Kăl-Fĕlibb 3

1Ḍarăt-a-wen, ayĕtma-ɣ, sĕddĕwĕtet-kăwăn tassaɣt ta jăm d-Emăli. Wăr hi-ikma ad-hawăn-sĕnnilĕsăɣ măjrăd wa s-ăru d-hawăn-in-ĕktăbăɣ dăɣ-isălan-net. Tănfo-năwăn a ihan a-wen i-ad-taɣĕdăm. 2Agĕẓăt iman-năwăn dăɣ-erk inaxdimăn, olăhăn ɣas d-iyyăḍan ĕnsaynen, agĕẓăt iman-năwăn dăɣ-săn; agĕẓăt iman-năwăn dăɣ-erk ăddinăt-win-dăɣ ɣur-ija s-bahu a-s amili a itajjăn ăwadĕm dăɣ-tamĕtte n-Măssinăɣ. 3Ǝnhĕywăt! Năkkăneḍ-i-dăɣ a-s ăddinăt wi jănen amili wa n-tidĕt s-ĕnta Măssinăɣ a-s ĕssĕbab-net, nĕɣabbăd-t s-tărna n-Unfas, abăraj-nănăɣ Ɣisa Ălmasex wădden fărĕḍăn wăla ălɣadatăn ăssiibdădăn dăgg-adĕm. 4Ǝnnăr t-illa ere ăddooben ad-isĕffullĕt iman-net făll-fărĕḍăn wăla ălɣadatăn ăssiibdădăn dăgg-adĕm, adiš năkk a he-izarăn s-ĕlɣĕllas. Lăɣătăt-ahi ɣas ere hi-ojărăn dăɣ-isălan-win-dăɣ? 5Năkk, ămelăyăɣ ašăl wa s-ĕttam ḍarăt tiwit-in, ăgg-Iṣrayil wa n-tidĕt a ămoosăɣ, la-hi tawset ta n-Bănyamin, ămoosăɣ Ɣăbrani orawăn Ɣăbranităn. Dăɣ-a-wa ămoosăn alămăr wa n-ănnăbi Mosa, kăla heɣ taggayt ta n-kăl-faris; 6wăr t-illa ere hi-ojărăn ĕjjĕluyăt wăla akfor, ăqquzzăbeɣ ălkănisăt; dăɣ-isălan n-a-wa ifrăḍ alămăr făll-ăgg-adĕm d-iqqud-has, wăr t-illa uḍlem hi-iwarăn. 7Ămăra, hărătăn-win-dăɣ jeɣ ibda abăraj, ăbas dat-i ĕẓlayăn d-a wărăn infa hărăt dăɣ-tĕssĕba n-Ălmasex, 8ĕgleɣ făw har ašăl-i-dăɣ, ija ɣur-i a-s wăr t-illa a hi-infan s-hărăt făl tĕssĕba n-azĕzăr-i jeɣ i-muzĕyăt wa jeɣ i-Ɣisa Ălmasex-i n-Emăli-nin, uf'-ahi muzĕyăt-net hărăt iket-net. Tĕssĕba n-a-wen-dăɣ a făl ăsserădăɣ ifassăn-in dăɣ-a-wa-dăɣ s-kăla hi-ămoos abăraj iket-net, ăbas săr-i iẓlay d-ănnikal ed wăr t-illa a ărheɣ ar ad-tĕntĕm tămudre ta n-Ălmasex dăɣ-ta-nin, 9ăqqaymăɣ daɣ osaɣăɣ dăr-s hak ašăl, ăttăjrăwăɣet ăsifăllăɣ iqqud-in făll-alkum-has ĕnta uhĕn iqqud i-alkum i-a-wa innă alămăr ed ɣur-Măssinăɣ, wăr t-illa iqqud ilan idĕm data-s săl wa ihăkk immun s-Ălmasex. 10Wăr t-illa a ăsidărhănăɣ a săl muzĕyăt-net ĕnta, ăknăɣ daɣ muzĕyăt n-tărna ta t-dd-tĕssĕnkărăt jer-inĕmmuttan, ăhĕrăɣ dăr-s tersĕmmawen ti inhăy, alăhăɣ dăr-s tamăttant ta ija 11ed a ijăn-dăɣ, jarăɣ ăṭṭăma n-ad-dd-alĕsăɣ năkk-dăɣ tanăkra jer-inĕmmuttan, ĕjrĕwăɣ tămudre ta tăynayăt. 