Fălyamon 1

1A-wa năkk, Bulĕs, wa ihăn takărmut dăɣ-tĕssĕba n-Ɣisa Ălmasex d-ă/n/na Timoti i-Fălyamon wa n-emĕššerĕk-nănăɣ nĕkna tărha. 2Nĕktab-ak-in kăyy d-ălkănisăt ta tăžžămmaɣăt dăɣ-ehăn-năk, năhuul-in Afya ta n-wălătma-năɣ dăɣ-ăddin d-Aršib wa n-amidi-nănăɣ dăɣ-amjăr wa nĕha. 3Ăhuulăɣ-kăwăn-in iket-năwăn, ĕttarăɣ daɣ s-Măssinăɣ-i n-Abba-nănăɣ d-Emăli Ɣisa Ălmasex a kăwăn-ikfăn ănnuɣmăt d-ălxer. 4E-d dălăɣ Măssinăɣ-dăɣ, ad-kăy-dd-ĕktoɣ, ad-has-tumayăɣ dăɣ-tĕssĕba-năk. 5Ǝjjăšăn-ahi isălan n-tărha ta jed i-imĕššeddĕjăn iket-dăɣ-năsăn d-immun-năk s-Ɣisa Ălmasex. 6Tattărăɣ s-Măssinăɣ ad-umas immun wa hanăɣ-ăssiirtăyăn năkk d-kăyy a ih' ălfăyda, ihakkăn musnăt n-a-wa s-năddoobăt ad-t-năxdĕm i-Ălmasex. 7Ǝkneeɣ tedăwit, ă/n/na-ɣ dăɣ-ăddin, olwan iman-in dăɣ-tĕssĕba n-tărha ta kăy-hăt s-ĕnta a-s tĕssĕsmăḍăd ulhawăn n-imĕššeddĕjăn. 8Ămăra, kud-dăɣ dăɣ-tĕssĕba n-a-wa hanăɣ-osaɣăn, ĕjrawăɣ turhajăt ɣur-Ălmasex n-ad-fălla-k ĕfrăḍăɣ a-wa mad-tĕjĕd, 9ăssoofăɣ ad-ɣur-k ĕttarăɣ idĕm dăɣ-tĕssĕba n-tărha ta n-jere-năɣ, năkk Bulĕs-i n-amɣar s-ašăl-i-dăɣ, heɣ takărmut dăɣ-tĕssĕba n-Ɣisa Ălmasex. 10Ăsimătărăɣ-kăy d-alyaḍ, Unažĕm wa dd-ăwwăyăɣ s-immun s-Ɣisa Ălmasex dăɣ-takărmut-ta-dăɣ heɣ. 11Tidĕt, ibda, wăr hak-t-iha hărăt măšan ašăl-i-dăɣ, ih'-ahi-t hărăt năkk hakd kăyy. 12Năkk a săr-k-t-in-ăssiglăn, wăr t-ĕẓleyăɣ d-iman-in, 13ăsdărhănăɣ ad-ɣur-i ăqqayĕm i-ad-hi-idhĕl dăɣ-edăgg-năk năkk-i ihăn takărmut dăɣ-tĕssĕba n-Ălĕnžil, 14măšan, wăr-ărheɣ ad-ăjăɣ a-s wăr tărḍed, wăr-ărheɣ ad-umas ălxer-năk a kăy-ăhhuuššălăn, ăssoofăɣ, ad-dd-ifal ulh-năk. 15Iha miši s-ajmuḍ wa kăy-dd-ija har ija hărăt n-ăzzăman, i n-atwitas n-ad-kăy-in-iqqĕl hărkuk, 16wădden šund akli, imăl jĕnnĕj-a-wen, ămoos ămăra, ă/n/na-năɣ nĕkna tărha dăɣ-ăddin. Tidĕt-dăɣ a-s jeeɣ-as tărha tĕmdat măšan, kăyy a iwar ad-has-tĕjĕd tărha toojărăt ta has-jeɣ ed ămăra-dăɣ, ămoos akli-năk, ămoos daɣ ălmăssexi. 17Ɣas kunta tĕṭṭafăd-ahi dăɣ-edăgg n-ă/n/na-k dăɣ-ăddin har ĕjud-i, sĕbbărrĕk-t s-ĕmmĕk wa s-hi mad-sĕbbărrĕkăd. 18Kunta ill'-e-t a hak-iɣšad, wăla ill'-e a t-tărwasăd, năkk a t-iḍmanăn. 19Zĕjjĕzz hullan edăgg-wa-dăɣ dăɣ-tăkarḍe-ta-dăɣ, năkk iman-in Bulĕs a t-iktăbăn s-ăfuss-in. Ǝḍmanăɣ-ak daɣ a-s năkk a hak-madăn-iẓĕl fălla-s, wăr-ămɣatărăɣ daɣ s-ad-kăy-dd-sĕktoɣ a-s kăyy iman-năk, leeɣ-kăy, iwar-kăy ălxaqq-in ed năkk-i-dăɣ a ija Măssinăɣ ĕssĕbab wa kăy-dd-ăwwăyăn s-tĕmĕzzuyt n-Ɣisa Ălmasex. 20Ɣas, ă/n/na-ɣ, ĕttarăɣ dăɣ-k ad-hi-tĕjĕd idĕm dăɣ-tĕssĕba n-Emăli. Afăl-hi jed a-wen ad-sĕsmĕḍăd ulh-in dăɣ-tĕssĕba n-Ălmasex. 21Ǝflasăɣ a-s ad-hi-sĕjĕdĕd, a-wen-dăɣ a făl hak-in-ĕktăbăɣ, ĕkkasăɣ daɣ ăššăk a-s ad-hi-tĕjĕd a ojărăn a-wa dăɣ-k tattărăɣ. 22Ḍarăt-a-wen, sĕmmujnĕt-ah'-in edăgg dăɣ-ăzzubbeɣ afăl kăwăn-in-oseɣ ed jarăɣ ăṭṭăma n-ad-hin-ĕtwĕyyăɣ dăɣ-tĕssĕba n-tittar-năwăn. 23Ăhuul-kăy-in Ibbafras wa n-amidi-nin dăr-oharăɣ takărmut dăɣ-tĕssĕba n-Ɣisa Ălmasex. 24Ăhuulăn-kăy-in daɣ imidiwăn-in Marqĕs d-Aristarăq d-Dimas d-Luqa. 25Ăhuulăɣ-kăwăn-in, ĕttarăɣ dăɣ-Emăli Ɣisa Ălmasex ad-ăj ănnuɣmăt-net dăɣ-ĕnniyăt-năwăn. Amin!

will be added

X\