Tănăfalilt 19

1Ḍarăt-a-wen-dăɣ, ĕsleɣ i-emăsli ăṣṣoohen dăɣ-išĕnnawăn olăhăn d-i n-tamĕtte tĕknat ĕjut, jannet: "Aleluya! Amĕlăt Măssinăɣ, ĕlɣĕllas d-semɣar d-tărna, i n-Măssinăɣ. 2Ăššăreɣatăn-net, ădduutten, oɣadăn. Ăssoḍa ăššăreɣatăn-net făll-tamăḍt ta n-tălkăxbat măqqărăt samaḍasăt ăddinăt; ăẓẓăl-tăt tamăttant n-inaxdimăn-net." 3Tĕnnă tamĕtte-ĕnnin-dăɣ: "Aleluya! Amĕlăt Emăli făl-a-s ăho n-aɣrĕm wa măqqărăn irɣăn ăhoha s-išĕnnawăn hărkuk, wăr-ilkem ad-ămmikăt." 4Imda a-wen ɣas, ărkăɣăn imɣarăn wi n-sănatăt timĕrwen d-ĕkkoẓ d-hărătăn wi n-ĕkkoẓ ĕddărnen dat-Măssinăɣ-i ăqqiimăn făll-tasăqqaymut ta n-tĕmmĕnukĕla, ăɣbădăn-t, jannen: "Amin! Aleluya!" 5Innă emăsli dd-ifalăn tasăqqaymut ta n-tĕmmĕnukĕla ḍarăt-a-wen: "Amĕlăt Măssinăɣ iket-năwăn kăwăneḍ-i n-eklan-net; kăwăneḍ-i n-imaksaḍăn-net, wi măḍroynen hakd wi ĕššămnen." 6Ǝsleɣ ḍarăt-a-wen i-emăsli iyyăn olăhăn d-i n-tamĕtte tĕknat ĕjut, emăsli-net, olăh d-i n-anji iknan tĕmɣăre meɣ d-ejjajăn ĕknanen ĕṣṣuhu. Ǝnta da a-wa ijănna emăsli-en: "Aleluya! Amĕlăt Emăli făl-a-s Măssinăɣ-i n-Emăli-nănăɣ, ila tărna iket-net, issĕtbăt Tĕmmĕnĕya-net. 7Dăwătăt-anăɣ, ĕjrăẓnet-anăɣ iman-nănăɣ, nĕsĕmɣăret-t făl-a-s, ămăra-dăɣ, aẓli wa n-Ašăɣol a dd-iwwăḍăn, hănne-s daɣ tăsidăw-as. 8Tĕjrăw asălso n-aẓli iẓmayăn dăɣ-măṣăr n-ălxărir iknan tĕlĕmḍe, ăsiimăɣmăɣ, šăddiij; măṣăr-ĕnnin n-ălxărir, ĕnta a-s imărkedăn wi ămešălăn imĕššeddĕjăn n-Măssinăɣ." 9Inn'-ahi ănjălos ămăra ad-ĕktĕbăɣ: "Tĕnḍĕḍ i-ăddinăt wi dd-e-ĕtwăɣrĕnen s-amăjaru wa he-ijĕn ašăl wa n-aẓli n-Ašăɣol." Olăs daɣ, inn'-ahi: "Măjrăd-wa-dăɣ, Măssinăɣ iman-net a dd-ifal; wăr t-ih' ăššăk a-wen." 10Ărkăɣăɣ dat-ănjălos dăɣ-ĕnniyăt n-ad-t-ăɣbĕdăɣ măšan, inn'-ahi: "Ahaa, wăr jed a-di. Akli n-Măssinăɣ dăr-k olăhăn a ămoosăɣ năkk d-ayĕtma-k wi ăɣdălnen i-tidĕt ta dd-ăsnăfalăl Ɣisa. Ăɣbĕd Măssinăɣ, wăr hi-tăɣbedăd." Tidĕt daɣ ta dd-ăsnăfalăl Ɣisa, ĕnta a dd-ăssawăḍăn ănnăbităn. 