Kăl-Fĕlibb 4

1Ayĕtma-ɣ-i ĕkneɣ tărha, naqq'-ahi tenere-năwăn ed tedăwit-in d-abăraj-in a tămoosăm; ayĕtma-i ĕkneɣ tărha, ăknăt uḍĕf n-Emăli. 2Iwĕdya d-Sintĕkya-i n-šătma-năɣ, ĕttarăɣ dăɣ-snăt ad-ĕjĕnăt ălxer jer-iman-năsnăt, ĕṭṭĕfnet iyyăn n-ĕnniyăt dăɣ-alkum-năsnăt i-Emăli. 3Kăyy daɣ-i n-ămaɣdal wa n-tidĕt dăɣ-ălxidmăt-wa nohăr, sĕlɣĕn-tănăt Iblis, tilalăd-asnăt i-ad-ĕnmĕẓĕlnăt. A-wa tiḍeḍen hi-ĕdhălnen hullan hullan dăɣ-iji n-isălan n-Ălĕnžil, ĕntănăteḍ d-Klima d-ăyĕtma wi iyyăḍnen dăr-ănniixdămăɣ, itbat a-s ĕktabăn ismawăn-năsăn dăɣ-ĕlkĕnnaš wa-dăɣ ĕktăbăn ismawăn n-ăddinăt wi ĕkkănen ălžănnăt. 4Ayĕtma-ɣ, dăwătăt hărkuk dăɣ-Emăli; a-wen, olăsăɣ-t tĕnna, ĕnneɣ-awăn: dăwătăt hărkuk. 5Ǝlmĕdnet ăddinăt iket-dăɣ-năsăn s-tăẓude-năwăn ed Emăli ya, os'-iwăn făw. 6Wăr kăwăn-ităšăwwašet hărăt wăl' iyyăn, a-s tămɣatărăm-dăɣ, tăllăɣem-t i-Măssinăɣ s-tamădilt d-tittar ĕjlaynen ăddewnen d-tămayit; 7afăl jăm a-wen, ad-ăj Măssinăɣ ălxer dăɣ-ulhawăn-năwăn, ăj'-asăn igguẓ ojărăn a-wa s-ăddobăt ĕnniyăt n-ăgg-adĕm ad-t-dd-awĕy, asăɣ ulhawăn-năwăn d-ĕnniyăt-năwăn d-Ɣisa Ălmasex. 8Ḍarăt-a-wen daɣ, ayĕtma-ɣ, a-wa ădduutten, a-wa ilăn tĕmmal, a-wa oɣădăn, a-wa šăddijăn, a-wa ămoosăn isĕssărha d-iẓĕjraẓ d-a-wa ilăn tĕnna d-a-wa ilăn ălxal olaɣăn d-tĕmmal, ĕntăneḍ-den-dăɣ hărătăn wi s-ăniihăjja a-s jam-asăn edăgg dăɣ-ulhawăn-năwăn. 9Mašălăt a-wa kăwăn-ĕssăɣrăɣ d-a-wa tĕnhăyăm făll-i d-a-wa s-hi-tĕslăm har t-ĕnneɣ d-a-wa jeɣ iket-net. Afăl jăm a-wen, ad-kăwăn-idhĕl Măssinăɣ, ăkf'-iwăn ălxer. 10Wăr t-ih' ăššăk a-wen, ăddiwen iman-in hullan dăɣ-Emăli dăɣ-tĕssĕba n-ĕmmĕk wa s-hi-dd-tĕktăm, tĕssĕlmădăm-ahi a-s wăr hin-jerăm. Ǝssanăɣ a-s ăru d-tăsdărhănăm iji n-a-wen, ănn-ak, ăddăbara-net ɣas a wăr tĕjrewăm. 11A-wen janneɣ-awăn-t wădden i n-a-s innin ămiɣatărăɣ s-hărăt, diha t-ĕlleɣ, ĕzzayăɣ ad-ăjăɣ ărramăt dăɣ-a-wa leɣ dăɣ-talɣiwen iket-dăɣ-năsnăt. 