Tănăfalilt 1

1A-wa tănăfalilt ta dd-ăsnăfalăl Măssinăɣ i-Ɣisa Ălmasex i-ad-isĕlmĕd eklan-net isălan n-hărătăn wi s-išwar jan. Dăɣ-tĕssĕba n-a-wen-dăɣ a făl săr-i dd-ăšmasăl Ălmasex ănjălos-net, năkk Exya-i n-akli-net, i-ad-hi-isĕlmĕd s-isălan-win-dăɣ năkk-dăɣ. 2A-wa s-ăjjĕyhăɣ iket-net, ĕnhăyăɣ-t, ămoosăn măjrăd n-Măssinăɣ d-tidĕt ta hi-dd-ăsnăfalăl Ɣisa Ălmasex a hawăn-siɣulăɣ diha-dăɣ. 3Ere iɣrăn ĕlkĕttab-i-dăɣ dăɣ-iktăb a-wa t-illăn d-a-wa ilkămăn, ăsjăd i-a-wa dăɣ-ăssewăl, ad-itamašal a-wa innă, tĕnḍĕḍ-as ed a ĕnḍărrăn ɣas a hin-ăqqimăn i-ad-itbĕt a-wa innă. 4A-wa năkk Exya, hin-iktabăn i-ălkănisăten ti n-ĕssayăt hănen teje ta n-Azya. Ăhuulăɣ-kăwăn-in, ikf'-iwăn Măssinăɣ-i dd-ăzzarăn, ill'-e, ilkam, ănnuɣmăt d-ălxer. Dalăɣ unfasăn wi n-ĕssa t-ĕllănen dat-tasăqqaymut n-Măssinăɣ ta n-tĕmmĕnukĕla dăɣ-ad-kăwăn-ăkf ănnuɣmăt d-ălxer. 5Ikf'-iwăn daɣ Ɣisa Ălmasex-i n-ămaɣdal n-emăjjăyh n-tidĕt dd-ăzzarăn tanăkra dăɣ-tamăttant, ĕnta-i n-Ămănokal n-a-wa t-illăn dăɣ-imănokalăn iwarăn ărori n-ăkall, ănnuɣmăt d-ălxer. Ǝnta a hanăɣ-irhan, ăsdărfăt-anăɣ dăɣ-ibăkkaḍăn-nănăɣ s-ašni-net wa inɣălăn a-s ămmut dăɣ-tĕssĕba-nănăɣ. 6Ǝnta a hanăɣ-ijăn tawset n-kăl-tikutawen, ij'-anăɣ dăɣ-Tĕmmĕnĕya-net i-ad-năxdĕm i-Măssinăɣ-i n-Abba-net. Umaset ălxurmăt d-tărna, i-net hărkuk! Amin! 7Ǝnheywăt-ak, imal-dd, ăddeew d-tijărăken! Ad-t-tĕnhĕy e d t-tĕllăm tiṭṭ, wăla ăddinăt wi dăjnen tajĕẓẓelt-net s-ajor. Ad-šoršĕnăt tiwsaten n-ăddunya iket-dăɣ-năsnăt, ĕlhĕnăt dăɣ-tĕssĕba-net. A-wen, ad-ăj, wăr t-iha ăššăk. Amin! 8Innă Emăli Măssinăɣ-i ilăn tărna iket-net: " 'Năkk a-s Tizarăt, năkk a-s Tilkamăt', ĕnta a dd-ăzzarăn, ill'-e, ilkam." 9A-wa năkk, Exya wa n-ă/n/na-wăn dăɣ-ăddin dăr-wăn oharăn tiẓẓurt d-Tĕmmĕnĕya ta n-Măssinăɣ d-tebădde dăɣ-ălɣizabăt dăɣ-tĕssĕba n-Ɣisa. Ăzzăman wa d-ĕttărmăsăɣ, ămewăyăɣ, ĕjjăšăɣ takărmut dăɣ-awtĕl wa n-Batmus dăɣ-tĕssĕba n-iqqud wa jeɣ dăɣ-iji n-isălan n-măjrăd n-Măssinăɣ d-tajuhe ta tăjjăɣ făll-Ɣisa. 10Ašăl iyyăn n-ălxad-i n-ašăl wa n-Emăli, irmăs-ahi Unfas Šăddijăn, ĕsleɣ i-emăsli-i-dăɣ ăṣṣoohen hi-olăhăn d-i n-tăsinsăɣt ḍar'-i 11hi-innăn: "Ǝktĕb a-wa hănnăyăd dăɣ-ĕlkĕttab, sĕssiwĕḍăd-t-in ălkănisăten ti n-ĕssayăt n-teje ta n-Azya hănen iɣărman wi n-Ifăsus d-Smirna d-Birɣamus d-Tĕyatir d-Sardas d-Filadăfya d-Lăwdisa." 12Ăšnăšlămăɣ ḍar'-i i-ad-ĕnhĕyăɣ ere wa hi-ăssewălăn. Ǝkyădăɣ, ĕnhăyăɣ ĕssayăt tiftĕl n-orăɣ 13jer-ibdad ere olăhăn d-ăgg-adĕm. Ilsă emăls has-t-illan ɣur-iḍarăn, ijbas s-tamĕntĕka n-orăɣ. 14Jan amẓadăn-net tĕmĕlle n-tikunen, olăhăn ɣas d-tăḍuft wăr-inxes hărăt, izajjăr-dd ănnur olăhăn d-imămmălăn n-efew tiṭṭawen-net. 15Jan iḍarăn-net asmăɣmăɣ wa ităjj daroɣ tăššiišdăj tahĕst tĕzzar izzĕzzĕwăt-t ăwadĕm; olăh emăsli-net d-i n-aman n-anji ošalnen s-ăṣṣahăt. 16Iṭṭaf ĕssa etran dăɣ-ăfuss-net wa n-aɣil, tĕzjar-dd tăkoba s-ĕmsădăn imawăn-net issĕnăn emm-net, ija idĕm-net asmăɣmăɣ wa tăjj tăfukt n-tarăhut. 17Ǝnhăyăɣ-t ɣas, heɣ-dd oḍeɣ daw-iḍarăn-net šund ămmuɣ măšan, ăswăr-ahi ăfuss-net wa n-aɣil, inn'-ahi: "Wăr tărmeɣăd, năkk a-s Tizarăt, năkk a-s Tilkamăt, 18năkk a-s wa iddarăn. Tidĕt, ĕnhăyăɣ tamăttant măšan, năkk-da ămăra, ĕddarăɣ amăɣlol. Năkk a iṭṭafăn asăyar wa n-tamăttant hakd-dăɣ wa n-ălaxărăt. 19A tĕnhăyăd-dăɣ, jer-a-wa ijăn d-a-wa itajjăn d-a-wa ilkămăn, ĕktĕb-t iket-dăɣ-net. 20Etran wi n-ĕssa hannăyăd dăɣ-ăfuss-in wa n-aɣil d-ĕssayăt tiftĕl n-orăɣ ti hannăyăd, ĕddăraj măšan ălmăɣna-n-a-wen da: etran, ĕntăneḍ a-s ănjălosăn n-ălkănisăten ti n-ĕssayăt; tiftĕl ti n-ĕssayăt, ĕntănăteḍ a-s ălkănisăten ti n-ĕssayăt."

will be added

X\