Kăl-Fĕlibb 1

1A-wa Bulĕs d-Timoti, eklan n-Ɣisa Ălmasex, hin-ĕktabnen i-e d t-illăm emĕššeddĕj n-Ɣisa Ălmasex izzaɣăn aɣrĕm wa n-Filĕbb, nĕktab-in daɣ i-ărrabexăn wi n-imănnăhăḍăn n-ălkănisăt d-imadhalăn-năsăn. 2Năhuul-kăwăn-in, ikf'-iwăn Măssinăɣ-i n-Abba-nănăɣ d-Emăli Ɣisa Ălmasex ănnuɣmăt d-ălxer. 3E-d kăwăn-dd-ĕkteɣ-dăɣ, ad-dd-ăqqĕlăɣ ɣas tumayăɣ i-Măssinăɣ dăɣ-tĕssĕba-năwăn, 4e-d t-dălăɣ-dăɣ, ad-has-ăjăɣ tamădilt-hawăn tăddewăt d-tedăwit 5făl-a-s ɣur-ašăl-i-dăɣ d-kăwăn-in-ăssawăḍăɣ isălan n-Ălĕnžil har năkk-da-dăɣ, kăwăneḍ a-s imadhalăn-in wi n-tidĕt. 6Ǝkkasăɣ ăššăk a-s Măssinăɣ-i kăwăn-dd-intăjăn s-a-wa-dăɣ olăɣăn, ĕnta a kăwăn-e-idhĕlăn s-amišĕl-net s-sărho hundăɣ har ašăl-wa dd-e-iqqĕl Ɣisa Ălmasex. 7Inĕzjam-in hawăn-den-dăɣ, ĕnta-den-dăɣ daɣ a-wa ăniihăjjăn ed wăr kăla okăy ašăl s-wădden tĕjraw-ahi tenere-năwăn ed, ămašal-wa hi-issăɣlăf Măssinăɣ dăɣ-ănnuɣmăt-net, oharăɣ-t dăr-wăn hărwa wăr heɣ takărmut ăzzăman wa d-xaṭṭăbăɣ Ălĕnžil, ĕknasăɣ fălla-s băršeɣ ašăl-i-dăɣ d-heɣ tišĕm. 8Măssinăɣ a ăjjĕyhăn i-tărha ta măqqărăt hawăn-jeɣ, tărha-nin daɣ hawăn, toolăh d-ta hawăn-ija Ɣisa Ălmasex. 9Tattărăɣ s-Măssinăɣ, ad-timɣar tărha-năwăn, tĕhĕlĕm s-data, tĕjrĕwăm musnăt wa n-tidĕt, ăddewăn d-sărho 10i-ad-tudabem tăbĕḍḍawt jer-a-wa olăɣăn d-a-wa lăbasăn, i-ad-tišdajăm, tumasăm ăddinăt wăr-iwer ălɣib, ăqqalnen i-ašăl wa dd-e-iqqĕl Ălmasex. 11Ɣisa Ălmasex-en-dăɣ a kăwăn-e-idhĕlăn i-ad-tumas tămudre-năwăn, tămudre dd-tirĕwăt iqqud ed a-wen-dăɣ a ămoosăn ălxurmăt d-tĕmmal i-Măssinăɣ. 12Ayĕtma-ɣ, ărheɣ ad-tĕlmĕdăm a-s a-wa sĕmmăn hi-irmăsăn, ehel n-s-data n-Ălĕnžil a dd-orăw dăɣ-ulhawăn n-ăddinăt ăjjootnen 13făl-a-s, ašăl-i-dăɣ, jer-dăɣ-ehăn n-ămănokal wa măqqărăn wăla dăɣ-idăggan wi iyyăḍnen diha-dăɣ, wăr t-illa ere s-wădden issan a-s tišĕm ti heɣ, tĕssĕba n-isĕm wa n-Ălmasex a făl tănăt-heɣ. 14Tĕššĕm n-ayĕtma dăɣ-ăddin, tĕkkăs ăššăk dăɣ-alkum i-Ɣisa ed hannăyăn tišĕm ti-heɣ, ikf'-en a-wen-dăɣ hi-irmăsăn taholăt tăynayăt d-iba n-tasăja dăɣ-iji n-isălan n-Măssinăɣ. 15Tidĕt, ăddinăt iyyăḍ, erk ĕnniyăt d-utăr n-asĕgdah n-iman dăr-i a tăn-ijăn dăɣ-iji n-isălan n-Ălmasex măšan, a-wen, wăr hin-ikkes a-s ăddinăt iyyăḍ, ĕnniyăt olaɣăn a-s xaṭṭăbăn Ălĕnžil. 16Wi ĕntăneḍ, ărhan a-wa hăn, ĕjlayăn dăɣ-s ed ĕssanăn a-s Măssinăɣ a hi-ăsnăfrănăn i-ad-sĕtbĕtăɣ i-ăddinăt tidĕt ta ămoos Ălĕnžil. 