĕtte n-ăgg-adĕm, wăr t-illa ere dd-e-isăɣlĕyăn zăbotăn-net. 34Mi issanăn a-wa ihăn ĕnniyăt n-Emăli? 35Mi s-kăla t-ikfa hărăt ăb' ăṭṭăma n-ad-ijăr ăṭṭăma n-timẓal n-ălxer-net?" 36Wăr t-illa ed ĕnta a dd-ibnăn a-wa-dăɣ iket-net, tărna-net a-s t-illa a-wa t-illăn, wăr t-illa a-s wădden i-net. Ǝnta ɣas a ăniihăjjăn d-semɣar hărkuk. Amin!

will be added

X\