Tănăfalilt 15

1Olăsăɣ daɣ ĕnhăyăɣ dăɣ-išĕnnawăn iji n-Măssinăɣ iyyăn ijan tĕmɣăre d-tihusay n-tikunen. Ǝnhăyăɣ ĕssa ănjălosăn ĕṭṭafnen ĕssa ălmăṣṣibatăn; ălmăṣṣibatăn-en, ĕntăneḍ a-s wi n-ajilal ed ĕntăneḍ a dd-maden-isĕmdĕw aḍkăr n-Măssinăɣ. 2Ǝnhăyăɣ ḍarăt-a-wen ejărew wa sĕmmăn, olăh-ahi d-tăšoka, ăhiijăljăl s-efew. Ǝnhăyăɣ daɣ ăddinăt wi ĕkrăšnen tărna făll-ămudăr d-ăṭṭăṣwer-net d-ămaḍin n-isĕm-net, ĕbdadăn făll-ejărew ĕnnin n-tăšoka, ĕṭṭafăn tihărdănen ti s-tĕmmalăn Măssinăɣ. 3Ǝnẓarăn ăssaɣăt-wen-dăɣ tĕmmal ta n-Mosa wa n-akli n-Măssinăɣ d-tĕmmal ta n-Ašăɣol, jannen: "Emăli Măssinăɣ-i ilăn tărna iket-net, wăr t-illa a ojărăn timašalen-năk tĕmɣăre wăla tihusay, kăyy a-s ămănokal n-ăddunya tĕmda; Ibaran-năk, oɣadăn, ămoosăn tidĕt iket-dăɣ-năsăn. 4Mi ihălăn ad-ănn wăr kăy-ăksuḍ? Ănn, wăr irh' asĕmɣar-năk? Kăyy a ɣur-dd-tĕmda tĕšĕdje. Ǝddĕwĕlăn iket-năsăn ad-ărkăɣăn data-k ed iqqud-năk, itbat." 5Olăsăɣ akăyad, ĕnhăyăɣ ehăn n-ămudd d-ehăket wa n-ărkăwăl n-tassaɣt a-s dd-ămera dăɣ-išĕnnawăn. 6Ǝzjărăn-t-dd ĕssa ănjălosăn wi ĕṭṭăfnen ĕssa ălmăṣṣibatăn, ĕlsan ălxărir šăddijăn măllăn, ăsimăɣmăɣăn, ĕjbasăn s-timĕntĕkawen n-orăɣ. 7Ikfa iyyăn dăɣ hărătăn wi n-ĕkkoẓ ĕddărnen ănjălosăn ĕnnin n-ĕssa, ĕssa alkasăn n-orăɣ ĕḍkarnen aḍkăr n-Măssinăɣ-i s-hărkuk iddar. 8Ija a-wen ɣas, iḍkăr ehăn n-ămudd wa măqqărăn ăho dăɣ-tĕssĕba n-ălxurmăt n-Măssinăɣ d-tărna-net, ăbas ăddoobăt ăwadĕm wăl' iyyăn ujĕš n-ehăn n-ămudd wa măqqărăn har akĕyĕn ĕssa ălmăṣṣibatăn wi dd-ăwwăyăn ănjălosăn wi n-ĕssa.

will be added

X\