12Wăr t-illa a-s wădden onanăɣ-as, jer-ĕllăqqu wăla terše n-ehăre. Wăr t-tĕlla talɣa s-wădden ĕnhayăɣ-tăt, jer-tewwant wăla laẓ, wăr săr-i tĕẓley terše d-iba-net. 13Wăr t-tĕlla tanfust s-wădden, ĕštăfăɣ-dd dăɣ-s iman-in dăɣ-tĕssĕba n-tărna ta hi-ikfa Ălmasex. 14Măšan, hakd a-wen-dăɣ, a-wen, wăr hin-ikkes a-s irăš-awăn Măssinăɣ tadhĕlt ta hi-jăm făll-i tĕfnăẓăt timɣutar. 15Ya ayĕtma-ɣ wi ĕzzăɣnen aɣrĕm wa n-Fĕlibb, tĕssanăm kăwăneḍ iman-năwăn a-s, a-s ĕssĕntăɣ iji n-isălan n-Ălĕnžil, ăzzăman wa dd-fălăɣ teje ta n-Masidunya, a-wa-dăɣ săl ălkănisăt ta-năwăn, wăr t-tĕlla ălkănisăt dăr-wăn tolăhăt anufli dăɣ-a-wa săɣreɣ, wăr t-tĕlla daɣ ti hi-tĕdhalăt s-ĕmmĕk wa s-hi-tĕdhălăm kăwăneḍ. 16A-wen, kăwăneḍ ɣas a t-ijăn ed hărwa heɣ aɣrĕm wa n-Tăslonika, har ĕssin ihăndăggan tirĕjĕm-ahi a-s ĕkkăsăɣ timɣutar-in. 17Wădden ihuk-năwăn a ḍarăt ošalăɣ, ănn-ak, derhan a tattărăɣ n-ad-ijatăn imărkedăn-năwăn ed ilkam, ad-tĕjrĕwăm imraš-năsăn ɣur-Măssinăɣ. 18Ǝlmĕdăt a-s a-wa hi-dd-tăssawăyăm, ĕjrăwăɣ-t iket-dăɣ-net. A ija Ibbafărodit a-wa hi-dd-tăssawăyăm dăɣ-ifassăn-in-dăɣ, wăr t-illa făw a făll-in ăba wăla a hin-oḍanăɣ. Ămoos dat-i a-wa jăm a olăhăn d-aḍutăn n-nefran isihĕwhĕw ăwadĕm. Tirjit-năwăn-hahi, toolăh d-takute lat idĕm dat-Măssinăɣ, irḍa săr-s, tĕjraẓ-as. 19Măssi-ɣ, Măssinăɣ, wăr t-illa a-s wădden iṭṭaf-t, ĕnta-en-dăɣ a kăwăn-e-ikkĕsăn dăɣ-e d t-tĕllăm tămăɣatert s-a-wa dăr-togdăh terše-net i-ad-itwĕsĕmɣăr isĕm-net dăɣ-tĕssĕba n-Ɣisa Ălmasex. 20Imɣaret isĕm n-Măssinăɣ-i n-Abba-nănăɣ hărkuk. Amin! 21Tăhuulăm-in imĕššeddĕjăn n-Ɣisa Ălmasex iket-dăɣ-năsăn, ăhuulăn-kăwăn-in daɣ ayĕtma wi ɣur-i t-ĕllanen diha-dăɣ. 22Ăhuulăn-kăwăn-in daɣ imĕššeddĕjăn iket-năsăn, hullan wi ăxdămnen dăɣ-ehăn wa n-Qăyṣăr-i n-ămănokal n-ăkall wa măqqărăn. 23Ija Emăli Ɣisa Ălmasex ănnuɣmăt-net dăɣ-ĕnniyăt-năwăn iket-dăɣ-năwăn. Amin!

will be added

X\