17Wi tattărnen asĕgdah n-iman-năsăn dăr-i dăɣ-iji n-isălan n-Ălmasex, erk ĕnniyăt wa n-ĕjrăhăt-ah'-in a ăwwayăn, ordan a-s a-wen-dăɣ a făll-i dd-e-isiwĕḍăn tĕsĕmme d-erk ĕmmĕk wa heɣ dăɣ-tišĕm-in. 18Ămăra, ma iɣšad a-wen? Jer-s-isoran wăla s-tidĕt, Ălmasex, ad-titwĕjjin isălan-net i-ăddinăt. Ǝnta-den-dăɣ a-wa hi-ăsidăwen, hak ašăl daɣ timɣar-dd tedăwit-in 19ed ĕflasăɣ a-s a-wa hannăyăɣ dăɣ-ălɣizabăt iket-net, i n-tănfo-nin. Ǝssanăɣ a-s, ad-dd-ĕzjărăɣ a-wen-dăɣ iket-net ed, tĕddalăm-ahi Măssinăɣ, idhal-ahi daɣ Unfas n-Ɣisa Ălmasex. 20Ǝkneɣ asĕddărhĕn n-ad-ăj a-wen-dăɣ ed, wăr-ĕkkesăɣ ăṭṭăma-net, a-wen-dăɣ a făl, wăr hi-ăskărakăḍ iji n-isălan-net. A-wa ărheɣ dăɣ-Măssinăɣ a-s jer-ašăl-i-dăɣ wăla ašĕkka, umaset derhan-in asĕmɣar n-isĕm n-Ɣisa Ălmasex dăɣ-taɣĕssa-nin jer-ĕddarăɣ wăla ămmuɣ 21făl-a-s ɣur-i, Ălmasex a-s tămudre-nin, tămoos-ahi tamăttant tăsonḍaḍt. 22A hi-ikfa Măssinăɣ dăɣ-taɣrĕst-dăɣ, ad-ĕšɣalăɣ a ih' ălfăyda i-Ɣisa Ălmasex, a-wen-dăɣ a făl wăr-ĕssenăɣ ĕndek a-wa he-sĕnnĕfrĕnăɣ jer-tamăttant d-tămudre; 23ănimăntăšăɣ jer-hărătăn-win-dăɣ n-ĕssin: itajjăš-ahi-dd derhan n-a-s uf'-ahi, ad-ĕjmăḍăɣ ăddunya, ăkkăɣ diha t-illa Ălmasex, ĕnta-den-dăɣ daɣ a-wa ufăn s-a ăjjeen, 24măšan daɣ hannăyăɣ a-s, dăɣ-tĕssĕba-năwăn, iššăm-ah'-in, ăqqiimăɣ ĕddarăɣ edes-hawăn. 25Ǝkkasăɣ ăššăk a-s ad-ĕkkĕsăɣ hărwa ăzzăman jere-wăn i-ad-tĕhĕlĕm s-data, timɣar daɣ tedăwit n-immun-năwăn. 26Dihen, ašăl wa d-kăwăn-in mad-ăqqĕlăɣ, ad-hawăn-umas ašăl n-tedăwit s-dd-tăssibăb tassaɣt-nănăɣ d-Ɣisa Ălmasex făl tĕssĕba n-a-wa hi-ija. 27Tĕssĕba n-a-wen a făl, ĕṭṭĕfăt dat-ăddinăt tămudre tăssitbătăt alkum-năwăn i-Ălĕnžil wa n-Ălmasex; jer-ăqqalăɣ-kăwăn-in wăla, umaset a-s sallăɣ a-s tĕṭṭafăm Ălĕnžil s-ăṣṣahăt, tĕṭṭafăm iyyăn n-ĕnniyăt d-iyyăn n-ulh, jam iyyăn n-akĕnnas dăɣ-isălan n-immun s-Ălĕnžil. 28A ijăn-dăɣ, wăr kăwăn-sărmaɣnet išĕnja-năwăn s-wăla a ĕnḍărrăn. A-wa tamašalăn a-s tasĕtbat n-ĕlhĕllak-năsăn, a-s ija a-wen kăwăneḍ, tămudre-năwăn a salmadăt s-ĕlɣĕllas wa kăwăn-ikfa Măssinăɣ, a-wen, Măssinăɣ a t-ijăn. 29A-wen, janneɣ-awăn-t, i-ad-tĕssanăm a-s teɣăre ta hanăɣ-dd-ija Măssinăɣ dăɣ-ănnuɣmăt-net s-Ălmasex, ij'-anăɣ-tăt-dd i-ad-săr-s namĕn, nĕnhĕy daɣ aɣăna dăɣ-tĕssĕba n-isĕm-net, 30tahĕrĕm dăr-i daɣ kăwăneḍ, anmănɣ wa s-hi-tĕnhăyăm heɣ-t, heɣ-t daɣ har ašăl-i-dăɣ.

will be added

X\