Tănăfalilt 20

1Ǝnhăyăɣ ḍarăt-a-wen ănjălos iyyăn dd-ifalăn išĕnnawăn iṭṭaf dăɣ-ăfuss-net asăyar n-anu wa wărăn ila ider ihăn žohănnăma d-esăssăr ăẓẓayăn. 2Irmăs-dd ăɣata wa măqqărăn, a-wen aššăl wa n-ibda s-ĕnta a-s Iblis d-Ăššăyṭan, ikrăd-t i-ad-ăj efăḍ n-awătay ikrad 3tĕzzar, ijăr-t-in dăɣ-anu wa wărăn ila ider ihăn žohănnăma, ăṭṭubbăt-t-in fălla-s i-ad-ăbas ilkam ad-ăššiška ăɣata ĕddĕwĕlăn har akĕy efăḍ n-awătay-ĕnnin-dăɣ tĕzzar, ămar-dd i-hărăt n-ăzzăman ĕnḍărrăn. 4Ḍarăt-a-wen, ĕnhăyăɣ tisăqqima n-tĕmmĕnukĕla, ĕjrăwăn ăddinăt wi fălla-snăt ăqqimnen turhajăt n-ad-ăɣtĕsăn ăššăreɣa. Ǝnhăyăɣ daɣ iman n-ăddinăt wi s-hin-ĕttĕfrăsăn iɣăfawăn-năsăn dăɣ-tĕssĕba n-immun wa jăn s-tidĕt ta dd-ăsnăfalăl Ɣisa d-tĕnna ta n-Măssinăɣ. Wăr-ăɣbedăn ămudăr, wăla ăṣṣănăm-net, wăr-iwer daɣ aẓăẓlo-net timmawen-năsăn wăla ifassăn-năsăn. Ǝnkărăn-dd daɣ inĕmmuttan, ohărăn d-Ălmasex Tĕmmĕnĕya har okăy efăḍ n-awătay. 5Wăr dd-ĕnkerăn inĕmmuttan wi iyyăḍnen har okăy efăḍ n-awătay-wĕnnin-dăɣ. Wi s-dd-ĕnkărăn iman-năsăn jer-inĕmmuttan, jăn-dd s-a-wen-dăɣ tanăkra ta s-itawănna ta tăzzarăt. 6Tĕnḍĕḍ i-ăddinăt wi hănen tanăkra-ten-dăɣ tăzzarăt. Iššĕšdăj-tăn Măssinăɣ, ikrăš-tăn, ad-ăbas fălla-săn la tamăttant ta s-sănatăt tărna; ad-umasăn kăl-tikutawen i-Măssinăɣ d-Ălmasex, ahĕrĕn d-Ălmasex Tĕmmĕnĕya dăɣ-efăḍ n-awătay-wen-dăɣ. 7Afăl okăy efăḍ n-awătay-wen-dăɣ, ad-dd-ămar Iblis, izjăr-dd takărmut-net; 8dihen, ad-iglĕw i-ad-ăkkărrăs ĕddĕwĕlăn wi wărnen tăkost n-ăkall. Ǝddĕwĕlăn-en-hi, isĕm-năsăn: Žuž d-Măɣžuž. Ad-tăn-dd-isĕdĕw iket-năsăn i-amjăr har ĕjĕn ĕjut-wa-dăɣ jănăt tiblalen n-ăkall ti ĕnsanen dăɣ-tarrayt n-ejărew wa sĕmmăn, 9ĕlsăn ărori n-ăkall iket-net, wătăn-dd afăraj i-imĕššeddĕjăn n-Măssinăɣ d-aɣrĕm wa ikna tărha. Han a-wen-dăɣ a-s dd-ifăl efew išĕnnawăn, ilhăs-tăn, issărɣa ajhanăn n-ĕddĕwĕlăn wi has-ĕlkămnen. 10Ălwăqq-wen, ittărmăs Iblis-i išašken tamĕtte, ătwăjăr-in dăɣ-tebănɣăwt n-ĕlkăbrit tăhijăljălăt ta ih' ămudăr d-ănnăbi wa n-bahu; ad-tirkĕtrĕkităn dihen ehăḍ d-ašăl. 11Ǝnhăyăɣ ḍarăt-a-wen tasăqqaymut n-tĕmmĕnukĕla măqqărăt măllăt d-ere wa fălla-s ăqqiimăn, ăffoqqen-as išĕnnawăn d-ăkall, wăr-olesăn atwĕnhĕy. 12Ǝnhăyăɣ daɣ inĕmmuttan wi măḍroynen hakd wi ĕššămnen ĕbdadăn iket-dăɣ-năsăn dat-tasăqqaymut ta n-tĕmmĕnukĕla, ămerăn ĕlkĕttabăn, ămera daɣ ĕlkĕttab iyyăn s-edes, ĕlkĕttab-en, ĕnta a-s ĕlkĕttab wa n-tămudre. Ătwăšrăɣăn inĕmmuttan s-iyyăn-iyyăn s-a-wa ămešălăn iktabăn dăɣ-ĕlkĕttabăn. 13Ibsă-dd ejărew wa sĕmmăn ăddinăt wi ikša, tăssoɣăl-dd tamăttant d-ălaxărăt a-wa hin-ĕlmăẓăn dăɣ-ăddinăt, ătwăšrăɣăn iket-năsăn s-iyyăn-iyyăn s-a-wa ămešălăn. 14Tĕttărmăs-dd tamăttant d-ălaxărăt, ătwăjărăn-in dăɣ-ebănɣ wa n-efew. Tamăttant-ten-dăɣ tiwĕyăt ăwadĕm s-edăgg-wen-dăɣ a-s tamăttant ta s-sănatăt. 15Ere s-wăr-ittĕjrăw isĕm-net dăɣ-ĕlkĕttab wa n-tămudre iket-net, ătwăjăr-in dăɣ-ebănɣ wa n-efew.

will be added

X\