1 Ḍarăt a-wen-dăɣ, olăsăɣ i-măsăllăt n-emăsli ăṣṣoohen dd-ifalăn ehăn n-ămudd wa măqqărăn. Innă i-ănjălosăn wi n-ĕssa: "Ăglăt, sănɣĕlăt făll-ăkall ĕssa alkasăn wi ĕḍkărnen aḍkăr n-Măssinăɣ." 2 Igl' ănjălos wa ăzzarăn, issănɣăl alkas-net făll-ăkall. Ija a-wen ɣas, ĕzjărnăt-dd tikussawen sămuumnen lăbasnen ăddinăt wi iwăr ešwăl n-ămudăr, ɣabbădnen tele-net. 3 Issănɣăl ănjălos wa s-ĕssin alkas-net dăɣ-ejărew wa sĕmmăn. Ija a-wen ɣas, olăhăn aman n-ejărew d-ašni n-enĕmmettĕn, ămmut a-wa-dăɣ ihăn ejărew wa sĕmmăn iket-dăɣ-net. 4 Igl' ănjălos wa s-kăraḍ, issănɣăl alkas-net dăɣ-ijĕrwan d-ersan wi n-aman, ĕqqălăn aman-năsăn ašni. 5 Ǝsleɣ ălwăqq-wen i-ănjălos wa ănnihăḍăn făll-aman a-s innă: "Kăyy a oɣadăn, kăyy a t-illan, tĕlled-t, kăyy a šăddijăn ed ăššăreɣa wa tăɣtăsăd, oɣad hărkuk, 6 făl-a-s dăgg-adĕm, ĕssănɣălăn ašni n-imĕsšeddĕjăn d-ănnăbităn. Ămăra, tĕkfed-tăn ašni i-ad-t-ĕswĕn ed a-wen-dăɣ a dăr-ăniihăjjăn." 7 Olăsăɣ măsăllăt n-emăsli dd-ifalăn tasĕskărt ta n-tikutawen hăt ehăn n-ămudd wa măqqărăn, innă: "Emăli Măssinăɣ-i ilăn tărna iket-net, ăššăreɣatăn-năk, tidĕt, oɣadăn iket-dăɣ-năsăn." 8 Issănɣăl ḍarăt-a-wen ănjălos wa s-ĕkkoẓ alkas-net făll-tăfukt, tĕjrăw tăfukt turhajăt n-ad-sĕkkĕnĕnnĕwĕt e d t-illăm ăgg-adĕm s-tukĕse-net. 9 Ad-siknĕnnĕwĕt tukĕse-i-dăɣ măqqărăt dd-ja tăfukt dăgg-adĕm. Hakd a-wen-dăɣ, gaggărăn dăgg-adĕm Măssinăɣ-i iṭṭafăn ălmăṣṣibatăn-en, unjăyăn s-ad-utabăn i-ad-sĕmɣărăn Măssinăɣ. 10 Issănɣăl ănjălos wa s-sĕmmos alkas-net făll-tasăqqaymut n-tĕmmĕnukĕla ta n-ămudăr. Ija a-wen ɣas, jănăt tihay făll-lamu-net iket-net. Tărmăs tisnant-i-dăɣ măqqărăt dăgg-adĕm har dd-ĕqqălăn ɣas tĕddadăn ilsawăn-năsăn, 11 gaggărăn Măssinăɣ-i ihăn išĕnnawăn dăɣ-tĕssĕba n-tisnant-năsăn d-tikussawen ti săr-săn dd-orăw măšan, hakd a-wen-dăɣ, wăr săr-săn dd-orew a-wen tătubt dăɣ-erk imojjan-năsăn. 12 Issănɣăl ămăra ănjălos wa s-săḍis alkas-net făll-ejărew wa măqqărăn s-itawănna Ifrăyti; ăqqur-in ejărew-en; ĕjrăwăn imănokalăn wi dd-fălnen emăynăj zăbo, okăyăn. 13 Ḍarăt-a-wen, ĕnhăyăɣ kăraḍ unfasăn ămmiḍăsnen olăhnen d-ijăran dd-ĕzjarnen emm n-ăɣata d-emm n-ămudăr d-emm n-ănnăbi wa n-ănăsbahu. 14 A-wen, unfasăn n-alšinăn wi tajjănen ălmăt a olăhăn d-ijităn n-Măssinăɣ; ĕkkăn imănokalăn n-ăkall iket-net i-ad-tăn dd-sĕdĕwĕn i-ašăl wa n-amjăr wa măqqărăn n-Măssinăɣ-i ilăn tărna. 15 Innă Emăli: "Ǝnhĕywăt, ăqqalăɣ-kăwăn-in šund emăkrăḍ; tĕnḍĕḍ i-ere wa ogăẓăn iman-net dăɣ-uzĕf, ad-irjĕš wăr tătwănhăy tăkrakiḍt-net." 16 Ăsdăwăn-dd unfasăn ĕnnin n-kăraḍ imănokalăn n-ăkall s-edăgg wa s-itawănna dăɣ-Ɣăbranĕyya: "Ărmagidun." 17 Issănɣăl ălwăqq-wen ănjălos wa s-ĕssa alkas-net dăɣ-ălhăwa, ija a-wen ɣas, izjăr-dd emăsli ăṣṣoohen tasăqqaymut ta n-tĕmmĕnukĕla hăt ehăn n-ămudd wa măqqărăn; innă emăsli-en: "A-wa ijăn, ijă, isălan ĕmdăn." 18 Jăn essamăn d-imăslan, d-ejjajăn, ijă ăkall aškĕḍkĕḍ ăssuksăḍăn s-a dd-iwăr ăgg-adĕm ărori n-ăkall-dăɣ, wăr kăla ija-i dăr-s olăhăn. 19 Ij' aɣrĕm wa măqqărăn kăraḍăt tirĕẓẓ, oḍăn iɣărman n-e d t-illăm ĕddĕwĕl; wăr hin-ittĕwa Măssinăɣ aɣrĕm wa măqqărăn s-itawănna Băbilun; ăssoḍă-dd aḍkăr-net făll-imuzăɣăn-net šund a-s asmĕd a ĕswan kăl-ăkall-en, ikkăs dăɣ-săn ĕnniyăt. Issĕsw'-e ĕnta ĕlxĕmăr wa ihăn alkas-net, a-wen a t-ămoosăn, asmĕd n-aḍkăr-net wa ojărăn. 20 Ǝlsăn aman ikallăn wi hănen iwtĕlăn, ăbas t-illa a dd-ăẓẓinjăẓăn; 21 oḍăn-dd ijidrăšăn šuharnen făll-dăgg-adĕm, ad-sikuforăn dăɣ-tĕssĕba n-ălmăṣṣibăt wa n-ijidrăšăn făl-a-s ălmăṣṣibăt-en, ija tĕsĕmme n-tikunen.
