Tănăfalilt 18

1Ḍarăt hărătăn-win-dăɣ, ĕnhăyăɣ ănjălos iyyăn a-s dd-ăzzubbăt išĕnnawăn. Ănjălos-en, emăṣṣehi n-tikunen a ămoos, ăsmălăwlăw s-ănnur-net ăkall iket-net. 2Iḍkăl emăsli-net s-afălla, innă: "Toḍă, ya toḍă, Babilun ta măqqărăt toḍă! Ăbas tăqqal ămăra-dăɣ ar edăgg ĕzzaɣăn alšinăn, tăhala n-inămmăḍăsăn, tăhănzabbut n-igḍaḍ wi ĕmmĕḍăsnen d-imudărăn wi ămmiḍăsnen ăsjălălhăynen. 3Ǝddĕwĕlăn iket-dăɣ-năsăn a ĕswănen dăɣ-asmĕd n-ĕlkăxbu-net wa wărăn ila eket. Imănokalăn n-ăkall iket-net ohărăn dăr-s ĕlkăxbu-net. Ăttužžar n-ăkall iket-dăɣ-năsăn, ărzăɣăn dăɣ-ilalăn-net wi s-wăr t-illa a dăr-olăhăn tihusay wăla nefran." 4Olăsăɣ daɣ măsăllăt n-emăsli dd-ifalăn išĕnnawăn innăn: "Ăddinăt-in, ĕzjărăt-dd ammas n-aɣrĕm-wa-dăɣ i-ad-wăr dăr-s toherăm ibăkkaḍăn-net, sărtĕyăn-kăwăn dăr-s ălmăṣṣibatăn wi fălla-s e-iḍunen, 5făl-a-s ibăkkaḍăn-net, timtulun har ĕwwăḍăn išĕnnawăn. Măssinăɣ daɣ, wăr hin-ittĕwa erk imojjan-net. 6Ăjăt-as a-wa tĕja i-ăddinăt wi iyyăḍnen, ăɣšĕdăt-as anăḍfus n-a-wa tăɣšăd; sĕnnĕḍfĕsăt-as ăṣṣahăt n-alkas-net n-asmĕd wa tĕssĕswă tamĕtte. 7Săknăt-tăt ălɣizabăt d-aɣăna ogdăhnen d-ălxurmăt d-tănoflayt ta tĕkfă iman-net ĕnta-i jănnet dăɣ-iman-net: 'Năkk, tămănokalt a ămoosăɣ, wăr heɣ miši n-ad-iba ăhalĕs-in, wăr-ilkem daɣ ad-ăqqalăɣ tănuḍăft.' 8A-wen-dăɣ a făl ălmăṣṣibatăn wi has-ĕtwărnen, ad-fălla-s dd-ĕjĕn iyyăn n-ejăḍăl dăɣ-iyyăn n-ašăl, tiḍĕw-dd fălla-s tamăttant d-tahăla d-laẓ, ăkš-et efew făl-a-s Emăli-i tăt-e-išrăɣăn, ila tărna." 9Ălwăqq-wen, ad-ĕlhĕn imănokalăn n-ăkall wi dăr-s ohărnen ĕlkăxbu-net d-tănoflayt-net, ad-sĕkkĕlĕlăn fălla-s afăl ĕnhăyăn ăho n-efew wa tăt-itattăn ikk' išĕnnawăn, 10ad-ĕbdĕdăn imămokalăn-ĕnnin-dăɣ ijĕj făl tuksĕḍa n-ad-tăn-irmĕs ălmăṣṣibăt wa oḍăn făll-aɣrĕm. Ǝbdĕdăn dihen, ad-jannen: "Xăxx-dăɣ, unhh xăxx-dăɣ! Aɣrĕm-nănăɣ Babilun, Babilun wa măqqărăn ăṣṣoohen, a-wa šăɣnet, ăššăreɣa-net, wăr dd-okey iyyăn n-ăssaɣăt." 11Ăttužžar n-ăkall, ad-ĕlhĕn ĕntăneḍ-dăɣ, ĕṭṭĕfăn iba n-aɣrĕm wa n-Babilun ed ăbas t-illa ere ižžĕnšăn ilalăn-năsăn. 12Orăɣ-năsăn d-aẓrĕf d-tikădăyen ti n-tilăllaten d-timăɣwanen d-ălxărerăn-năsăn d-tabduɣt ta šăggăɣăt tăsmăɣmăɣăt lăt ălqim, d-e d t-illăm ănnuɣ ihan isăɣerăn wi s-wăr răqqis ajăraw-năsăn d-e d t-illăm ănnuɣ n-tăhore jat s-isenăn n-elwan meɣ dăɣ-ihĕškan n-aḍutăn meɣ dăɣ-daroɣ meɣ dăɣ-tăẓoli meɣ dăɣ-ălhor 13d-ĕlɣĕnfărăn d-iẓĕdraẓ wi iyyăḍnen d-aḍutăn d-telḍĕḍt d-matălxer d-asmĕd d-ĕzzăyt d-ejel n-ălkăma d-iwan d-tihatten d-ibĕjwan d-turfen ti n-amjăr d-eklan d-wăla iman n-ăddinăt. 