Tănăfalilt 13

1Olăsăɣ, ĕnhăyăɣ ămudăr iyyăn ilan măraw iskawăn d-ĕssa iɣăfawăn a-s dd-izjăr ejărew wa sĕmmăn. Hak eɣăf, tĕwar-t takĕnbut n-tĕmmĕnukĕla tiyyăt, hak idĕm-dăɣ, iktab fălla-s isĕm ăsikafărăn. 2Ămudăr wa ĕnhăyăɣ, olăh d-wašil; tihiw-net, šuharnăt, emm-net, olăh d-i n-ahăr. Ikf'-e ăɣata tărna-net, d-tĕmmĕnukĕla-net d-tădabit măqqoorăt. 3Ămudăr-ĕnnin, iyyăn dăɣ-iɣăfawăn-net, ih'-e abuyĕs dăɣ-edăgg n-ăsĕnsaɣ wărăn itĕzzĕy măšan, izzăy. Iqqăl-a-wen tăkunt i-imuzăɣăn n-ăkall iket-năsăn, ĕlkămăn i-ămudăr. 4Ad-ɣabbăd ăddunya iket-net ăɣata ed ĕnta a ikfăn ămudăr tărna. Tărkăɣ tamĕtte iket-net dat-ămudăr, ad-t-ɣabbăd, janna: "Mi ogdăhăn d-ămudăr, mi ihălăn amjăr dăr-s?" 5Ijrăw ămudăr turhajăt n-ad-isĕffĕlɣăɣ, isĕkkufăr har ăj ĕkkoẓăt timĕrwen n-ewăr d-ĕssin. 6Ad-ijanna ămudăr hărătăn lăbasnen făll-Măssinăɣ, igaggăr isĕm-net, d-edăgg wa dăɣ-izzăɣ d-a-wa izzăɣăn išĕnnawăn iket-net. 7Ijrăw turhajăt n-ad-iknĕs imĕššeddĕjăn, ărn'-en; ijrăw tărna făll-e d t-tĕllăm tawset d-e d t-tĕllăm tamĕtte d-e d t-illăm awal d-e d t-illăm ĕddĕwĕl. 8Ad-ɣabbădăn imuzăɣăn n-ăkall iket-năsăn ămudăr-ĕnnin, iɣabbăd-t e d t-illăm ăwadĕm s-wăr-ikteb isĕm-net ɣur-axălak n-ăddunya dăɣ-ĕlkĕttab n-tămudre n-Ašăɣol wa ătwăɣrăsăn. 9Ere ilăn timĕẓẓujen s-isla, isăjdet: 10"Ere wa s-inna Măssinăɣ ad-ijjĕš takărmut, ad-tăt-ijjĕš, ere wa s-inna, ad-t-tăkš tăkoba, ad-t-tăkš. A-wa ăssaɣăt s-hak emĕššeddĕj-dăɣ, ibdĕdet făll-iman-net dăɣ-immun, ikuyĕdet." 11Ǝnhăyăɣ daɣ ămudăr iyyăn dd-izjarăn ăkall, il' iskawăn ĕssin olăhnen d-i n-ekrăr măšan isawal šund ăɣata. 12Itamašal tădabit ta itamašal ămudăr wa ăzzarăn iket-net dăɣ-a-s ăjjĕyh ămudăr wa ăzzarăn i-a-wen. Išahăššal ăkall d-imuzăɣăn-net ad-ăɣbĕdăn ămudăr wa ăzzarăn ăboyăšăn dăɣ-edăgg n-ăsĕnsaɣ s-izzăy ăbuyĕs-net. 13Ămudăr wa s-ĕssin, ija tikunen ăjjootnen măqqornen dat-ăddinăt, izizĕbbut-dd wăla efew wa n-išĕnnawăn făll-ăkall. 14Išašk kăl-ăkall s-tikunen ti-s ăddobăt ad-tănăt-ăj dat-ămudăr wa ăzzarăn ăboyăsăn s-izzăy abuyĕs-net. Issărḍ'-en s-ad-ĕjĕn ăṣṣănăm ăssimɣărăn ămudăr wa ăzzarăn t-ăsbayăsăn s-tăkoba măšan, izzăy. 15Ijrăw ămudăr wa s-ĕssin tădabit n-ad-ăj iman dăɣ-ăṣṣănăm wa olăhăn d-ămudăr wa ăzzarăn i-ad-itamăjrad ăṣṣănăm-ĕnnin, isasănɣa ăddinăt iket-năsăn wi t-wăren ĕɣbed. 16Ăšhăššăl ămudăr ăddinăt iket-năsăn: wi măḍroynen hakd-wi ĕššămnen, wi ărzăɣnen hakd wi lăqqĕwnen, wi n-ilăllan hakd wi n-eklan, ad-tăn-iwăr ešwăl făll-ifassăn-năsăn wi n-aɣil d-timmawen-năsăn. 17Ăbas t-illa ere ăddoben ad-ižănš wăla ad-ittužžăr afăl wăr t-iwer ešwăl-wĕnnin-dăɣ, ešwăl-wĕnnin daɣ ĕnta a-s isĕm n-ămudăr meɣ ămaḍin wa ănimăhălăn d-isĕm-en. 18Edăgg-i, ămiɣatăr ăwadĕm d-sărho d-tayĕtte i-ad-t-ijrăh. Ere s-lămmeḍ eɣăf-net iket-net, ăddoobăt ad-ijrĕw ălmăɣna n-ămaḍin wa n-ămudăr ed ămaḍin-en, iha edăgg n-isĕm n-ăgg-adĕm. Ămaḍin-en-hi, ĕnta da: "Săḍisăt timaḍ d-săḍisăt timĕrwen d-săḍis." Ǝnta-den-dăɣ ešwăl n-ăgg-adĕm ɣur-Măssinăɣ.

will be added

X\