Tănăfalilt 3

1"Ǝktĕb tăkarḍe i-ănjălos n-ălkănisăt ta n-Sardas, tĕnnĕd-as: 'Inn'-ak Wa ilăn ĕssa unfasăn wi n-Măssinăɣ d-ĕssa etran: Ǝssanăɣ făll-timašalen-năk, tăseɣălăd ăddinăt a-s tĕddarăd a-s ija a-wen, tămmuud. 2Ăj ĕnniyăt, sudăr-dd a-wa dăɣ-k dd-ăqqimăn iket-di d-hin-itamăttat ĕnta-dăɣ făl-a-s, ĕjrăhăɣ-in a-s imojjan-năk, wăr tăn-iha-i ilan idĕm dat-Măssinăɣ. 3Ǝktĕw-dd a-wa tătwăsăɣrăd d-ĕmmĕk wa s-has-tĕsled, tămašălăd a-wa hak-ătwănnăn, tutabăd. Afăl wăr jed ĕnniyăt, ad-kăy-in-ăɣdărăɣ šund emăkrăḍ s-ălwăqq d-wăr-iha miši n-ad-jed făll-a-wen. 4Măšan han-kăwăn iyyăḍ dăɣ-Sardas di-dăɣ wăren ăsmăḍăs imălsan-năsăn. Win-hi, ad-ĕjĕn isĕlsa măllolnen, idawăn dăr-i ed ănihăjjăn d-a-wen. 5Wa ikrăšăn ašăl făll-Iblis d-tănḍărbaten-net, ad-t-sălsăɣ ĕnta-dăɣ isĕlsa măllolnen, wăr hin-e-amĕsăɣ isĕm-net dăɣ-ĕlkĕttab wa n-tămudre, ăjjayhăɣ daɣ dat-Abba-nin d-ănjălosăn-net a-s ăwadĕm-en, i-nin. 6Ere ilăn timĕẓẓujen-dăɣ s-islă, isăjdet i-măjrăd wa ităjj Unfas Šăddijăn i-ălkănisăten!' " 7"Ǝktĕb i-ănjălos n-ălkănisăt ta n-Filadăfya, ănn'-as: 'Inn'-ak Wa šăddijăn, ădduutten, iṭṭafăn ăsăyar n-Tĕmmĕnĕya ta n-ămănokal Dawĕd, ĕnneɣ: Ăwadĕm wa s-oreɣ ashăr, wăr t-illa ere ăddoben aɣăfal-net-has, wa s-t-ăɣfălăɣ daɣ, wăr t-illa ere s-ilkam ad-has-t-ora. 8Ǝssanăɣ făll-timašalen-năk, ĕssanăɣ a-s wăr tĕkned ĕṣṣuhu măšan hakd a-wen-dăɣ, tĕṭṭafăd măjrăd-in, wăr tăkkuddălăd isĕm-in. A-wen-dăɣ a făl data-k oreɣ ashăr s-wăr t-illa ere ăddoben ad-t-iɣfĕl. 9Ǝnhĕy, ad-kăy-ăkfăɣ ašăl făll-ehăn n-ăddin wa n-Iblis ijănnen s-bahu a-s ĕnta a han dăgg-Ălyăhud wi n-tidĕt. Ăddinăt-en-hi, ad-hak-tăn-in-sukăɣ, ărkăɣăn data-k, sĕmɣărăn-kăy, isĕlmĕd-tăn a-wen s-tărha ta hak-jeɣ. 10Kăyy, tĕṭṭăfăd măjrăd-in, tĕbdadăd hărkuk dăɣ a-wa hed, a-wen-dăɣ a făl ad-kăy-agĕẓăɣ năkk-dăɣ dăɣ-ăssaɣăt wa n-tisnant ilkămăn dăɣ-ăddunya iket-net i-ad-ĕtwĕžžurrĕbăn dăgg-adĕm iket-năsăn. 