Tănăfalilt 17

1Ija a-wen-dăɣ ɣas, inn'-ahi iyyăn dăɣ-ĕssa ănjălosăn wi ĕṭṭăfnen ĕssa alkasăn: "Ǝyyăw, ad-kăy-săknăɣ ăddăyyăt wa he-iḍĕwăn făll-tălkăxbat ta măqqărăt. Tălkăxbat-i-hi, ĕnta a-s aɣrĕm wa măqqărăn idăyăn făll-asălim n-ejărew wa sĕmmăn. 2Tălkăxbat daɣ ta-dăɣ, ohărăn dăr-s imănokalăn n-ăkall ĕlkăxbu-net, ĕswăn daɣ imuzăɣăn n-ăkall iket-năsăn dăɣ-asmĕd n-ĕlkăxbu-net, ikkăs dăɣ-săn a-wen ĕnniyăt." 3Irmăs-ahi Unfas Šăddijăn, izzĕwăt-ahi s-tenere tiyyăt. Ǝnhăyăɣ dihen tamăḍt tăqqimăt făll-ămudăr šăggăɣăn făll-ĕktabăn ismawăn gaggărnen Măssinăɣ, ila daɣ ĕssa iɣăfawăn d-măraw iskawăn. 4Tamăḍt-ĕnnin ĕnta, tĕlsa isĕlsa šăggaɣnen lanen ălqim, tăsisahăɣ ašăl s-uɣnawăn n-orăɣ d-tikădăyen ti n-tilăllaten lănen ălqim d-timăɣwanen. Tĕṭṭaf dăɣ-ăfuss-net alkas n-orăɣ iḍkarăn tilušawen d-a-wa xăramăn dd-orăw a-wa tămešăl dăɣ-ĕlkăxbu-net. 5Timme-net, iktab fălla-s isĕm s-ăttunkăl ălmăɣna-net. Ǝnta da a-wa fălla-s iktăbăn: "A-wa Babilun ta măqqărăt n-ma-s n-tălkăxbaten d-tilušawen n-ăddunya." 6Ǝnhăyăɣ a-s tamăḍt-i-dăɣ, ikkăs dăɣ-s ašni n-imĕššeddĕjăn d-tijuhawen n-Ɣisa wa tĕswa ĕnniyăt. Ǝnhăyăɣ tamăḍt ĕnnin ɣas, iqqăn eɣăf-in. 7Inn'-ahi ănjălos ălwăqq-wen: "Ma iqqanăn eɣăf-năk? Ad-hak-ăllăɣeɣ ălmăɣna n-ĕddăraj n-tamăḍt d-ămudăr wa năy ilăn ĕssa iɣăfawăn d-măraw iskawăn. 8Ămudăr wa hannăyăd, kăla iddăr măšan, ăbas iddar, ila s-ad-dd-izjăr anu wa wărăn ila ider ihăn ălaxărăt, ijjĕš edăgg wa n-eheḍ-net. Ăddinăt wi s-wăr-ĕktebăn ismawăn-năsăn dăɣ-ĕlkĕttab wa n-tămudre ɣur-alăṣăl n-ăddunya afăl ĕnhăyăn ămudăr-ĕnnin-dăɣ, ad-tăn-tărmĕs tăkunt făl-a-s ămudăr-i-hi, kăla iddăr, ămmut măšan, ilkam ad-dd-iddăr daɣ." 9Edăgg-wa-dăɣ, ăniihăjja d-tĕla n-tayĕtte d-sărho. Iɣăfawăn n-ămudăr wi n-ĕssa a-s ĕssayăt tiḍaɣen ti făll-tăqqima tamăḍt, 10ĕssa iɣăfawăn-winnin-hi, ĕssa imănokalăn; ămmun sĕmmos dăɣ-săn, iyyăn dăɣ-săn ixkam hărwa; wa s-ĕssa, wăr dd-osa hărwa măšan, afăl dd-osa, wăr-e ăj ar ăssaɣăt ĕnḍărrăn dăɣ-tĕmmĕnukĕla. 11Ămudăr wa s-kăla t-illa, ăba, ĕnta a-s ămănokal wa s-ĕttam; ĕnta-i hi, eheḍ-net ɣas a-s oɣad. 12Măraw iskawăn wi tĕnhăyăd, ĕntăneḍ a-s măraw imănokalăn wăren ĕney hărwa măšan, hak iyyăn dăɣ-săn dăɣ, ad-ăj ăzzăman n-tĕmmĕnukĕla ĕnḍărrăn ĕnta d-ămudăr 13făl-a-s măraw imănokalăn-i-hi, oharăn ittus, ărhan ad-săxdĕmăn ăṣṣahăt-năsăn d-ĕlxĕkum-năsăn i-ămudăr. 14Ad-ĕbdĕdăn iket-dăɣ-năsăn, ĕknĕsăn Ašăɣol măšan, ad-tăn-ărn ed ĕnta a-s Emăli n-imălan d-Ămănokal n-imănokalăn; ad-tăn-ărn ĕnta d-wi dd-iɣra s-iman-net, ăsnăfrăn n-imaɣdalăn. 15Inn'-ahi ănjălos daɣ: "Aman wi tĕnhăyăd tĕbdad tălkăxbat edes-hasăn, aman-en-dăɣ a-s hărăt dăɣ-tumasen d-timĕttawen tiyyăḍ d-ĕddĕwĕlăn iyyăḍ d-awalăn iyyăḍ. 16Ămăra, măraw iskawăn wi tĕnhăyăd, ilkam ad-aḍĕnăn aḍkăr i-tălkăxbat ĕntăneḍ d-ămudăr, ad-dăɣ-s ahĕɣăn a-wa la iket-net, ĕzzĕfăn-tăt, ăɣrĕsăn-as, ĕkšĕn isan-net, sărɣĕn a-wa dd-ijlăšăn dăɣ-s 17făl-a-s ija Măssinăɣ dăɣ-ulhawăn-năsăn erhet n-ad-ămašălăn ittus-net; ad-ănnăfhămăn făl ad-sărtĕyăn tădabit ta tăn-tĕkfa tĕmmĕnukĕla-năsăn, ăxdĕmăn săr-s erhet n-ămudăr har itbĕt măjrăd n-Măssinăɣ iket-net. 18Ḍarăt-a-wen daɣ, tamăḍt ta tĕnhăyăd, ĕnta a-s aɣrĕm wa măqqărăn ănnihăḍăn dăɣ-imănokalăn n-ăkall iket-net."

will be added

X\