Tănăfalilt 22

1Ḍarăt-a-wen-dăɣ, issĕkn'-ahi daɣ ănjălos ejărew n-aman wi n-tămudre, a-wen aman šăddiijnen, ăsimăɣmăɣăn šund tăšoka. Ejărew-wa-dăɣ, iffay-dd dăɣ-tasăqqaymut ta n-tĕmmĕnukĕla n-Măssinăɣ d-Ašăɣol. 2Injay s-edăgg n-aɣrĕm wa dăɣ-tažămmaɣăn ăddinăt. Hak asălim n-ejărew-en, idwal fălla-s ahĕšk wa n-tămudre itirĕwăn măraw ihăndăggan dăɣ-awătay d-ĕssin, hak ewăr-dăɣ, ija tirwe tăynayăt. Ifărketăn-net a isasăfarăn i-ăddunya, tĕzzĕy. 3Aɣrĕm-wa-dăɣ, wăr-ilkem ad-dăɣ-s ăttijrăw ere ăsibănnăn Măssinăɣ. Tasăqqaymut n-tĕmmĕnukĕla n-Măssinăɣ d-Ašăɣol a ihan aɣrĕm-ĕnnin-dăɣ; aɣrĕm-en-dăɣ daɣ, a dăɣ-t-e-ɣabbădăn eklan-net, 4ĕnhĕyăn idĕm-net ed iktab isĕm-net făll-timmawen-năsăn. 5Wăr-ilkem ad-dăɣ-s ij' ehăḍ, wăr-ilkem ad-ămiɣatăr ăwadĕm s-efew n-tefătelt, wăla s-ănnur n-tăfukt făl-a-s, ad-fălla-săn isĕssĕmăɣmăɣ Emăli Măssinăɣ ănnur-net, ĕṭṭĕfăn Tĕmmĕnĕya hărkuk. 6Olăs daɣ ănjălos, inn'-ahi: "Isălan-wi-dăɣ, ădduutten, ăniihăjjăn d-taflĕst. Emăli Măssinăɣ-i isamăjradăn ănnăbităn, ĕnta a dd-ăšmašălăn ănjălos-net i-ad-ăllăɣăt i-eklan-net a-wa s-išwar ija." 7Ɣisa, innă: "A ĕnḍărrăn ɣas, oseɣ-kăwăn. Tĕnḍĕḍ i-ere wa ăqqiimăn ăsijăd i-hărătăn wi s-ĕnnăn ănnăbităn, ĕktăbăn-tăn dăɣ-ĕlkĕttab-wa-dăɣ." 8Ămăra-hi, năkk Exya, hărătăn-wi-dăɣ, ĕsleɣ-asăn, ĕnhăyăɣ-tăn. Ḍarăt a-s tăn-ĕnhayăɣ, d-a-s hasăn-ĕsleeɣ, ărkăɣăɣ dat-ănjălos wa hi-tăn-issĕknăn i-ad-t-ăɣbĕdăɣ 9măšan, inn'-ahi: "Ahaa! Wăr jed a-di, năkk akli šund kăyy a ămoosăɣ, năkk d-ayĕtma-k wi n-ănnăbităn d-ere omanăn s-măjrăd n-ĕlkĕttab-i-dăɣ iket-net, Măssinăɣ ɣas a-s kăy-iwar ălɣibadăt-net." 10Inn'-ahi ḍarăt-a-wen: "Wăr tĕfferăd imĕjridăn wi issĕlmăd Măssinăɣ inĕmmušal-net, ĕktăbăn-tăn dăɣ-ĕlkĕttab-wa-dăɣ ed a-wa dăɣ-ăssewălăn, išwar ija. 11Wa wărăn itĕjj a olaɣăn, ănn'-as ad-isiwĕḍ dăɣ-tăllăbăst; wa n-enămmăḍăs, ihĕlet s-data dăɣ-asĕmmăḍĕs n-iman-net, wa oɣădăn, isiwĕḍet dăɣ-iqqud-net, wa šăddijăn, isiwĕḍet dăɣ-tĕšĕdje-net." 12Inn'-ahi Ɣisa: " 'A ĕnḍărrăn ɣas, oseɣ-kăwăn, ăwwayăɣ i-hak ăwadĕm ălhăk n-a-wa has-jăn imojjan-net. 13Năkk a-s Tizarăt, năkk a-s Tišrayăt, heɣ eɣăf, heɣ ajilal, năkk a-s Sănto, năkk a-s Sămdo.' 14Tĕnḍĕḍ i-ăddinăt wi ĕššĕšdăjnen isĕlsa-năsăn, ikf'-en a-wen turhajăt n-ad-ĕkšĕn ara n-ahĕšk wa n-tămudre d-turhajăt n-ujĕš s-imawăn n-aɣrĕm-wa-dăɣ 15măšan, imăssăxărăn d-inĕmmušal n-ĕlkăxbu d-imăjjan n-iman d-imăṣṣănămăn d-inĕsbuha, xăram-asăn aɣrĕm-en. 16Năkk a-wa Ɣisa; năkk a hin-ăšmašălăn ănjălos-in săr-wăn i-ad-hawăn-dd-isĕnnĕfilĕl hărătăn-wi-dăɣ dăɣ-ălkănisăten. Năkk a-wa Ɣisa wa n-ahăya n-Dawĕd s-ătwănna ilkam ad-ixkĕm, năkk a-s tatrit ta n-tifawt tismăɣmiɣăt." 17A-wen-dăɣ a făl, Unfas Šăddijăn hakd-dăɣ tămaẓlayt ĕṭṭafăn iyyăn n-emm, jannen: "Ǝyyăw!" Ănnet daɣ wa isăllăn i-isălan-wi-dăɣ: "Ǝyyăw!" Ere ăffudăn-dăɣ, aset-dd; ere irhăn aman ĕddărnen-dăɣ, ilkĕwet, ăswet dăɣ-săn bănnan. 18Năkk Exya, ălleɣeɣ i-ăddinăt iket-năsăn wi ĕslănen i-hărătăn wi s-innă Măssinăɣ i-inĕmmušal-net, ĕktăbăn-tăn dăɣ-ĕlkĕttab-i-dăɣ. Ǝkkasăɣ-kăwăn dăɣ-taɣdărt: isălan-wi-dăɣ, ere fălla-săn ăssewăḍăn hărăt, ilmĕdet a-s ad-isiwĕḍ Măssinăɣ făll-a-wa has-ikittĕw ălmăṣṣibatăn wi s-ătwăjjăn isălan-năsăn dăɣ-ĕlkĕttab-wa-dăɣ. 19Afăl daɣ ikkăs ăwadĕm hărăt dăɣ-imĕjridăn-wi-dăɣ s-ătwănna i-inĕmmušal ad-tăn-ĕktĕbăn, ĕktăbăn-tăn dăɣ-ĕlkĕttab-wa-dăɣ, ad-iqqĕl Măssinăɣ s-ejădăr wa has-ija dăɣ-ahĕšk wa n-tămudre d-aɣrĕm wa šăddijăn s-isiɣul ĕlkĕttab-wa-dăɣ isălan-net. 20Ere wa s-ĕnta a ɣur-t-tĕlla tidĕt n-hărătăn-wi-dăɣ iket-năsăn, ĕnta a innăn: "A ĕnḍărrăn ɣas, oseɣ-kăwăn." Amin! Emăli Ɣisa, ĕqqĕl-dd. 21Issĕnsă fălla-wăn Emăli Ɣisa ănnuɣmăt iket-dăɣ-năwăn. Amin!

will be added

X\