Kăl-Roma 1

1A-wa năkk Bulĕs wa n-akli n-Ɣisa Ălmasex dd-iɣra s-iman-net i-ad-umasăɣ ănămmašul ixaṭṭăbăn Ălĕnžil n-Măssinăɣ i-dăgg-adĕm. 2Ălĕnžil, isălan-net, ăru d-ăsjăr Măssinăɣ ăṭṭăma-năsăn dăɣ-ĕlkĕttabăn wi šăddijnen ĕktăbăn ănnăbităn 3i-ad-ĕjĕn dăɣ-săn isălan n-Ɣisa Ălmasex wa n-Rure-s n-Măssinăɣ. 4Ɣisa, s-eɣăs-net, ahăya n-ămănokal Dawĕd a ămoos măšan, tumast-net i-Rure-s n-Măssinăɣ, ăsdăttăt-tăt Măssinăɣ s-tărna n-Unfas Šăddijăn-i t-dd-issĕnkărăn jer-inĕmmuttan. 5Tĕssĕba n-Ɣisa Ălmasex-i n-Emăli-nănăɣ-en-dăɣ, ad-fălla-năɣ dd-ăzzăbbăt Măssinăɣ ănnuɣmăt-net, ij'-anăɣ inĕmmušal-net i-ad-amĕnnăt tiwsaten ti n-inĕẓẓulam, ămašălnăt erhet-net, sĕmɣărnăt isĕm-net. 6Inĕẓẓulam, kăla tăn-ham kăwăneḍ-dăɣ, măšan, ašăl-i-dăɣ, iɣr'-iwăn-dd Ɣisa Ălmasex s-iman-net. 7Tĕssĕba n-a-wen-dăɣ a făl hawăn-in-kattăbăɣ tăkarḍe-ta-dăɣ, kăwăneḍ-i n-imĕššeddĕjăn ikna Măssinăɣ tărha ĕzzaɣnen aɣrĕm wa n-Roma. Ăhuulăɣ-kăwăn-in, ikf'-iwăn Măssinăɣ-i n-Abba-nănăɣ d-Emăli Ɣisa Ălmasex ănnuɣmăt d-ălxer. 8Dăɣ-eɣăf n-a-wa s-ărheɣ ad-hawăn-tăn-ănnăɣ, ărheɣ ad-umayăɣ i-Măssinăɣ dăɣ-idĕm n-Ɣisa Ălmasex făl-a-s, wăr t-ill' ăwadĕm dăɣ-ăddunya s-wădden isl' isălan n-iqqud n-immun-năwăn. 9A-wa heɣ dăɣ-asĕssiwăḍ n-isălan n-Ălĕnžil n-Rure-s n-Măssinăɣ, heɣ-t s-ulh imdan. Măssinăɣ-i ɣabbădăɣ s-ulh imdan a-s tajuhe-nin, wăr kăla okăy ašăl s-wădden kittĕwăɣ-kăwăn, tĕddalăɣ-awăn-t 10hak ašăl n-a-s kunta erhet-net a-wen, isărɣĕset-ahi ĕmmĕk făl kăwăn-in-ĕkkeɣ. 11Ijmaḍ-t ăššăk a-s ăsidărhănăɣ hullan ahănay-năwăn, ĕzzĕyăɣ-kăwăn, ăkfăɣ-kăwăn hărăt dăɣ-isuf wi hi-ija Unfas Šăddijăn i-ad-iṣṣuhĕt immun-năwăn, 12tĕnfum-ahi, ĕnfĕwăɣ-kăwăn năkk-dăɣ dăɣ-immun wa hanăɣ-osaɣăn. 13Ayĕtma-ɣ, ărheeɣ ad-tĕssanăm a-s ăru d-ăsdărhănăɣ ad-kăwăn-in-ăkkăɣ măšan, har ašăl-i-dăɣ, wăr-otes Măssinăɣ a-wen. Ăsidărhănăɣ hullan ad-ikrĕš ălxidmăt wa heɣ fălla-wăn ălfăyda s-ĕmmĕk wa s-t-ikrăš jer-tiwsaten ti iyyăḍnen n-inĕẓẓulam 14făl-a-s dăɣ-isălan wi n-Ălĕnžil, wăr t-illa ere s-wădden ila făll-i ălɣar jer-kăl-iɣărman wăla kăl-ejef, jer-ălɣulam wăla ălžuhal. 15Iba n-aẓĕmmăẓli n-ăddinăt-en-dăɣ a săr-i dd-orăwăn derhan n-ad-kăwăn-in-ăkkăɣ kăwăneḍ-dăɣ i ĕzzăɣnen Roma, ăjăɣ-awăn isălan n-Ălĕnžil. 16Wăr-ăkrakăḍăɣ Ălĕnžil ed ĕnta a-s tărna ta s-iɣallăs Măssinăɣ ere săr-s omănăn-dăɣ, kăl-Ălyăhud tĕzzar ĕlkămăn-asăl inĕẓẓulam. 17Ălĕnžil-en-dăɣ a hanăɣ-isalmadăn mi ilan idĕm dat-Măssinăɣ s-ĕmmĕk wa s-tăn-ĕnnăn ĕlkĕttabăn n-Măssinăɣ a-s ĕnnăn: "Ɣur-sănto har sămdo, immun a ihakkăn ăgg-adĕm idĕm dat-Măssinăɣ i-ad-ăj tămudre ta fălla-s irha Măssinăɣ." 18Tidĕt, Măssinăɣ, izazăbbat-dd aḍkăr-net făll-dăgg-adĕm dăɣ-tĕssĕba n-iba n-tuksĕḍa ta t-wăr jen d-iba n-iqqud dăɣ-a-wa tamašalăn, ĕgdalăn i-iman-năsăn tidĕt, ĕnkaẓăn-tăt daɣ i-ăddinăt wi iyyăḍnen s-a-wa lăbasăn tamašalăn. 