Tănăfalilt 6

1Olăsăɣ, ĕkyădăɣ; ĕnhăyăɣ Ašăɣol a-s irẓa aẓăẓlo wa ăzzarăn dăɣ-wi n-ĕssa hărnen ĕlkĕttab. Ǝsleɣ i-iyyăn dăɣ-hărătăn wi n-ĕkkoẓ ĕddărnen a-s iḍkăl emăsli-net šund ejjaj, innă: "Ǝyyăw!" 2Innă a-wen ɣas, ĕkyădăɣ: ĕnhăyăɣ ebăje măllăn inay ăwadĕm iṭṭafăn ăssăm, tătwăkf'-e korona, a-wen, takĕnbut n-tĕmmĕnukĕla. Ăwadĕm-en, emărn, iglă daɣ i-ad-ărn. 3Irẓa Ašăɣol aẓăẓlo wa s-ĕssin ihărăn ĕlkĕttab ɣas, ĕsleɣ i-wa s-ĕssin dăɣ-hărătăn wi n-ĕkkoẓ ĕddărnen a-s innă: "Ǝyyăw!" 4Ǝnhăyăɣ ămăra ebăje šăggăɣăn dd-imalăn, ijrăw ăhalĕs wa t-inăyăn tădabit n-ad-ikkĕs ălɣafyăt făll-ărori n-ăkall i-ad-ĕnmĕlhĕsăn ăddinăt jer-iman-năsăn; ĕnta-i-hi, ijrăw tăkoba šĕjreet. 5Irẓă Ašăɣol aẓăẓlo wa n-kăraḍ ɣas, ĕsleɣ i-wa s-kăraḍ dăɣ-hărătăn wi n-ĕkkoẓ ĕddărnen a-s innă: "Ǝyyăw!" Ǝkyădăɣ, ĕnhăyăɣ ebăje kăwălăn inay ăwadĕm iṭṭafăn ălmizan dăɣ-ăfuss-net. 6Ǝsleɣ i-emăsli dd-ifalăn jer-hărătăn wi n-ĕkkoẓ har innă: "Kelu n-ălkăma-i, ălqim-net ašăl n-ălxidmăt n-ăwadĕm meɣ kăraḍ kelutăn n-tărruza măšan, wăr tĕfneẓăd hărăt dăɣ-ĕzzăyt wăla dăɣ-asmĕd wa n-lăɣnăb." 7Irẓă Ašăɣol aẓăẓlo wa n-ĕkkoẓ iɣfălăn ĕlkĕttab ɣas, ĕsleɣ i-hărăt wa s-ĕkkoẓ iddărăn a-s innă: "Ǝyyăw!" 8Ǝkyădăɣ, ĕnhăyăɣ ebăje dalen inay ere iwar isĕm: "Tamăttant", ăsilăl ălaxărăt d-a-wa t-ihăn dăɣ-ăddinăt iket-net. Ǝjrăwăn tărna făll-tăẓune n-ăkall ta n-ĕkkoẓăt i-ad-ănɣĕn imuzăɣăn-net s-tăkoba d-laẓ d-turhĕnnawen ti lăbasnen tamălsanen d-tiwăɣsen. 9Irẓă Ašăɣol aẓăẓlo wa n-sĕmmos ɣas, ĕnhăyăɣ dăɣ-išĕnnawăn, daw-tasĕskărt ta făll-ɣarrăsnăt taɣsiwen ti n-tikutawen dăɣ-ehăn n-ămudd wa măqqărăn, iman n-ăddinăt wi ăba dăɣ-tĕssĕba n-măjrăd n-Măssinăɣ d-ajĕyh dăɣ-s i-ăddinăt. 10Ǝḍkălăn iman-en-hi imăslan-năsăn s-afălla, ĕnnăn: "Emăli-nănăɣ wa šăddijăn, ăddutten, ma s-tăqqalăd, tarĕd ăššăreɣa wa n-jere-năɣ d-imuzăɣăn n-ăkall? Ma s-tăqqalăd tĕšĕjĕd dăɣ-săn eɣa n-asănɣal wa jăn i-ašni-nănăɣ?" 11Ijrăw hak iyyăn dăɣ-săn emăls măllăn, ătwănn'-asăn ad-sunfĕn ăzzăman ĕnḍărrăn ĕṣbărăn har dd-ĕmdĕwăn ayĕtma-săn d-imidiwăn-năsăn wi dăr-oharăn ălxidmăt lănen s-ad-dăr-săn alăhăn ĕssĕbab n-tamăttant. 12Ǝnhăyăɣ ḍarăt-a-wen Ašăɣol a-s irẓă aẓăẓlo wa n-săḍis iɣfălăn ĕlkĕttab ɣas, ijă-dd ăkall ăškăḍkăḍ-i-dăɣ ăssuksăḍăn, kăwal tăfukt šund alăššo, šăggaɣ ewăr iket-net šund ašni, 13jăn-dd etran făll-ăkall aftĕktĕk wa dd-tăjjăn aratăn n-ašar dihad tăn-iwwĕšwăš aḍu ăṣṣoohen. 14Olămăn-in išĕnnawăn šund ĕlkĕttab itiḍh ăwadĕm, ăhonăn iḍaɣăn d-iwtĕlăn. 15Ǝnkărăn imuzăɣăn n-ăkall iket-năsăn, jer-wi n-imănokalăn, hakd wi n-kăl-eket d-wi n-imănokalăn n-ĕlɣĕskăr d-wi n-imărrĕzăɣăn d-kăl-ăṣṣahăt, wăr-ĕẓleyăn wi n-eklan d-wi n-ilăllan, ĕffărăn iket-dăɣ-năsăn dăɣ-iɣăyan d-ităqqăn n-iḍaɣăn. 16Saɣăren, jannen i-iḍaɣăn d-isĕwlan: "Aḍĕwăt-dd fălla-năɣ i-ad-wăr hanăɣ-ihĕnnĕy ămănokal wa ăqqimăn făll-tasăqqaymut ta n-tĕmmĕnukĕla, ĕnjărăt-anăɣ iket-di d-fălla-năɣ isiḍĕw aḍkăr n-Ašăɣol 17ed ašăl wa măqqărăn d-itakkăs ălxăr, osă-dd. Mi dăɣ-s-e-iɣlĕsăn?"

will be added

X\