1 Ḍarăt hărătăn-wi-dăɣ, ĕkyădăɣ, ĕnhăyăɣ dăɣ-išĕnnawăn ashăr ămerăn. Inn'-ahi emăsli-wĕnnin s-ĕsleɣ hi-olăhăn d-tăsinsăɣt: "Awĕn-dd, ad-kăy-săknăɣ ămăra hărătăn wi ĕlkamnen." 2 Iḍkăl-ahi Unfas Šăddijăn ălwăqq-wen-dăɣ s-išĕnnawăn, ĕnhăyăɣ dihen tasăqqaymut n-tĕmmĕnukĕla făll-ăqqiim ăwadĕm. 3 Ăwadĕm-en, ij' asmăɣmăɣ wa tajjănăt tihun n-tilăllaten ti s-itawănna žasĕb d-sarĕdwan. Tasăqqaymut-net ta n-tĕmmĕnukĕla, ăɣilăyɣălăy-tăt aẓănnăẓẓal ijan tihusay olăhnen d-ti n-tekădăyt ta n-tasămăɣmaɣt s-itawănna ẓimrud. 4 Ǝnhăyăɣ daɣ a-s tasăqqaymut-ĕnnin, ăɣilăyɣălăynăt-tăt sănatăt timĕrwen n-tasăqqaymut n-tĕmmĕnukĕla d-ĕkkoẓăt făll-ăqqimăn sănatăt timĕrwen n-amɣar d-ĕkkoẓ ăssimlălnen, jan iket-dăɣ-năsăn, koronatăn, a-wen, tikĕnbuten n-orăɣ. 5 Tasăqqaymut tĕnnin tăzzarăt, zajjărăn-tăt-dd essamăn d-imăslan d-ejjajăn, ărɣanăt data-s ĕssayăt tiftĕl ti ăṣṣiwwărnen ĕssa unfasăn wi n-Măssinăɣ. 6 Tasăqqaymut-ĕnnin-dăɣ daɣ, ill'-e data-s a olăhăn d-ejărew wa sĕmmăn s-dd-ăssikta ălmăɣna-net tĕšĕdje ta n-tăšoka. Tasăqqaymut, han-tăt ĕkkoẓ hărătăn ĕddarnen ănimăɣlăynen ammas-net. Hărătăn-en-hi, ămoos data-săn hakd-dăɣ ḍara-săn, tiḍrurĕjen. 7 Hărătăn-win-dăɣ ĕddărnen, wa ăzzarăn dăɣ-săn, han-t ifăqqăn n-ahăr; wa s-ĕssin, han-t ifăqqăn n-esej; wa s-kăraḍ, olăh idĕm-net d-i n-ăwadĕm; wa s-ĕkkoẓ, olăh d-ejăft illayăn. 8 Hărătăn ĕnnin n-ĕkkoẓ ĕddărnen, hak iyyăn dăɣ-săn ila săḍis afrewăn ĕlsanăt tiṭṭawen dăɣ-ammas hakd-dăɣ dăɣ-afălla. Ehăḍ d-ašăl, ĕṭṭafăn ăsahăɣ jannen: "Emăli Măssinăɣ, kăyy-i ilăn tărna iket-net, kăyy-i t-illăn, tĕlled-t, tĕlkamăd: Šăddiijăd, šăddiijăd, šăddiijăd!" 9 E-d jăn ĕkkoẓ hărătăn-win-dăɣ ĕddărnen ăsahăɣ-ĕnnin-dăɣ-dăɣ, timĕlĕn ălxurmăt, samɣarăn, tumayăn i-ere wa s-ĕnta a iɣlalăn ăqqimăn făll-tasăqqaymut ta n-tĕmmĕnukĕla, 10 ad-ărkăɣăn imɣarăn wi n-sănatăt timĕrwen d-ĕkkoẓ dat-wa ăqqimăn dăɣ-tasăqqaymut ta n-tĕmmĕnukĕla s-ĕnta a iɣlalăn, amĕlăn-t, ĕkkĕsăn tikĕnbuten-năsăn ti n-tĕmmĕnukĕla, ăjrĕn-tănăt dat-tasăqqaymut, ĕnnĕn: 11 "Emăli-nănăɣ, Măssinăɣ! Tăniihăjjăd d-ălxurmăt d-semɣar d-tărna ed kăyy a dd-ixlăkăn hărăt iket-net; ijjăš-dd a-wen ĕnniyăt-năk ɣas, jed-t."
