Tănăfalilt 11

1Ḍarăt-a-wen, tătwăkf'-ahi teẓewt tolăhăt d-hărăt n-telăwăɣt ta n-eket, ătwănn'-ahi: "Ǝglĕw, ĕkĕt ehăn n-ămudd wa măqqărăn n-Măssinăɣ d-tasĕskărt ta n-tikutawen, siḍĕnăd-dd a-wa dăr-ogdăhăn ăddinăt-wi dăɣ-s ɣabbădnen Măssinăɣ 2măšan, ăyy ăɣalla-net, wăr t-ketăd ed ĕjrawăn fălla-s inĕẓẓulam tărna, ad-ĕjĕn ĕkkoẓăt timĕrwen n-ewăr d-ĕssin tikukulăn aɣrĕm wa šăddijăn. 3Ad-hin-šĕmmišĕlăɣ tijuhawen-nin ti n-sănatăt ĕlsănen isĕlsa wi ilass ere iṭṭafăn iba, ad-ĕjĕn efăḍ n-ašăl d-sănatăt timaḍ d-săḍisăt timĕrwen siɣulăn isălan wi hasăn-dd-ăssawăy Măssinăɣ. 4Tijuhawen-en n-sănatăt, ĕntănăteḍ a-s ĕzzăytunităn wi n-ĕssin d-tiftĕl ti n-sănatăt ĕbdădnen dat-Emăli n-ăkall. 5E-d ittăr ăwadĕm ad-hasăn-iɣšĕd hărăt, ad-dd-izjăr efew imawăn-năsăn ihlăkăn išĕnja-năsăn, ĕmmĕk-wen-dăɣ a-s mad-ămmăt ăwadĕm a ămoos itattărăn ad-hasăn-iɣšĕd hărăt. 6Ǝjrăwăn turhajăt n-ad-ăɣfĕlăn išĕnnawăn, ĕgdĕlăn i-ajĕnna ad-iwĕt a ĕkkăn tajjăn isălan wi dd-ăwwăyăn ɣur-Măssinăɣ. Ǝjrăwăn daɣ turhajăt n-ad-ĕjĕn aman ašni, zĕzzubbun-dd făll-ăkall ănnuɣ n-ălmăṣṣibăt iket-net, ălwăqq d-ăsdărhănăn a-wen iket-net. 7Afăl ĕssĕmdăn d-asĕssiwăḍ n-isălan wi dd-ăwwăyăn, ad-fălla-săn iḍĕw awăɣs wa dd-madăn-izjăr anu wa wărăn ila ider ihăn ălaxărăt, ărn'-en, ănɣ'-en; 8ăqqaymĕnăt-dd tifĕkwen-năsăn dăɣ-tĕfărre n-aɣrĕm wa dăɣ-tažămmaɣăn imĕssorha-net, dăɣ-edăgg wa dăɣ-ătwăṣlăb Emăli-năsăn făll-tajĕttewt. Aɣrĕm-en, ătiwăjj'-as isĕm n-ămadaɣ, itawănn'-as, Sodoma; itawănn'-as daɣ: Miṣra. 9Ad-ĕkrĕšăn ăddinăt n-timĕttawen iket-dăɣ-năsnăt d-tiwsaten-năsnăt d-awalăn-năsnăt, d-ĕddĕwĕlăn-năsnăt iket-năsăn, kăraḍ išilan d-tăẓune ĕkyadăn dăɣ-săn, ĕgdalăn-asăn ad-ănbĕlăn. 10Ad-ăddăwen imuzăɣăn n-ăkall hullan dăɣ-tĕssĕba n-a-wa s-tăn-ăba, ăd-ĕjĕn ăzzăhotăn, ĕnmĕkfĕn ălhăkăn jer-iman-năsăn, făl-a-s ănnăbităn-ĕnnin-dăɣ n-ĕssin, ĕssĕknăn imuzăɣăn n-ăkall aɣăna hullan 11măšan, afăl okăyăn kăraḍ išilan d-tăẓune winnin-dăɣ, ad-dd-ifĕl unfas n-tămudre n-Măssinăɣ ijjĕš ănnăbităn-ĕnnin n-ĕssin, ĕnkărăn-dd dăɣ-tamăttant, tărmĕs tarĕmmeɣt ăddinăt wi tăn-hannăynen iket-năsăn." 12Ǝslăn ănnăbităn wi n-ĕssin i-emăsli ăṣṣohen hasăn-innăn dăɣ-išĕnnawăn: "Awĕnăt-dd diha." Tĕḍkăl-tăn tejărăkt, ĕkkăn išĕnnawăn, ĕkyadăn dăɣ-săn išĕnja-năsăn. 13Ăškăḍkăḍ ăkall s-ăṣṣahăt ălwăqq-wen-dăɣ, tărẓa tăẓune n-aɣrĕm ta s-mărawăt, ămmun ĕssa afḍăn n-ăwadĕm dăɣ-aškĕḍkăḍ-wĕnnin-dăɣ; ărmăɣăn ăddinăt wi iyyăḍnen, ad-samɣarăn Măssinăɣ-i ihăn išĕnnawăn. 14Okăy ălmăṣṣibăt wa s-ĕssin măšan, hewăt! Os'-iwăn făw wa s-kăraḍ. 15Ăshăḍ ălwăqq-wen ănjălos wa s-ĕssa tăsinsăɣt-net, jăn imăslan ăṣṣoohătnen dăɣ-išĕnnawăn jannănen: "Ămăra-dăɣ, tĕmmĕnukĕla făll-ăddunya, ti n-Emăli-nănăɣ Măssinăɣ d-Ălmasex-net i-ad-imnukĕl hărkuk." 16Ǝnkărăn imɣarăn wi n-sănatăt timĕrwen d-ĕkkoẓ făll-tisăqqima-năsăn ti t-ĕllănen dat-Măssinăɣ, oḍăn data-s, ărkăɣăn data-s, ăsḍăsăn timmawen-năsăn ăkall, ad-t-ɣabbădăn, 17jannen: "Emăli Măssinăɣ-i ilăn tărna, kăyy-i t-illăn, tĕlled-t, tĕlkamăd, nomal-kăy ed tĕssĕtbătăd tĕmmĕnukĕla-năk s-tărna-năk. 18Ibda, ăḍḍukren-kăy ĕddĕwĕlăn wi n-inĕẓẓulam măšan, ašăl-i, aḍkăr wa-năk, a dd-madăn-infilĕl fălla-săn, ašăl-năk wa dăɣ-šarrăɣăd inĕmmuttan, osă-dd. Iwwăḍ ălwăqq wa dăɣ-mad-tĕjĕd ălhăk i-eklan-năk-i n-ănnăbităn d-ăddinăt wi led n-imĕššeddĕjăn-năk iket-dăɣ-năsăn, ăssimɣărăn-kăy wi n-imĕṣṣuha hakd wi n-tilăqqiwen, ălwăqq wa n-ahălak n-imahlakăn n-ăkall, osă-dd." 19Ălwăqq-wen, ămeră-dd ehăn n-ămudd n-Măssinăɣ wa măqqărăn dăɣ-išĕnnawăn, ătwănhăy dăɣ-s ĕssĕndoqq wa iha ĕlkĕttab n-ărkăwăl n-tassaɣt wa n-jer-Măssinăɣ d-tamĕtte-net, jăn essamăn ḍarăt-a-wen d-imăslan d-ejjajăn; ăškăḍkăḍ ăkall, ĕnfărăn-dd ijidrăšăn šuharnen.

will be added

X\