11Malăɣ-in šik, ĕhĕl iman-năk dăɣ-immun wa tĕṭṭăfăd i-ad-wăr dăɣ-k itihăɣ ăwadĕm wăl' iyyăn takĕnbut ta n-tĕmmĕnukĕla. 12Wa ikrăšăn ašăl făll-Iblis d-tănḍărbaten-net, ad-t-ăjăɣ tămankayt dăɣ-ehăn n-ămudd wa măqqărăn n-Măssi-ɣ, Măssinăɣ, wăr-ilkem ad-t-izjar. Ăwadĕm-en-hi, ad-fălla-s ĕktĕbăɣ isĕm n-Măssi-ɣ, Măssinăɣ, d-isĕm n-aɣrĕm-net wa măqqărăn, a-wen, Yărussălam ta tăynayăt dd-e-tĕflĕt išĕnnawăn. Ăwadĕm-wen-dăɣ, ad-fălla-s ĕktĕbăɣ isĕm-in wa ăynayăn. 13Ere ilăn timĕẓẓujen-dăɣ s-islă, isăjdet i-măjrăd wa ităjj Unfas Šăddijăn i-ălkănisăten!' " 14"Ămăra, ĕktĕb i-ănjălos n-ălkănisăt ta n-Lăwdisa, ănn'-as: 'A-wa năkk wa s-itawănna: Amin. Năkk a-s emăjjăyh n-Măssinăɣ wa n-ămaɣdal, năkk a dd-ăzzarăn i-hărăt iket-net. 15Ǝnneɣ: ĕssanăɣ făll-timašalen-năk, ĕssanăɣ a-s wăr sămmeḍăd, wăr tăkkusăd; tiyyăt-i-dăɣ, ismaḍ meɣ daɣ ukas, ad-hak-in-iššĕm a-wen 16măšan šămad, tăllimẓayed, wăr tăkkusăd, wăr sămmeḍăd, ad-kăy-in-ăbsăɣ. 17Janned: Năkk-i-dăɣ, ăbbiɣărăɣ, wăr t-illa făw a hin-oḍanăɣ. Janned a-wen-dăɣ a-s ija a-wen, wăr tĕssenăm a-s aɣăna a hed. Amăskoy kăyy, lăqqĕwăd, dărɣalăd, ɣălulăd. 18Ăyy-ahi ad-kăy-sĕnnĕmhĕlăɣ: žănš făll-i orăɣ ăššišdăj efew i-ad-tĕtbĕt terše-năk i-ehăre; žănš făll-i isĕlsa măllolnen i-ad-tĕṣtărăd; žănš făll-i tiḍrĕbba n-asăfar wa n-tiṭṭawen, sĕssĕfărăd i-ad-tĕknĕd ahănay. 19Ǝlmĕd a-s năkk, ere ărheɣ a sasaɣadăɣ, ɣattălăɣ-t i-ad-ilmĕd s-a-wen. A-wen-dăɣ a făl utab, tukasăd dăɣ-alkum-hahi. 20Sĕjĕd! Năkk da ibdădăn dat-emm n-ehăn, takăwkawăɣ-t: ere hi-islăn, or'-ahi, ad-fălla-s ĕjjĕšăɣ, ahărăɣ dăr-s, ahăr dăr-i. 21Wa ikrăšăn tărna făll-Iblis d-tănḍărbaten-net, ad-t-ăkfăɣ turhajăt n-ad-dăr-s ĕnɣĕymăɣ făll-tasăqqaymut-in ta n-tĕmmĕnukĕla, s-ĕmmĕk-wa-dăɣ s-năkk iman-in, ĕkrăšăɣ fălla-s tărna ɣas, ănɣaymăɣ d-Abba-nin făll-tasăqqaymut-net ta n-tĕmmĕnukĕla. 22Ere ilăn timĕẓẓujen-dăɣ s-islă, isăjdet i-măjrăd wa ităjj Unfas Šaddijăn i-ălkănisăten!' "

will be added

X\