Kăl-Roma 10

1Ayĕtma-ɣ, derhan n-ulh-in d-a-wa tattărăɣ hak ašăl dăɣ-Măssinăɣ da: ăɣlĕsnet kăl-Iṣrayil. 2Ăddoobeɣ tajuhe n-a-s kăl-Iṣrayil, ĕdgaẓăn hullan dăɣ-isălan wi n-Măssinăɣ măšan, wăr jen a-wen s-ĕnniyăt ijrahăn hărăt. 3Ǝžhalăn hărwa dăɣ-isălan n-a-s Măssinăɣ a isaɣdalăn ăgg-adĕm i-ad-ɣur-s ikrĕš idĕm wădden imărkedăn-net, a-wen, unjăyăn săr-s. 4Ălmasex, a ɣur-dd-imdă a-wa innă alămăr, ere săr-s omănăn-dăɣ, ad-ikrĕš idĕm dat-Măssinăɣ. 5Dăɣ-isălan n-a-wa ihakkăn ăgg-adĕm idĕm dat-Măssinăɣ, innă Mosa: "Ere ămešălăn fărĕḍăn wi ĕktăbnen dăɣ-alămăr, ad-has-umas a-wen-dăɣ ĕssĕbab n-ĕlɣĕllas." 6Măšan ašăl-i, immun-nănăɣ s-Măssinăɣ, issĕlmăd-anăɣ a-wa hanăɣ-ihakkăn idĕm dat-Măssinăɣ, inn'-anăɣ: "Wăr tĕnned dăɣ-iman-năk: mi he-ikkĕn išĕnnawăn?" A-wen, azĕzzĕbbu n-Ălmasex dăɣ-săn; 7wăr tĕnned daɣ: "Mi he-ikkĕn ider n-ăkall?" Ajăn wădden Ălmasex, ăru dd-inkăr jer-inĕmmuttan. 8Isălan n-a-wen-dăɣ, a dăɣ-hanăɣ-innă măjrăd n-Măssinăɣ: "Ašăl-i, măjrăd n-Măssinăɣ, ohaẓ-kăy, ih'-emm-năk, ih'-ulh-năk." Isălan-win-dăɣ a hin-nĕsasawaḍ dăgg-adĕm i-ad-amĕnăn s-Ɣisa. 9Ere iṭṭăfăn dăɣ-tămudre-net tĕnna n-a-s Ɣisa, Emăli, iflăs dăɣ-ulh-net a-s issĕnkăr-t-dd Măssinăɣ jer-inĕmmuttan, ad-iɣlĕs 10făl-a-s immun wa dd-ifălăn ulh n-ăwadĕm a t-ihakkăn idĕm ɣur-Măssinăɣ, wa iṭṭăfăn tĕnna n-a-wen s-emm-net, ad-t-iɣlĕs Măssinăɣ. 11Ǝnta-den-dăɣ a-wa innă ĕlkĕttab n-Măssinăɣ a-s innă: "Ere omănăn s-Emăli-dăɣ, wăr-ilkem ad-ămmujrăẓ." 12A-wen ămăra, wăr săr-s iẓley ăgg-Ălyăhud wăla wa t-wărăn ămoos ed iket-năsăn, iyyăn n-Emăli ihakkăn a olaɣăn s-ĕjut a oharăn, ere t-iɣrăn-dăɣ, ad-has-ăkawĕn. 13Iktab a-s: "Ere iɣrăn isĕm n-Emăli, omăn săr-s dăɣ, ad-iɣlĕs." 14Măšan, ăddinăt ya, ĕndek ĕmmĕk wa s-mad-ĕɣrĕn isĕm n-Emăli a-s wăr săr-s omenăn? Ǝndek daɣ ĕmmĕk wa s-mad-săr-s amĕnăn a-s wăr kăla ĕslăn i-isălan-net? Ǝndek ĕmmĕk wa s-mad-ĕslĕn i-isălan-net a-s wăr t-illa ere hasăn-tăn-ixṭăbăn? 15Ǝndek ĕmmĕk wa s-mad-hasăn-ĕtwăxṭĕbăn a-s wăr t-illa ere săr-săn ămešălăn? Tĕssĕba n-a-wen-dăɣ a făl innă ĕlkĕttab n-Măssinăɣ: "Tihusay ija ass n-imawayăn n-isălan n-Ălĕnžil, edăgg ăkokălăn iḍarăn-năsăn dăɣ, ălxer a săr-s dd-tirĕwăn." 16Ălwăxla a-s a ăjjeen dăɣ-ăddinăt, unjay s-Ălĕnžil. A-wen-dăɣ a ăswănnăn ănnăbi Saya: "Emăli, a ija a-wa-dăɣ năssewăl, mi omănăn s-a-wa nĕxattăb?" 17Immun wa iɣallăsăn, a-wa s-isăl ăwadĕm ihăn Ălĕnžil-wa-dăɣ nĕxaṭṭăb dd-ifălăn Ălmasex, a iha. 18Ak ajăn a-wen ălmăɣna-net a-s har ămăra-dăɣ, wăr-ĕslen kăl-Ălyăhud i-isălan-win-dăɣ? Ǝslan-asăn lab ed a-wen-dăɣ făw a dăɣ-innă ĕlkĕttab n-Măssinăɣ: "Ăssewălăn imawayăn n-isălan făll-ărori n-ăkall iket-net, wăr t-tĕlla tamdujt dăɣ-ăddunya s-wădden tĕsl'-asăn." 19Ad-kăwăn-sĕstĕnăɣ: "Tordam a-s isălan-wi-dăɣ, wăr tăn-ĕjrehăn kăl-Iṣrayil?" Ǝjrahăn-tăn lab. Ǝntăneḍ-en-dăɣ făw a-s innă ănnăbi Mosa s-tizarăt, innă Măssinăɣ: "Ad-dăɣ-wăn ăjăɣ tismiten făll-tamĕtte wărăt tămoos ta-nin, ẓĕẓẓĕkĕnẓărăɣ-kăwăn făll-tawset jam tawset n-ălžuhal." 20Olăs daɣ ănnăbi Saya, iglă har innă: "Ăddinăt wi s-ibda, ĕkfan-ahi iroriyawăn-năsăn, ĕqqălăn-ahi-dd; wi s-ihĕnnin, wăr dăɣ-i ăkkulăn, ăsnăfalălăɣ-asăn-dd iman-in." 21Dăɣ-a-wa dd-iqqălăn kăl-Iṣrayil, ĕnta da a-wa dăɣ-săn innă Măssinăɣ: "Ǝẓẓalăɣ ăfuss-in har ăqqur i-tawset hi-tĕnkarăt, oseɣ-tăt a-wa tawset hi-tăsiɣărăt ulh-net, tawset săr-i tunjayăt."

will be added

X\