14Ad-ăj a-wen-dăɣ iket-net, ad-itawănna dăɣ-Babilun: "Xăxx, unhh, xăxx-dăɣ! Hărătăn wi s-kăla tăn-tĕkned tărha iket-năsăn ăbă-tăn fălla-m, ărrĕzăɣ-năm d-tănoflayt iket-net, ad-t-iba fălla-m, wăr-ilkem daɣ ad-tăn-tolasăd ajăraw. 15Ăttužžar daɣ wi ărzăɣnen s-mamăla wa s-kăla t-ĕjăn dăɣ-aɣrĕm, ad-has-ĕbdadăn dăɣ-ijĕj făl tuksĕḍa n-ad-fălla-săn iḍĕw ălmăṣṣibăt wa oḍăn făll-aɣrĕm, ad-hallăn, ĕṭṭafăn iba. 16Jannen: 'Xăxx-dăɣ, unhh, xăxx-dăɣ, aɣrĕm-nănăɣ wa măqqărăn irẓa; kăla ilsa imălsan n-ălxărir ĕknanen tĕlĕmḍe d-măṣăr ijan tĕšuɣe ta tăsmăɣmăɣăt iknan tĕla n-ălqim, ija uɣnawăn n-orăɣ d-tikădăyen ti n-tilăllaten d-timăɣwanen.' 17Ɣas ehăre ogdăhăn d-wa-dăɣ iket-net, ăsbăt-t-in fălla-m iyyăn n-ăssaɣăt. Ăddinăt daɣ iket-năsăn wi šašalnen turfen ti n-aman d-imĕssukal wi tiwĕyĕn dăɣ-turfen-năsăn, d-wi xaddămnen dăɣ-turfen-năsăn d-wi ĕddarnen s-a-wa dd-izajjărăn ejărew iket-net, ĕbdadăn iket-năsăn dăɣ-ijĕj, 18ĕkyadăn dăɣ-ăho n-aɣrĕm wa dăɣ-irɣa efew, jannen: 'Wăr kăla t-imăl aɣrĕm ogdăhăn d-wa-dăɣ tĕmɣăre.' 19Ad-sawarăn ăkall iɣăfawăn-năsăn, hallăn, širšun, ĕṭṭafăn iba, jannen: 'Xăxx, unhh xăxx-dăɣ Babilun! Aɣrĕm wa măqqărăn, ărrĕzăɣ-net a dăɣ-razzăɣăn ăddinăt iket-năsăn wi lănen turfen ărjăšnen făll-ejărew măšan, a-wen-dăɣ iket-net, ăsbăt-in fălla-m iyyăn n-ăssaɣăt.' 20Ya kăl-išĕnnawăn, dăwătăt dăɣ-tĕssĕba n-a-wa s-Babilun, toḍă, tĕhlăk. Tăddăwătet tamĕtte ta n-imĕššeddĕjăn n-Măssinăɣ d-inĕmmušal d-ănnăbităn făl-a-s, iẓăl dăɣ-s Măssinăɣ terwidĕma ta kăwăn-tĕssĕkna." 21Irmăs ălwăqq-wen ănjălos ăṣṣoohen tăhunt ta măqqărăt tolăhăt d-ta făll-itĕẓẓad ălkăma, ijăr-tăt-in dăɣ-ejărew, innă: "Ǝmmĕk-wa-dăɣ a-s hin-e-itwĕjăr aɣrĕm wa n-Babilun măqqărăn s-ăṣṣahăt, iba-t-in s-iyyăt, wăr-ilkem ad-ătiwănhăy. 22Wăr-ilkem ad-dăɣ-s ija emăsli n-imăwatăn n-tihărdănen d-imănẓarăn d-imăwatăn n-tiɣnab d-tisinsăɣen. Wăr-ilkem, ad-dd-ătiwăjrăw dăɣ-ammas-năk, amăhhăraw wăl' iyyăn, wăr-ilkem ad-ɣur-k ătiwăsla emăsli n-ere itĕẓẓadăn ălkăma. 23Wăr-ilkem ad-dăɣ-s tărɣa tefătelt, wăla ad-dăɣ-s ĕnḍawăn imaẓlayăn eɣări. Ăttužžar-năk, ĕntăneḍ a-s kăla ojărăn ărrĕzăɣ dăɣ-ăddunya, tĕššĕškăd timĕttawen iket-năsnăt s-išăɣăwăn-năk." 24Babilun ĕnta, a dăɣ-inɣăl ašni n-ănnăbităn d-imĕššeddĕjăn d-ašni n-ăddinăt iket-năsăn wi ătwăɣrăsnen făll-ărori n-ăkall.

will be added

X\