1 Olăsăɣ daɣ akăyad ḍarăt-a-wen, ĕnhăyăɣ Ašăɣol ibdad făll-taḍaɣt ta n-Sayon. Tĕbdad edes-has temeḍe d-ĕkkoẓăt timĕrwen d-ĕkkoẓ n-efăḍ n-ăwadĕm wi s-iktăb isĕm-net d-isĕm n-Abba făll-timmawen-năsăn. 2 Ǝsleɣ i-emăsli dd-ifalăn išĕnnawăn; emăsli-en, olăh d-wa n-tinăzzămăren n-ejărew wa sĕmmăn, olăh ɣas d-ejjaj ijjajăn. Emăsli wa s-ĕsleɣ, olăh ɣas d-i n-tihărdănen watnen. 3 Tăwway tamĕtte-ten-dăɣ tĕmmal tăynayăt dat-tasăqqaymut ta n-tĕmmĕnukĕla d-hărătăn wi n-ĕkkoẓ ĕddărnen d-dat-imɣarăn. Tĕmmal-en, wăr t-illa ere ăddoben almud-net a săl ăddinăt-win-dăɣ n-temeḍe d-ĕkkoẓăt timĕrwen d-ĕkkoẓ n-efăḍ dd-ăsdărfăt Măssinăɣ dăɣ-ăddunya. 4 Ăddinăt-en-hi, wăr-ăsmăḍăsăn iman-năsăn s-tiḍeḍen, wăr-ĕzzeyăn tiḍeḍen. Ǝlkamăn i-Ašăɣol e-s ikka-dăɣ, ăsdărfăt-tăn-dd jer-dăgg-adĕm i-ad-umasăn wi ikrăš Măssinăɣ d-Ašăɣol s-tizarăt. 5 Imawăn n-ăddinăt-en, wăr kăla tăn-dd-izjăr bahu, wăr t-illa ălɣib tăn-iwarăn. 6 Olăsăɣ ḍarăt-a-wen ahănay n-ănjălos iyyăn daɣ illayăn dăɣ-ijĕj n-ălhăwa, ĕnta a iṭṭafăn Ălĕnžil wa iɣlălăn, isalănžat kăl-ăddunya iket-net, e d t-illăm ĕddĕwĕl d-e d t-tĕllăm tawset d-e d t-illăm awal d-e d t-tĕllăm tamĕtte. 7 Ănjălos-ĕnnin-hi, iḍkal emăsli-net, ijanna: "Uksaḍăt Măssinăɣ, sĕmɣărăm-t făl-a-s ašăl wa n-tebădde, osă-dd; amĕlăt-t ĕnta-i dd-ixlăkăn išĕnnawăn d-ăkall d-ejărew wa sĕmmăn d-ersan." 8 Ănjălos-ĕnnin, išrăy-t-dd iyyăn, ijannen: "Babilun ta măqqărăt, toḍa, ya toḍa. Ǝnta-i tĕssĕswăt asmĕd n-ĕlkăxbu-net wa okăyăn ămaku i-ĕddĕwĕlăn iket-dăɣ-năsăn, toḍa ămăra." 9 Išrăy-tăn-dd ănjălos wa s-kăraḍ, iḍkăl emăsli-net, innă: "Afăl irkăɣ ăwadĕm dat-ămudăr meɣ dat-ăṭṭăṣwer-net, meɣ iwăr-t ešwăl-net idĕm-net meɣ ăfuss-net, 10 ijmaḍ-t ăššăk a-s ad-t-isĕsĕw Măssinăɣ ĕlxĕmăr n-aḍkăr-net wăr-iqqer hărăt wa mad-isănɣĕl dăɣ-alkas-net wa n-aḍkăr. Ăddinăt-en, ad-ĕqquzzĕben dăɣ-ĕlkăbrit wa ăhjăljălăn dat-ănjălosăn wi šăddijnen d-dat-Ašăɣol. 11 Ăho n-efew wa tăn-itiɣĕzzĕben, hărkuk ɣas intas. Wăr mad-sunfĕn s-ehăḍ wăla s-ašăl ăddinăt wi ărkăɣnen i-ămudăr meɣ ăṭṭăṣwer-net, d-ere iwar ešwăl n-isĕm-net iket-net." 12 A-wa ăssaɣăt s-hak emĕššeddĕj-dăɣ, ibdĕdet făll-iman-net, ikuyĕdet dăɣ-immun s-Ɣisa, ămašăl alămărăn n-Măssinăɣ. 13 Ǝsleɣ ḍarăt-a-wen dăɣ-išĕnnawăn i-emăsli innăn: "Ǝktĕb: ɣur-ašăl-i-dăɣ, tĕnḍĕḍ i-wi ăba ăxdamăn i-Emăli! Tidĕt a-wen, innă Unfas Šăddijăn făl-a-s ad-sunfĕn dăɣ-ălxidmăt-năsăn ed, ĕlkamăn-asăn imărkedăn-năsăn." 14 Ǝkyadăɣ hărwa a-s ĕnhăyăɣ tejărăkt măllăt; tejărăkt-en, ăqqiima fălla-s ere olăhăn d-ăwadĕm ijan takĕnbut n-tĕmmĕnukĕla n-orăɣ, iṭṭaf ălgori imsădăn dăɣ-ăfuss-net. 15 Izjăr-dd ănjălos iyyăn daɣ ehăn n-ămudd wa măqqărăn, iḍkăl emăsli-net s-afălla, innă i-wa ăqqimăn făll-tejărăkt: "Săxdĕm ălgori-năk, alĕy, făl-a-s iwwăḍ-dd ălwăqq n-a-wen ed ăkall i/n/na šund ĕttăɣam, ăbas irha ar amili." 16 Innă ănjălos a-wen ɣas, ijăr ăhalĕs wa ăqqiimăn făll-tejărăkt ălgori-net făll-ăkall, olăy săr-s ăkall iket-net šund ašĕkrĕš n-ĕttăɣam i/n/nan. 17 Olăs-dd daɣ ănjălos iyyăn azăjor n-ehăn n-ămudd wa măqqărăn ihăn išĕnnawăn, ĕnta daɣ, iṭṭaf ălgori imsădăn. 18 Izjăr-dd daɣ ănjălos iyyăn tasĕskărt ta dăɣ-na/n/nănăt tikutawen, ănjălos-en, ĕnta a-s wa n-efew; iḍkăl emăsli-net, innă i-ănjălos wa iṭṭafăn ălgori wa imsădăn: "Săxdĕm ălgori-năk wa imsădăn, alĕy săr-s ilĕktan n-lăɣnăb n-ăkall ed, aratăn-net ĕ/n/năn." 19 Ijăr ănjălos ălgori-net făll-ăkall, inkăḍ săr-s lăɣnăb n-ăkall iket-net, ijăr-t dăɣ-tebent-ta-dăɣ iẓimmĕw i-ad-umas ălmital n-aḍkăr wa măqqărăn ihăn Măssinăɣ. 20 Tămewăy tebent, tĕzjăr aɣrĕm, iẓmă-dd dăɣ-s lăɣnăb, ĕzjărăn-tăt-dd injităn n-ašni; injităn-ĕnnin, timɣarăn har ĕwwăḍăn iɣăban n-ibĕjwan, ĕlsăn dăɣ-ăkall a iwwăḍăn kăraḍăt timaḍ n-kelumetăr.
