1 Inn'-ahi Ɣisa: "Ǝktĕb i-ănjălos n-ălkănisăt ta hăt aɣrĕm wa n-Ifăsus, ănn'-as: 'Inn'-ak wa iṭṭăfăn ĕssa etran dăɣ-ăfuss-net wa n-aɣil, irjăšăn jer-ĕssayăt tiftĕl ti n-orăɣ: 2 Wăr hi-ĕdrejnăt timašalen-năk wăla tiluyyaɣ-năk wăla tebădde-năk hărkuk dăɣ-a-wa hed. Ǝssanăɣ a-s wăr tĕṣberăd erk ăddinăt; ăddinăt-wi jannănen s-bahu a-s ĕntăneḍ inĕmmušal-in a ămoosăn uhĕn-dăɣ wăr ămoosăn a-wen, torămăd-tăn, tăsfăkkărăd-dd a-s inĕsbuha a ămoosăn iket-dăɣ-năsăn. 3 Ǝssanăɣ a-s tĕbdadăd hărkuk dăɣ-a-wa hed, tĕnhăyăd aɣăna dăɣ-tĕssĕba n-isĕm-in măšan, tĕṣbărăd, wăr kăy-ikkes a-wen dăɣ-a-wa hed. 4 Hakd a-wen-dăɣ, ikm'-ahi fălla-k hărăt iyyăn: tărha tĕdi-hi tăzzarăt s-kăla hi-tăt-jed, ăbas-hi-tăt-jed, tăqqălăd săr-s. 5 A-wen-dăɣ a făl, ĕktĕw-dd adwĕylĕl wa s-kăla t-jed dăɣ-dd-toḍed, tutabăd, tăqqĕlăd-in timašalen-năk ti n-ibda. Afăl wăr jed a-wen, he-kăyy! Malăɣ-kăy-in; afăl kăy-in-ogăẓăɣ wăr tătubăd, ad-ĕkkĕsăɣ tefătelt-năk dăɣ-edăgg-net. 6 A-wen, wăr hin-ikkes a-s, ijraẓ-ahi fălla-k mikḍaw wa jed d-timašalen n-kăl-Nikula-i dăr-jed mikḍaw wa dăr-săn jeɣ. 7 Ere ilăn timĕẓẓujen-dăɣ s-islă, isăjdet i-măjrăd wa ităjj Unfas Šăddijăn i-ălkănisăten. Wa ikrăšăn tărna făll-Iblis d-tănḍărbaten-net, ad-t-šăkšăɣ aratăn n-ahĕšk wa n-tămudre ihăn ălžănnăt n-Măssinăɣ.' " 8 Ătwănn'-ahi ḍarăt-a-wen: "Ǝktĕb i-ănjălos n-ălkănisăt ta hăt aɣrĕm wa n-Smirna, ănn'-as: 'Inn'-ak wa n-Tizarăt d-Tilkamăt, wa ămmun, iddăr-dd, 9 ĕssanăɣ ĕmmĕk wa s-tătwarămăd d-ĕllăqqu-năk măšan hakd a-wen-dăɣ, kăyy a-s ăgg-ehăre wa n-tidĕt. Ǝssanăɣ făll-tăllăbăsen-ti kăy-sawarăn ăddinăt wi jannănen s-bahu a-s dăgg-Iṣrayil a ămoosăn, a-s ija a-wen, wăr ămoosăn ɣas ar ehăn n-ăddin n-inaɣbadăn n-Iblis. 10 Wăr kăy-isărmaɣet ălɣizabăt wa kăy-mad-sĕknĕn. Ad-ăj Iblis i ăjjootnen dăɣ-wăn dăɣ-takărmut i-ad-tăn-ižžurrĕb s-a-wen-dăɣ, tĕjĕm măraw išilan titwĕžžurribăm dăɣ-tĕssĕba n-ăddin-năwăn. Kăyy, ĕṭṭĕf immun kud-dăɣ hak-t tamăttant a-wen. Afăl dd-tĕzjărăd a-wen, ad-hak-ăjăɣ ălhăk, takĕnbut ta n-tămudre tăɣlălăt. 11 Ere ilăn timĕẓẓujen-dăɣ s-islă, isăjdet i-măjrăd wa ităjj Unfas Šăddijăn n-Măssinăɣ i-ălkanisatăn. Wa ikrăšăn ašăl făll-Iblis d-tănḍărbaten-net, wăr-iha miši n-ad-inhĕy tamăttant ta s-sănatăt.' " 12 Ătwănn'-ahi daɣ: "Ǝktĕb i-ănjălos n-ălkănisăt ta hăt aɣrĕm wa n-Birɣamus, ănn'-as: 'Inn'-ak Wa iṭṭăfăn tăkoba ta s-ĕmsădăn imawăn-net issĕnăn: 13 Ǝssanăɣ diha d-tĕzzăɣăd, dihen-dăɣ ad-tĕkkăs tĕmmĕnukĕla n-Iblis ifĕklan-net. Intibbas wa n-ămaksaḍ-in n-ămaɣdal-in, ɣur-wăn di-dăɣ d-izzăɣ Iblis ad-t-ăba. Hakd a-wen-dăɣ, tăqqimăd-dd kăyy, tosaɣăd dăr-i, wăr tăkkuddălăd immun-năk. 14 Măšan, ill'-e a ĕnḍărrăn hi-ikman fălla-k: ĕllan-t ɣur-k ăddinăt ĕṭṭafnen tayĕtte ta n-Balam-i ittărăn ad-ăj ăddăbara i-Balak i-ad-ĕkšĕn kăl-Iṣrayil isan n-taɣsiwen ămoosnen takute i-ăṣṣănămăn, ĕkfăn iman-năsăn i-iba n-tăkrakiḍt, ad-zinnun ḍarăt-a-wen. 15 Ǝllan-t daɣ ɣur-k ăddinăt s-ĕjraẓnăt timašalen ti n-inĕṭṭulab wi n-Nikula. 