1 Ăshăḍ ănjălos wa s-sĕmmos tăsinsăɣt-net, ĕnhăyăɣ atăr dd-ifalăn išĕnnawăn har dd-oḍă făll-ăkall, ătwăkf'-e asăyar n-anu wa wărăn ila ider ihăn ălaxărăt. 2 Or' atăr-ĕnnin anu-en, izjăr-t-dd a olăhăn d-tahĕst-i-dăɣ tăssuksăḍăt, issĕkwăl ăho wa dd-izjărăn anu tăfukt d-ălhăwa. 3 Ăho-ĕnnin-dăɣ, tĕzjăr-t-dd tašwalt tĕlsăt ărori n-ăkall, tašwalt-en, tĕjraw ăssăm olăhăn d-wa ihăn iẓurdam. 4 Tĕjrăw tašwalt-ĕnnin-dăɣ alămăr n-ad-wăr ḍes teyĕšše wăla ihĕškan wăla idommăn, ătwănn'-as ɣas ad-ăkk ăššar-net dăgg-adĕm wi s-wăr-iwer ešwăl wa n-Măssinăɣ timmawen-năsăn. 5 Ăddinăt-en, wăr tĕjrew tašwalt turhajăt n-tenăɣe-năsăn, wăr tĕjrew a săl turhajăt n-aɣĕzzĕbu-năsăn har fălla-săn takĕy tăqqăn n-sĕmmos orăn. Tĕsĕmme n-tisnant n-ălɣizabăt-net tolăh d-a-wa s-itifrĕy ăwadĕm ăkiwăttăt eẓerdĕm. 6 Tăqqăn-ten-dăɣ n-sĕmmos orăn, ad-takĕy tammăɣăn dăgg-adĕm i-tamăttant măšan, wăr tăt-jărrĕwăn, sadărhanăn-tăt măšan, tifăqqut-asăn. 7 Tašwalt-ĕnnin, tolăh d-ibĕjwan ăsidăwnen i-tikawt n-amjăr, iɣăfawăn-năsăn, iwar-tăn a olăhăn d-koronatăn, a-wen, tikĕnbuten n-orăɣ, olăhăn idmawăn-năsăn d-wi n-dăgg-adĕm, 8 lan amẓadăn olăhnen d-tišĕkkaḍ n-tiḍeḍen, lan daɣ isenăn olăhnen d-wi n-ehran. 9 Ijĕrjar-năsăn, s-tĕnnĕd, tăẓoli a tăn-ilsan, emăsli n-afrewăn-năsăn, olăh d-turfen ti n-amjăr tihubun ibĕjwan ĕkkanen edăgg n-amjăr. 10 Lan tilănkăwen lanen teskărt šund ta n-iẓurdam, tilănkăwen-năsăn en-dăɣ a ih' ăssăm wa s-tikwĕttin dăgg-adĕm har ăkĕyĕn sĕmmos orăn. 11 Lan ămănokal wa ănnihăḍăn dăɣ-anu wa wărăn ila ider ihăn ălaxărăt s-ĕnta a-s ănjălos wa n-ălaxărăt, isĕm-net dăɣ-Ɣăbranĕyya: Abbădon; isĕm-net dăɣ-Tălyunanit: Abbolyon. Almăɣna n-isĕm-net: Ămahlak. 12 Ălmăṣṣibăt wa ăzzarăn okăy măšan, ĕlkamăn-as-dd ĕssin hărwa. 13 Ăshăḍ ănjălos wa s-săḍis tăsinsăɣt-net, ĕsleɣ i-emăsli dd-ifalăn tisĕttuytay ti n-ĕkkoẓăt n-tasĕskărt n-orăɣ ta n-tikutawen t-tĕllăt dat-Măssinăɣ. 14 Inn' emăsli-en i-ănjălos wa s-săḍis iṭṭăfăn tăsinsăɣt: "Arr-in ănjălosăn wi n-ĕkkoẓ ĕkrădnen edes i-ejărew wa măqqărăn s-isĕm-net Ifrăyti." 15 Ămerăn-dd ănjălosăn-win-dăɣ n-ĕkkoẓ ăssaɣăt-wen-dăɣ n-ašăl-wen-dăɣ n-ewăr-wen-dăɣ n-awătay-wen-dăɣ i-ad-ănɣĕn ĕttĕlĕt n-dăgg-adĕm ed a-wen-dăɣ a-s ĕtwarăn a ijă a-wa-dăɣ. 16 Ătwănn'-ahi a-wa dăr-ogdăh ĕlɣĕskăr wa inăyăn ibĕjwan, oseɣ-t iwwăḍ sănatăt timaḍ n-ajjim n-ăwadĕm. 17 Ibĕjwan-ĕnnin d-ăddinăt wi tăn-năynen, ĕnta da ĕmmĕk wa s-hi-dd-ănfalălăn: imălsan-năsăn, i n-tăẓoli šăggăɣăt šund efew, i dalatnen šund tekădăyt ta n-telăllit lăt ălqim s-itawănna: Safir; ja tăroɣe ta ităjj ĕlkăbrit. Iɣăfawăn n-ibĕjwan, olăhăn d-iɣăfawăn n-ehran, izajjăr-dd efew d-ihohan d-ĕlkăbrit imawăn-năsăn. 18 Ălmăṣṣibatăn-winnin-dăɣ n-kăraḍ dd-zajjărnen imawăn n-ibĕjwan, efew d-ăho d-ĕlkăbrit, ĕlhăsăn ĕttĕlĕt n-dăgg-adĕm 19 ed ibĕjwan ĕnnin-dăɣ, ăššar-năsăn, imawăn-năsăn d-tilănkăwen-năsăn a iha făl-a-s olăhnăt tilănkăwen-năsăn d-taššălen, lan iɣăfawăn s-tiḍărrun dăgg-adĕm. 20 Unjăy a-wa dd-ăqqimăn dăɣ-dăgg-adĕm wăr-ănɣen ălmăṣṣibatăn-ĕnnin-dăɣ s-ad-ibḍĕw d-ăṣṣănămăn wi ĕknăn s-ifassăn-năsăn, unjăyăn s-ad-ĕbḍĕwăn d-ălɣibadăt n-alšinăn d-ăṣṣănămăn wi ĕknăn i-iman-năsăn s-orăɣ d-aẓrĕf d-daroɣ d-tihun d-isăɣerăn wăren ăddobăt ahănay wăla măsăllăt wăla răjjoš. 21 Unjăyăn daɣ s-ad-ĕbḍĕwăn d-iji n-iman d-ĕkkĕriku d-asĕmmăḍĕs n-iman d-tikra.
