Tănăfalilt 7

1Ḍarăt-a-wen, ĕnhăyăɣ ĕkkoẓ ănjălosăn s-hak iyyăn dăɣ-săn dăɣ, ibdad dăɣ-iyyăt dăɣ-tisdas n-ăkall ti n-ĕkkoẓăt. Hak iyyăn ănnihăḍ dăɣ-iyyăn dăɣ-aḍutăn wi n-ĕkkoẓ i-ad-wăr-ăsrarăj wăl' iyyăn dăɣ-săn făll-ăkall wăla făll-ejărew wăla fall-ihĕškan. 2Ǝnhăyăɣ daɣ ănjălos iyyăn har dd-ifăl emăynăj iṭṭaf aẓăẓlo n-Măssinăɣ-i iddărăn. Ăssewăl s-afălla i-ĕkkoẓ ănjălosăn wi ĕjrăwnen turhajăt n-ad-ĕbxĕsăn ăkall d-ejărew wa sĕmmăn, inn'-asăn: 3"Taẓidert, wăr jem săbxas dăɣ-ăkall wăla dăɣ-ijĕrwan wăla dăɣ-ihĕškan har năj ešwăl făll-timme n-eklan n-Măssinăɣ iket-dăɣ-năsăn." 4Ǝsleɣ ălwăqq-wen i-a-wa dăr-ogdăhăn ăddinăt wi iwăr aẓăẓlo n-Măssinăɣ: temeḍe d-ĕkkoẓăt timĕrwen d-ĕkkoẓ n-efăḍ n-ăwadĕm dd-ĕzjarnen tiwsaten n-Iṣrayil iket-dăɣ-năsnăt: 5Măraw d-ĕssin n-efăḍ n-ăwadĕm, ĕzjarăn-dd tawset ta n-Yăhuda; măraw d-ĕssin n-efăḍ n-ăwadĕm, ĕzjarăn-dd tawset ta n-Rubin; măraw d-ĕssin n-efăḍ n-ăwadĕm, ĕzjarăn-dd tawset ta n-Gad; 6măraw d-ĕssin n-efăḍ n-ăwadĕm, ĕzjarăn-dd tawset ta n-Azir; măraw d-ĕssin n-efăḍ n-ăwadĕm, ĕzjarăn-dd tawset ta n-Naftali; măraw d-ĕssin n-efăḍ n-ăwadĕm, ĕzjarăn-dd tawset ta n-Mănasa; 7măraw d-ĕssin n-efăḍ n-ăwadĕm, ĕzjarăn-dd tawset ta n-Simyon; măraw d-ĕssin n-efăḍ n-ăwadĕm, ĕzjarăn-dd tawset ta n-Lewi; măraw d-ĕssin n-efăḍ n-ăwadĕm, ĕzjarăn-dd tawset ta-n-Isakar; 8măraw d-ĕssin n-efăḍ n-ăwadĕm, ĕzjarăn-dd tawset ta n-Ẓabilon; măraw d-ĕssin n-efăḍ n-ăwadĕm, ĕzjarăn-dd tawset ta n-Yusĕf; măraw d-ĕssin n-efăḍ n-ăwadĕm, ĕzjarăn-dd tawset ta n-Bănyamin. 9Ǝnhăyăɣ daɣ ḍarăt-a-wen, tamĕtte n-ăddinăt-i-dăɣ tăjjet s-wăr t-illa ere ăddooben asiḍĕn-net. Tamĕtte-ĕnnin-dăɣ, han-tăt ăddinăt n-e d t-illăm ĕddĕwĕl d-e d t-tĕllăm tawset d-e d t-tĕllăm tamĕtte d-e d t-illăm awal. Ǝbdadăn dat-tasăqqaymut ta n-Tĕmmĕnĕya d-dat-Ašăɣol, ăssiimlălăn, ĕṭṭafăn ilĕktan n-tišday. 10Ǝẓẓajăn imăslan-năsăn s-afălla, jannen: "Ǝlɣĕllas-nănăɣ, Măssinăɣ-i ăqqiimăn făll-tasăqqaymut ta n-tĕmmĕnukĕla d-Ašăɣol a ɣur-t-illa." 11Ǝbdădăn ănjălosăn iket-năsăn wi ănimăɣlăynen tasăqqaymut ta n-tĕmmĕnukĕla d-imɣarăn d-hărătăn wi n-ĕkkoẓ ĕddărnen, ărkăɣăn dat-tasăqqaymut ta n-tĕmmĕnukĕla, ĕssĕnsăn timmawen-năsăn făll-ăkall, ad-ɣabbădăn Măssinăɣ, 12jannen: "Tidĕt-dăɣ a-s tĕmmal d-ălxurmăt d-sărho d-tămayit d-semɣar d-tărna d-ăṣṣahăt, i n-Măssinăɣ hărkuk! Amin." 13Issĕstăn-ahi iyyăn dăɣ-imɣarăn ḍarăt-a-wen, inn'-ahi: "Ma ămoosăn ăddinăt-wi-dăɣ ăssimlălnen? Ǝnde s-dd-hăn?" 14Ǝnneɣ-as: "Măssi-ɣ, a-wen, kăyy a t-issanăn." Inn'-ahi ălwăqq-wen: "A-wa ăddinăt wi dd-toyyă tăɣazzabit ta măqqărăt, ăsserădăn isĕlsa-năsăn, issĕmlăl-tăn ašni wa n-Ašăɣol. 15A-wen-dăɣ a făl ĕbdadăn dat-tasăqqaymut ta n-tĕmmĕnukĕla n-Măssinăɣ. Ehăḍ d-ašăl, ɣabbădăn-t dăɣ-ehăn n-ămudd-net wa măqqărăn. Ere wa ăqqiimăn făll-tasăqqaymut ta n-tĕmmĕnukĕla dăɣ-ehăn-net, a tăn-ogaẓăn. 16Wăr-ilkem ad-ălloẓăn, wăla ad-ăffudăn, wăla ad-tăn-tăssirɣa tăfukt wăla a ăkkusăn a ămoos-dăɣ 17făl-as Ašăɣol wa ihăn ammas n-tasăqqaymut ta n-tĕmmĕnukĕla, iman-net a tăn-e-iḍĕnăn, aɣĕd-tăn s-ersan wi n-aman ĕddărnen, irsĕy-in Măssinăɣ e d t-illăm ămiṭṭ dăɣ-tiṭṭawen-năsăn."

will be added

X\