19A-wa s-ămiɣatăr ăgg-adĕm i-ad-săr-s izzĕy Măssinăɣ, inbaj tiṭṭawen ed ăsnăfalăl-t-dd. 20A-wa dăr-olăh Măssinăɣ, wăr t-illa ere t-inhayăn s-tiṭṭawen-net măšan, tărna-net ta tăɣlălăt, tumast-net i-Măssinăɣ, a-wen-dăɣ iket-net, afăl dăɣ-s ăznăzjamăt ăgg-adĕm, ad-t-inhĕy dăɣ-a-wa dd-ibna a-s dd-ixlăk ăddunya. 21Tĕssĕba n-a-wen-dăɣ a făl ăbas t-illa asăru wăl' iyyăn i-iba n-tuksĕḍa-net ed, dăgg-adĕm, ĕssanăn a-s Măssinăɣ ill'-e măšan, unjăyăn s-ad-t-sĕmɣărăn wăla s-ad-has-umayăn. Ǝzzĕwen-tăn erk inĕzjam-năsăn s-mălayăɣna, orăw-dd săr-săn a-wen-dăɣ tekle dăɣ-tihay d-tăɣart n-ulh. 22Jan iman-năsăn ăddinăt ăzizăbbătnen musnăt, a-s ija a-wen, irmas-tăn iba n-tayĕtte. 23Ǝnnăr lan tayĕtte, wăr hĕkkĕn iroriyawăn-năsăn Măssinăɣ-i iɣlălăn n-Măssi-s n-ănnur, samăskalăn-t ălɣibadăt n-ăṣṣănămăn ăṣṣiwwărnen dăgg-adĕm-i s-a ijăn-dăɣ, ad-tăn-iba, ad-ɣabbădăn taliwen d-igḍaḍ d-irĕzzejăn d-iẓlulam. 24Inhăy Măssinăɣ erk ĕẓẓĕnĕf wa ĕjjăšăn ɣas, ăsrăs-tăn, oyy'-en, iwway-tăn aḍu, ošăl dăr-săn ḍarăt erk derhanăn n-ulhawăn-năsăn, ad-samăḍasăn iman-năsăn, šillĕwnăt-tăn tikrukaḍ. 25Ăsmăttăyăn tidĕt ta n-Măssinăɣ, jăn-tăt bahu; ĕqqălăn-dd ɣabbădăn amătăwăxlak, oyyăn Ămaxlak-i ănihăjjăn d-tĕmmal hărkuk. Amin! 26Tĕssĕba n-a-wen-dăɣ a făl fălla-săn innăḍ Măssinăɣ, oyy'-en, oḍăn dăɣ-tikrukaḍ-tin-dăɣ. A-wa issăxrăm Măssinăɣ, ăssiixlălăn-t ĕntăneḍ; ĕbḍănăt tiḍeḍen-năsăn d-meddĕn-năsnăt, oyyănăt a-wa ilăn ĕmmĕk, ăqqălnăt-dd tinmĕkkinăt jer-iman-năsnăt. 27A-wen-dăɣ daɣ a jăn meddĕn-năsnăt, jărăn-in a-wa dd-ăzzăbbăt Măssinăɣ ašăl ăzzarăn, ad-tăn-išillĕw a ăsikărakăḍăn. Oyyăn meddĕn tiḍeḍen-năsăn, izzĕwăt-tăn iblis-năsăn ad-itakk ăhalĕs-ăhalĕs, ămoos a-wen-dăɣ tăn-išlăn ălxaqq wa dăr-ănihăjjăn imojjan-năsăn d-tĕmɣăre n-tanmĕšrayt-năsăn. 28Šămad, unjăyăn s-ad-uksaḍăn Măssinăɣ, išlăy-asăn ĕnta-dăɣ dăɣ-xorĕzzĕma wa ĕkfăn iman-năsăn, immăr hărăt tiyĕtwen-năsăn, ad-tăn-išillĕw a ăsikărakăḍăn wărăn itĕtwĕjj. 29Ăsisakăyăn ulhawăn-năsăn dăɣ-iba n-iqqud d-tăllăbăst d-erk derhan, d-tismiten d-iji n-iman d-ikĕnnasăn d-ĕkkăẓẓu d-erk inĕzjam d-ukšaf. 30Ămoosăn imawayăn n-ănnămima, ăššunjen Măssinăɣ, ĕkfărăn, hălăn, ĕḍnayăn ĕttĕkĕbru d-ibărajăn, ăsisakăyăn dăɣ-musnăt n-iji n-a-wa lăbasăn, inĕbbudar iket-dăɣ-năsăn, 31irmas-tăn iba n-tayĕtte, imărẓan n-ărkăwăl, ăqqurăn, kăwalăn ulhawăn-năsăn, wăr tăn-ha tăhanint. 32Išl'-en a-wen-dăɣ kud-dăɣ ĕssanăn a-s ilkam dăɣ-săn ăššăreɣa n-Măssinăɣ ed iktab dăɣ-măjrăd-net a-s ăddinăt wi šillun hărătăn-win-dăɣ, ĕlhĕllak ɣas a dăɣ-săn ilkamăn. Ăssetăn dăɣ-a-wa ăssuksăḍăn tăn-išlăn har eqqas făw a tajjăn i-ăddinăt wi tamašalnen a-wen-dăɣ tăn-išlăn wărăn il' ĕmmĕk.

will be added

X\