1 Irẓă Ašăɣol aẓăẓlo wa s-ĕssa ɣas, ăssosăm a-wa ihăn išĕnnawăn iket-dăɣ-net har fălla-s tokăy tăẓune n-ăssaɣăt. 2 Ǝnhăyăɣ ḍarăt-a-wen ĕssa ănjălosăn wi ĕbdădnen dat-Măssinăɣ, ijrăw hak iyyăn dăɣ-săn tăsinsăɣt tiyyăt. 3 Osă-dd ănjălos iyyăn, ibdăd edes i-tasĕskărt ta făll-tajjănăt tikutawen, iṭṭaf ăkoss wa hăn imĕkkărora iknăn dăɣ-orăɣ. Ijrăw isĕkkurora ăjjootnen i-ad-tăn-isĕdĕw d-tittar n-tamĕtte ta n-imĕsšeddĕjăn n-Măssinăɣ, isărɣ a-wen-dăɣ iket-net făll-tasĕskărt ta n-tikutawen n-orăɣ t-tĕllăt dat-tasăqqaymut ta n-tĕmmĕnukĕla, ăssewăḍ-in daɣ făll-a-wen tittar n-imĕššeddĕjăn n-Măssinăɣ. 4 Ăhohăn imĕkkurora, ĕlkămnăt-asăn tittar n-imĕššeddĕjăn n-Măssinăɣ. 5 Iḍkăl ănjălos ḍarăt-a-wen ăkoss wa dăɣ-raqqăn ĕlɣĕnfărăn, iḍkăr-t dăɣ-efew wa iwărăn tasĕskărt ta n-tikutawen tĕzzar, ibsăl-t-dd făll-ăkall, jăn ejjajăn ălwăqq-wen-dăɣ d-imăslan d-essamăn, ăškăḍkăḍ ăkall. 6 Ăsdăwăn ya ănjălosăn wi n-ĕssa ĕṭṭăfnen tisinsăɣen ti n-ĕssayăt i-ashăḍ-năsnăt. 7 Ăshăḍ wa ăzzarăn tăsinsăɣt-net, oḍăn-dd ijidrăšăn ăddewnen d-efew irtayăn d-ašni făll-ăkall, intăs ĕttĕlĕt n-ăkall d-ĕttĕlĕt n-ihĕškan d-a-wa t-illăn dăɣ-teyĕšše iket-net. 8 Ăshăḍ ănjălos wa s-ĕssin tăsinsăɣt-net, ifăl-dd a olăhăn d-aḍaɣ ăhijăljălăn išĕnnawăn, oḍă-dd dăɣ-ejărew. Iqqăl ĕttĕlĕt n-ejărew wa sĕmmăn ašni ălwăqq-wen-dăɣ. 9 Ăba ĕttĕlĕt n-e d t-illăm ămudăr ihan ejărew wa sĕmmăn, ittăɣtăɣ ĕttĕlĕt n-a-wa ila ejărew dăɣ-turfen. 10 Ăshăḍ ḍarăt-a-wen ănjălos wa s-kăraḍ tăsinsăɣt-net, ifăl-dd atăr măqqărăn ăhijăljălăn šund emămmăl išĕnnawăn, oḍă-dd făll-ĕttĕlĕt n-ijĕrwan d-ersan. 11 Atăr-en, isĕm-net: "Tĕsĕmme." Oḍă-dd ɣas, issĕsmăm ĕttĕlĕt n-aman har tămmut tĕššĕm n-ăddinăt iket-năsăn wi tăn-ĕswănen. 12 Ăshăḍ ănjălos wa s-ĕkkoẓ tăsinsăɣt-net, tĕjjăš tewete ĕttĕlĕt n-tăfukt d-ĕttĕlĕt n-ewăr d-ĕttĕlĕt n-etran, ijmăḍ-tăn ĕttĕlĕt n-ănnur-năsăn har ăbas itimlĕwlĕw ĕttĕlĕt n-ehăḍ d-ĕttĕlĕt n-ašăl. 13 Ǝkyădăɣ daɣ, ĕsleɣ i-ejăft illayăn dăɣ-ijĕj dăɣ-ălhăwa, iḍkal emăsli-net, ijanna: "Imĕskay, Xăxx-dăɣ, imĕskay imuzăɣăn n-ăkall ălwăqq wa d-e-săhĕḍăn ănjălosăn wi n-kăraḍ hin-ăqqimnen tisinsăɣen-năsăn!"
