Tănăfalilt 10

1Olasăɣ daɣ ahănay n-ănjălos n-emăṣṣehi a-s dd-ifăl išĕnnawăn tĕls'-e tejărăkt, iqqal-as aẓănnăẓẓal takĕnbut, olăh idĕm-net d-tăfukt, olăhăn iḍarăn-net d-timănkayen n-efew, 2iṭṭaf dăɣ-ăfuss-net ĕlkĕttab ĕntĕkkăn ămerăn. Ibdăd s-aḍăr-net wa n-aɣil făll-ejărew wa sĕmmăn, ibdăd s-wa n-tăšalje făll-ăkall. 3Inḍăw teɣărit tolăhăt d-emăsli n-ahăr inijjĕwăn. Ăsɣărăt ɣas, ăkewănăn-as imăslan n-ejjajăn wi n-ĕssa. 4Ǝttărăɣ ad-ĕktĕbăɣ a-wa ĕnnăn ɣas, ĕsleɣ i-emăsli dd-ifalăn išĕnnawăn a-s hi-innă: "Ǝṣtăr a-wa ĕnnăn ejjajăn wi n-ĕssa, wăr t-tĕktebăd." 5Iḍkăl ḍarăt-a-wen ănjălos-wĕnnin ĕnhăyăɣ ăsixătărtăr făll-ejărew d-ăkall ăfuss-net wa n-aɣil s-ebre n-išĕnnawăn, 6ihăḍ s-Măssinăɣ-i iddărăn dd-ixlăkăn išĕnnawăn d-ăkall d-ijĕrwan d-a-wa tăn-ihăn iket-net, innă: "Tăqqăn, tĕmdă-dd." 7Afăl issĕntă ănjălos wa s-ĕssa ewet n-tăsinsăɣt-net, ad-dd-imdĕw ĕddăraj n-Măssinăɣ wa s-a ija a-wa-dăɣ iffar, dihen, ad-itbĕt a-wa ĕnnăn ănnăbităn-i n-eklan-net. 8Ăssewăl-ahi daɣ emăsli wa s-ĕsleɣ ifal-dd išĕnnawăn, inn'-ahi: "Ǝglĕw, ărmĕs ĕlkĕttab wa ĕntĕkkăn ămerăn ihăn ăfuss n-ănjălos wa ăsixătărtărăn făll-ăkall d-ejărew." 9Ohăẓăɣ-dd ănjălos i-ad-hi-ăkf ĕlkĕttab wa ĕntĕkkăn, inn'-ahi: "Ărmĕs ĕlkĕttab, tĕkšĕd-t, ad-ismam dăɣ-tăsa-năk măšan dăɣ-emm-năk, ad-alăh d-torawăt tăẓude." 10Ărmăsăɣ-dd ĕlkĕttab dăɣ-ăfuss n-ănjălos, ĕkšeɣ-t ɣas, ija dăɣ-emm-in tăẓude ta n-torawăt măšan, osa tăsa-nin ɣas, sămum dăɣ-s. 11Ătwănn'-ahi ălwăqq-wen: "Sĕlmĕd hărwa timĕttawen d-tiwsaten d-awalăn d-imănokalăn a-wa hasăn-itwăr Măssinăɣ."

will be added

X\