12A-wen janneɣ-awăn-t wădden i n-a-s innin ĕssĕmdăɣ azzal wa heɣ, meɣ daɣ i n-a-s innin ăsisăgdăhăɣ dăɣ-hărăt iket-net; ăbo! Ănn-ak, diha t-ĕlleɣ, osasăɣ hullan dăɣ-azzal-wen-dăɣ i-ad-ĕjrĕwăɣ marušăt wa hi-itwăr Măssinăɣ ed năkk, ijrăw-ahi Ɣisa Ălmasex. 13Ayĕtma-ɣ, wăr-ordeɣ hărwa a-s năkk-i-dăɣ, hărătăn-win-dăɣ, ăzizăbbeɣ-tăn măšan, hărăt iyyăn ɣas a iwwayăn inĕzjam-in: ĕkfeɣ ărori-nin i-a-wa s-kăla hi-išla ibda iket-net, wăr t-illa a dăɣ-ĕdgaẓăɣ ar a-wa t-illăn dat-i. 14A-wen-dăɣ a făl ĕjlayăɣ hullan dăɣ-a-wa hi-išlăn i-ad-ĕjrĕwăɣ marušăt wa hanăɣ-itwăr Măssinăɣ dăɣ-išĕnnawăn s-hanăɣ-ija Măssinăɣ ărkăwăl-net dăɣ-idĕm n-Ɣisa Ălmasex. 15Ămăra, năkkăneḍ-i ămoosnen meddĕn ĕmdanen dăɣ-isălan wi n-immun s-Măssinăɣ, nĕṭṭĕfet ălxal-wen-dăɣ hak ašăl, kunta daɣ tĕll'-e talɣa tămiišăkkem, ĕdĕlăt Măssinăɣ i-ad-arr tiṭṭawen-năwăn dăɣ-isălan-win-dăɣ. 16Hakd a-wen-dăɣ, a ijăn-dăɣ, šămad nărmăs tabarăt-ten-dăɣ toɣădăt, adiš nĕjlĕyet dăɣ-s, nĕmsidăɣet dăɣ-tekle-nănăɣ. 17Ayĕtma-ɣ, tălălăt tămudre ta ĕṭṭăfăɣ, sĕjrăhăm daɣ tămudre n-meddĕn-wi ĕlkămnen i-ălmital wa tăn-nĕkfă, tălălăm-tăn ĕntăneḍ-dăɣ. 18Ǝllan-t ăddinăt ăjjootnen wăren ĕja tamăttant ta ija Ălmasex făll-tajĕttewt hărăt. Ăddinăt-en, ăru d-kăwăn-ăsmătărăɣ i-ad-hasăn-tĕjĕm ĕnniyăt, ărheeɣ daɣ ămăra ad-kăwăn-alĕsăɣ aɣătal fălla-săn. Ăsninăn iman-in a-s hawăn-janneɣ a-wa-dăɣ. 19Ilkam dăɣ-săn erk ajilal, ĕšlăyăn i-Măssinăɣ, ĕnnăhăḍnăt dăɣ-săn tisatten-năsăn. A-wa s-kăla inăqq, ăbas tăn-ăsikărakăḍ, jăn-t abăraj; wăr-ĕlkemăn inĕzjam-năsăn ar i-a-wa făll-tĕgl' ăddunya. 20Win-ăddinăt, wăr dăr-săn noleh ed năkkăneḍ, ăkall-nănăɣ wa ăynayăn, išĕnnawăn a iha. Išĕnnawăn-en-dăɣ a-s ilkam ad-hanăɣ-tăn-dd ifĕl Emăli Ɣisa Ălmasex-i n-Ămaɣlas-nănăɣ. 21Ǝnta a iha ăṭṭăma-nănăɣ ed afăl dd-iqqăl, ad-fălla-năɣ-in-ikkĕs taɣĕssa-ta-dăɣ tărna tamăttant, ăkf'-anăɣ tiyyăt tăynayăt lat ălxurmăt šund ta-net ed ila tărna s-innăhăḍ dăɣ-hărăt iket-net.

will be added

X\