Tănăfalilt 5

1Ǝnhăyăɣ ḍarăt-a-wen dăɣ-ăfuss wa n-aɣil n-ere wa ăqqimăn făll-tasăqqaymut ta n-tĕmmĕnukĕla ĕlkĕttab warăn ikătabăn făll-idmawăn-net issĕnăn, warăn-t daɣ ĕssa iẓĕẓla has-ĕgdalnen amer. 2Olăsăɣ daɣ ahănay n-ănjălos dăɣ-wi n-imărnan, ibdad, ijanna s-afălla: "Mi ăddoben, ănihăjja d-ad-ărẓ iẓĕẓla-wi-dăɣ n-ĕssa, arr ĕlkĕttab-wa-dăɣ?" 3Ăbă-dd ăwadĕm dăɣ-išĕnnawăn d-ăkall d-ider n-ăkall ăddooben arr-net, ăba-dd wăla ere ăddooben asĕjrah dăɣ-ammas-net. 4Ǝnhăyăɣ a-s ăbă-dd ăwadĕm orăn ĕlkĕttab-ĕnnin-dăɣ, wăla i issĕjrăhăn dăɣ-s, ɣas ad-sakălalăɣ. 5Ălwăqq-wen-dăɣ ad-hi-innă iyyăn dăɣ-imɣarăn: "Susĕm, wăr tĕlhed! Ǝnhĕy-t-ak ăgg-Yăhuda wa n-ahăr n-ahăya n-ănnăbi Dawĕd, ikrăš tărna, ăddoobăt terăẓẓe n-iẓĕẓla wi n-ĕssa, arr ĕlkĕttab." 6Ǝnhăyăɣ ălwăqq-wen Ašăɣol ibdadăn dăɣ-tasăqqaymut ta n-tĕmmĕnukĕla ănimăɣlăyăn hărătăn wi n-ĕkkoẓ ĕddărnen d-imɣarăn wi n-sănatăt timĕrwen d-ĕkkoẓ. Ašăɣol-i-hi, s-tĕnnĕd iɣras, ila ĕssa iskawăn d-ĕssayăt tiṭṭawen. Tiṭṭawen-tin-dăɣ a-s ĕssa unfasăn wi dd-ăšmašăl Măssinăɣ făll-ărori n-ăkall iket-net. 7Irjăš-dd Ašăɣol har dd-osa ere wa ăqqimăn făll-tasăqqaymut ta n-tĕmmĕnukĕla, irmăs fălla-s ĕlkĕttab wa iṭṭăf s-ăfuss-net wa n-aɣil. 8Irmăs ĕlkĕttab-ĕnnin-dăɣ ɣas, ărkăɣăn hărătăn wi n-ĕkkoẓ d-imɣarăn wi n-sănatăt timĕrwen d-ĕkkoẓ dat-Ašăɣol, ad-t-timĕlăn, ɣabbădăn-t. Hak iyyăn dăɣ-săn iṭṭaf tehărdănt d-alkas n-orăɣ iḍkarăn ĕlɣĕnfărăn. Alkasăn-ĕnnin n-orăɣ d-isĕkkurora wi ĕḍnăyăn, ămmittălăn tittar n-ălɣibadăt n-imĕššeddĕjăn n-Măssinăɣ. 9Ăwwayăn ăsahăɣ ăynayăn dăɣ-jannen: "Ărhuj-ak ad-tărmĕsăd ĕlkĕttab, tărẓĕd iẓĕẓla wi n-ĕssa t-hărnen ed tămmud, jed iman-năk takute, tăsdărfed s-ašni-năk tamĕtte s-ămăra, ikrăš-tăt Măssinăɣ. Tamĕtte daɣ, han ăddinăt n-e d t-tĕllăm tawset, d-e d t-illăm awal, d-e d t-tĕllăm tumast d-e d t-illăm ĕddĕwĕl iwarăn ărori n-ăkall. 10Jed-tăn ălžămaɣăt n-kăl-tikutawen ixdamăn i-Măssinăɣ, jed-tăn dăɣ-Tĕmmĕnĕya-năk i-ad-ăxkĕmăn făll-ăkall." 11Olăsăɣ daɣ akăyad, ĕsleɣ i-emăsli n-ănjălosăn ĕknanen ĕjut, afḍăn făll-timĕrwen n-afḍăn. Ăɣilăyɣălăyăn tasăqqaymut ta n-tĕmmĕnukĕla d-hărătăn wi n-ĕkkoẓ ĕddărnen d-imɣarăn wi n-sănatăt timĕrwen d-ĕkkoẓ. 12Ǝḍkălăn imăslan-năsăn, ad-jannen s-afălla: "Ašăɣol wa iɣrăsăn i-ad-umas takute, tărhuj-as tărna d-ărrĕzăɣ d-sărho d-ăṣṣahăt d-semɣar d-ălxurmăt d-tĕmmal." 13Ǝsleɣ daɣ i-a-wa dd-ixlăkăn iket-dăɣ-net jer-a-wa ihăn išĕnnawăn d-a-wa iwărăn ărori n-ăkall d-a-wa t-illăn daw-ăkall d-a-wa ihăn ejărew wa sĕmmăn, a-wa dd-ătwăxlăkăn iket-net, išĕnnawăn d-ăkall, a-wen-dăɣ iket-net, irmas ăsahăɣ, ijanna: "Tărhuj tĕmmal d-semɣar d-ălxurmăt d-tărna tăɣlalăt i-ere wa ăqqimăn făll-tasăqqaymut ta n-tĕmmĕnukĕla d-Ašăɣol." 14Tĕmdă taswĕlt-ten-dăɣ ɣas, ĕssĕgdălăn hărătăn wi n-ĕkkoẓ ĕddărnen, ĕnnăn: "Amin!" Ărkăɣăn imɣarăn ĕntăneḍ-dăɣ ăssaɣăt-wen, ad-ɣabbădăn.

will be added

X\