11Ǝnhăyăɣ ḍarăt-a-wen išĕnnawăn ămerăn, izjăr-tăn-dd ebăje măllăn. Inay-t ăhalĕs s-isĕm-net: "Ămaɣdal d-emăn n-tidĕt." Wăr-iššărrăɣ ar s-iqqud, wăr-ikĕnnĕs ar s-iqqud. 12Ăhijăljălnăt tiṭṭawen-net šund efew; eɣăf-net, warnăt tikĕnbuten ti n-tĕmmĕnukĕla, iktab fălla-s isĕm s-ĕnta ɣas a t-issanăn. 13Ilsa abărnuš ilmaɣăn dăɣ-ašni, isĕm-net: "Măjrăd n-Măssinăɣ." 14Ǝlkamăn-as ĕlɣĕskărăn wi n-išĕnnawăn nayăn ibĕjwan măllolnen, ĕlsan timălsaten n-ălxărir măllolnen, šăddijnen, ĕknanen tĕlĕmḍe. 15Emm-net, tĕzjar-t-dd tăkoba tĕmsădăt s-ĕnta-en-dăɣ a-s mad-iwĕt ĕddĕwĕlăn, ărn'-en. Ad-fălla-săn ixkĕm s-ăṣṣahăt olăhăn d-wa n-tăẓoli; ad-dăɣ-săn dd-ikkĕs Măssinăɣ-i ilăn tărna iket-net aḍkăr-net wa măqqărăn s-ĕmmĕk wa s-iẓimmĕw ăwadĕm ara n-lăɣnăb i-ad-dăɣ-s dd-ikkĕs aman-net. 16Abărnuš-net d-taɣma-net, iktab fălla-săn: "Ă|scMĂNOKAL N-IMĂNOKALĂN,|r E|scMĂLI N-IMĂLAN|d".|r 17Ǝnhăyăɣ ḍarăt-a-wen ănjălos ibdadăn dăɣ-tăfukt, ăsɣărăt s-afălla i-igḍaḍ iket-năsăn wi taggădnen dăɣ-ălhăwa wa ujĕjăn, inn'-asăn: "Idawăt-dd i-amăjaru wa măqqărăn n-Măssinăɣ. 18Ǝyyăwăt, ăkšăt isan n-imănokalăn d-isan n-imizărăn n-ĕlɣĕskăr d-isan n-ĕlɣĕskăr d-isan n-ibĕjwan d-wi n-ăddinăt wi tăn-năynen, isan n-ăddinăt a ămoosăn-dăɣ, wi n-ilăllan hakd wi n-eklan, isan n-wi măḍroynen hakd wi ĕššămnen." 19Ǝnhăyăɣ ălwăqq-wen ămudăr wa ăzzarăn d-imănokalăn n-ăkall d-ĕlɣĕskărăn-năsăn, ăddewăn-dd i-ad-ĕknĕsăn ăhalĕs wa inăyăn ebăje d-ĕlɣĕskăr-net. 20Ittărmăs ămudăr iman-net s-tizarăt, ittărmăs-dd ḍara-s ănnăbi wa n-bahu ijan a olăhăn d-ijităn n-Măssinăɣ dat-ămudăr i-ad săr-săn išĕšk ăddinăt wi iwăr aẓăẓlo wa n-ămudăr ăɣbădnen ăṭṭăṣwer-net. Ătwăjăr-in ămudăr d-ănnăbi wa n-bahu dăɣ-tebănɣăwt n-ĕlkăbrit ăhijăljălăn. 21Tănɣa tăkoba ta dd-tĕzjărăt emm n-ăhalĕs wa inăyăn ebăje ĕlɣĕskăr-năsăn iket-net, ĕyyĕwănăn igḍaḍ ḍarăt-a-wen dăɣ-timăɣsa-năsăn.

will be added

X\