Tănăfalilt 12

1Ḍarăt-a-wen, tĕzjăr-dd tăkunt tăssuksăḍăt išĕnnawăn. Ǝnhăyăɣ tamăḍt tăɣnasăt tăfukt tĕbdad făll-ewăr, tăsiiwăr măraw etran d-ĕssin eɣăf-net, măraw etran d-ĕssin ĕddasnen šund takĕnbut n-ămănokal eɣăf-net. 2Tamăḍt-ĕnnin, la ĕnniyăt, tărmas-tăt tiẓẓurt n-ajăraw n-eɣăf, tăsikălăl a-wa dăɣ-has-ja tisnant. 3Tănfalăl-dd tăkunt tiyyăt daɣ dăɣ-išĕnnawăn, ĕnhăyăɣ ămudăr măqqorăn šăggăɣăn han ifăqqăn n-ăɣata ilan ĕssa iɣăfawăn d-măraw iskawăn, hak eɣaf-net-dăɣ, tĕwar-t takĕnbut n-tĕmmĕnukĕla. 4Ifrăḍ-dd s-telănkăwt-net ĕttĕlĕt n-etran wi hănen išĕnnawăn, ijăr-tăn-dd făll-akăll. Ibdăd-dd ḍarăt-a-wen dat-tamăḍt i-ad-hin-ilmĕẓ ara-net afăl dd-iwă. 5Tĕkrăš tamăḍt alyaḍ s-ĕnta a madăn-ixkĕm s-tărna tolăhăt d-ta n-tăẓoli făll-ĕddĕwĕlăn iket-năsăn, iwă-dd alyaḍ ɣas immĕḍkăl ălwăqq-wen-dăɣ, ămewăy s-Măssinăɣ d-tasăqqaymut ta n-tĕmmĕnukĕla-net. 6Tamăḍt ĕnta, tăjewăḍ s-tanăẓruf-i-dăɣ has-itwăr Măssinăɣ edăgg dăɣ-mad-has-iṭṭaf tenăfăkt har tăj efăḍ n-ašăl d-sănatăt timaḍ d-săḍisăt timĕrwen. 7Inkăr ḍarăt-a-wen amjăr măqqoorăn dăɣ-išĕnnawăn. Imăl-t amjăr ăṣṣoohen jer-Mikaylu d-ănjălosăn wi has-ĕlkamnen d-ămudăr wa hăn ifăqqăn n-ăɣata d-ănjălosăn wi has-ĕlkamnen. 8Ătwărna ăɣata d-ănjălosăn wi has-ĕlkamnen, ăbas hasăn-t-tĕlla taɣimit dăɣ-išĕnnawăn. 9Ătwăjăr-dd ăɣata wa măqqărăn, ătwăstăɣ-dd, izjăr-dd išĕnnawăn. Ǝnta a-s aššăl wa n-ibda s-itawănna Iblis meɣ Ăššăyṭan-i n-emĕkkerrĕs n-ăddunya tĕmda, ătwăjăr-dd făll-ăkall ĕnta d-ănjălosăn-net. 10Ǝsleɣ ḍarăt-a-wen i-emăsli ăṣṣoohen ijannen dăɣ-išĕnnawăn: "Ămăra, ăssaɣăt wa n-ĕlɣĕllas, iwwăḍ-dd. Măssinăɣ, ăsnăfalăl-dd tărna-net d-Tĕmmĕnĕya-net! Ǝlxĕkum, ijjăš ifassăn n-Ălmasex-net făl-a-s ere wa s-kăla isaḍlam ayĕtma-năɣ, isaḍlam-tăn ehăḍ d-ašăl ɣur-Măssinăɣ, ătwăstăɣ-dd, ăbas ih' išĕnnawăn. 11Ǝkrăšăn fălla-s ayĕtma-năɣ tărna dăɣ-tĕssĕba n-ašni wa n-Ašăɣol d-măjrăd n-Măssinăɣ wa dăɣ-tajăyhen ăddinăt, wăr jen tărha n-hărăt dăɣ-tămudre-năsăn, ĕqbălăn tamăttant dăɣ-tĕssĕba n-Ašăɣol d-dăɣ-tĕssĕba n-măjrăd n-Măssinăɣ. 12A-wen-dăɣ a făl išĕnnawăn d-imuzăɣăn-năsăn, nuflĕyăt! Măšan imĕskay imuzăɣăn n-ăkall d-ejărew wa sĕmmăn făl-a-s Iblis, ăzzubbăt-in săr-wăn, ikn'-e aḍkăr ujĕš ed issan a-s a-wa has-in-aqqiimăn dăɣ-ălwăqq i jăzzulăn." 13Ilmăd ămudăr wa hăn ifăqqăn n-ăɣata a-s ătwăstăɣ-dd dăɣ-išĕnnawăn, ătrăkkăt-dd făll-ăkall ɣas, ăstăɣăynăn tamăḍt ta torăwăt alyaḍ. 14Măšan tĕjraw tamăḍt afrewăn ĕssin n-ejăft măqqoorăn, tĕggăd săr-săn hăr tăwwăḍ edăgg wa has-itwărăn dăɣ-tanĕẓruft i-ad-dăɣ-s tĕjrĕw tenăfăkt, tĕtwigăẓ dăɣ-aššăl har tăj dihen kăraḍ iwĕtyan d-tăẓune. 15Inhăy aššăl a-s tăbok tamăḍt ad-t-tĕjmăḍ ɣas, ora emm-net, ijăr-tăt s-ajĕju n-aman ogdăhăn d-ejărew i-ad-tăt-ĕkšĕn. 16Măšan, ohăɣ ăkall tinahăɣen i-tamăḍt, ămeră-dd, ilmăẓ-in aman wi-s ijăr ăɣata tamăḍt. 17Ikn' aḍkăr n-tamăḍt ujĕš n-ăɣata, iglă i-ad-iknĕs a-wa dd-ăqqimăn dăɣ-aratăn-net, a tăn-ămoosăn ăddinăt iket-năsăn wi tamašalnen alămărăn n-Măssinăɣ tajăyhen dăɣ-isălan n-Ɣisa. 18Osă-dd ăɣata, ibdăd dăɣ-asălim n-ejărew wa sĕmmăn.

will be added

X\