16 A-wen-dăɣ a făl, utab iket-di d-kăy-in-tisăɣ ĕknĕsăɣ erk ăddinăt wi kăwăn-hănen s-tăkoba ta hăt emm-in. 17 Ere ilăn timĕẓẓujen-dăɣ s-islă, isăjdet i-măjrăd wa ităjj Unfas Šăddijăn i-ălkănisăten. Wa ikrăšăn ašăl făll-Iblis d-tănḍărbaten-net, ad-t-ăkfăɣ mana, a-wen, amĕnsi n-talĕmmiẓt wărăn ătwăzzăy, ăkfăɣ-t taẓẓĕdt măllăt făll-iktăb isĕm ăynayăn s-wăr t-illa ere t-issanăn săl ere wa ijrăwăn taẓẓĕdt-ten-dăɣ.' " 18 "Ǝktĕb i-ănjălos n-ălkănisăt ta hăt aɣrĕm wa n-Tĕyatir, ănn'-as: 'Inn'-ak Wa s-itawănna Rure-s n-Măssinăɣ s-olăhnăt tiṭṭawen-net d-efew ăhijăljălăn s-ăsimăɣmăɣăn iḍarăn-net šund daroɣ ăzziizzăwen: 19 Ǝssanăɣ făll-timašalen-năk d-tărha ta jed i-ăddinăt d-iqqud wa jed dăɣ-immun săr-i d-ĕmmĕk wa s-tĕdhălăd tilăqqiwen d-tebădde n-hărkuk ta jed dăɣ-a-wa hed. Ǝssanăɣ a-s timašalen-năk ti n-ašăl-i-dăɣ, ojărnăt ti n-ibda 20 măšan, ikm'-ahi fălla-k a-wa-s tăqbălăd i-tamăḍt ta-s isĕm-net Yizabil jănnet s-bahu tănnăbit n-Măssinăɣ tajjăt isălan-net a tămoos, taqqăl i-inaxdimăn-in ĕssĕbab n-tanmĕšrayt ed jarrăw-asăn s-bahu dăɣ-asĕssăɣăr-net, tetăte n-isan n-taɣsiwen ămoosnen takute i-ăṣṣănămăn, ad-zinnun ḍarăt-a-wen. 21 Ǝkfeɣ-tăt ăzzăman dăɣ-tătub măšan tunjăy tĕbḍa d-ĕlkăxbu-net. 22 Dăɣ-tĕssĕba n-a-wen-dăɣ a făl tăt-mad-ăjrăɣ făll-isĕftaɣ s-tisnant. Afăl daɣ wăr-ătubăn imidiwăn-net wi dăr-tărtăy dăɣ-ĕlkăxbu, afăl wăr-oyyen amišĕl n-a-wa hasăn-janna, ad-tăn-săknăɣ aɣăna ăssuuksăḍăn iket-dăɣ-năsăn. 23 Siwĕḍăɣ făll-a-wen-dăɣ iket-net tenăɣe n-aratăn-net kĕrĕf. Afăl ija a-wen, ad-ĕlmĕdnăt ălkănisăten iket-năsnăt a-s năkk, năkk a issanăn a-wa dăɣ-zinĕzjumun dăgg-adĕm d-a-wa sadărhanăn. Hak ăwadĕm, ad-has-ăjăɣ ălhăk wa dăr-ăniihăjjăn ijităn-net. 24 Ǝnneɣ i-ăddinăt wi iyyăḍnen hănen ălkănisăt ta n-aɣrĕm wa n-Tĕyatir, wăren ĕlkem i-a-wa jănn tamăḍt ĕnnin-dăɣ, wăr-ĕlmedăn a-wa-s itawănna hărătăn wi n-Iblis ăttunkălnen, wăr kăwăn-ăswărăɣ uḍlem wăl' iyyăn. 25 Ăknăt asĕmmĕgĕggi dăɣ-immun wa tĕṭṭăfăm har kăwăn-in-asăɣ. 26 Wi n-imărnan ăllilnen erhet-in har ašăl wa ilkămăn, ad-tăn-sĕmmĕnukĕlăɣ făll-tiwsaten, 27 ăkfăɣ-tăn tĕmmĕnukĕla ta hi-ikfa Abba-nin, sĕmmĕnukĕlăɣ-tăn făll-tiwsaten, ĕḍnĕn-tănăt s-ăṣṣahăt, ĕjĕn-asnăt atăɣtăɣ wa ităjj ăwadĕm i-aɣăsis iraẓẓ. Wa irnăn, ad-t-ăkfăɣ tatrit ta n-emăɣăr. 29 Ere ilăn timĕẓẓujen-dăɣ s-isla, isăjdet i-a-wa ijănna Unfas Šăddijăn i-ălkănisăten!' "
