Mătti 9

1Ijjăš Ɣisa ḍarăt-a-wen turăft n-aman, ijlăy ejănš s-taɣrĕmt ta-net. 2Diha-dăɣ hin-ĕwwăḍăn a-s ăddinăt-da-dăɣ, ămisawăyăn ănabdon insan făll-asĕftăɣ. Inhăy Ɣisa immun-năsăn ɣas, innă i-anăbdon: "Alyaḍ-in, wăr tĕkkesăd ăṭṭăma, ibăkkaḍăn-năk, ătwănšăn-ak." 3Diha-dăɣ d-innă a-wen-dăɣ, a dd-ĕggădăn ălɣulam n-Ăṭṭăwrăt, ad-jannen dăɣ-iman-năsăn: "Wa ĕnta, ăskafăr." 4Ilmăd Ɣisa ɣur-iman-net a-wa ihăn inĕzjam-năsăn, a-wen-dăɣ a făl hasăn-inna: "Ma itajjăn erk ĕnniyăt-wa-dăɣ dăɣ-ulhawăn-năwăn? 5Ma ojărăn tărăɣse jer-ad-tĕnnĕd i-ăwadĕm: 'Ătwănšăn-ak ibăkkaḍăn-năk', d-ad-has-tĕnnĕd: 'Ǝbdĕd, ĕrjĕš?' 6Ašăl-i, ăssiilmădăɣ-kăwăn a-s Ăgg-ăgg-adĕm, ijraw făll-ărori n-ăkall turhajăt n-tenăšše n-ibăkkaḍăn." Innă Ɣisa ḍarăt-a-wen i-anăbdon: "Ǝbdĕd, ĕḍkĕl asĕftăɣ-năk, ĕqqĕl ehăn-năk." 7Ibdăd, iqqăl ehăn-net. 8Tărmăɣ tamĕtte ta tĕnhăyăt a-wa ijăn, ad-tiimĕlĕn ăddinăt Măssinăɣ-i ikfăn dăgg-adĕm tădabit togdăhăt d-a-wa-dăɣ. 9Ifăl Ɣisa dihen ḍarăt-a-wen, inhăy ănarmas n-tiwse s-isĕm-net Mătti ăqqiima dăɣ-edăgg n-ălxidmăt-net, iɣr'-e, inn'-as: "Ǝlkĕm-ahi"; ibdăd Mătti, ilkăm-as. 10Ăsmăjarăt Mătti Ɣisa s-ehăn-net ḍarăt-a-wen. Itaɣăyma Ɣisa dăɣ-edăgg wa n-imĕnsiwăn a-s erk ăddinăt han inarmasăn n-tiwse ăjjootnen da-dăɣ, osăn-dd, ănɣăymăn dăr-s ĕnta d-inĕṭṭulab-net. 11Ǝnhăyăn-t hărăt dăɣ-kăl-faris t-ĕllanen dihen ɣas, ĕnnăn i-inĕṭṭulab-net: "Ma isaharăn ălɣalim-năwăn imĕnsiwăn d-inarmasăn n-tiwse d-erk ăddinăt-wi-dăɣ?" 12Isl'-asăn Ɣisa ɣas, innă: "Ăddinăt ăssoxătnen, wăr-ămɣatărăn s-lăxtur; imarhinăn a săr-s ămiɣatărnen." 13Inn'-asăn daɣ: "Ma ămoos ălmăɣna n-a-wa s-inna Măssinăɣ dăɣ-măjrăd-net: 'Ojăr a-s ɣur-i la tăhanint idĕm uhĕn tikutawen.' A-wen ălmăɣna-net a-s, năkk, wăr dd-ămešălăɣ s-ăddinăt wi ordănen iman-năsăn iqqud, inăsbăkkaḍăn a-s dd-ămešălăɣ i-ad-tăn-ăɣlĕsăɣ." 14Osăn-dd inĕṭṭulab n-Exya Ɣisa ḍarăt-a-wen, ĕnnăn-as: "Mafăl năkkăneḍ d-kăl-faris nĕtuẓam dehiyyăn, a-s ija a-wen, inĕṭṭulab wi-năk, wăr tuẓamăn?" 15Issăɣlăy-tăn Ɣisa tangalt dăɣ-hasăn-inna: "Ajăn kăl-tuksest ilzam-tăn ăẓum tăn-ăẓiẓăkănẓărăn a ikka ămaẓlay ill'-e jere-săn? Ǝlkamăn išilan-wi dăɣ-tăn-mad-ifĕl ămaẓlay, dihen, ad-ĕjrĕwăn s-ăẓum. 16Wăr t-illa ere itĕggatăn tikĕst i-temălsit wăššărăt s-taswĕḍt n-tabdoɣt tăynayăt; afăl ija a-wen, ad-dd-tărkĕb taswĕḍt ta tăynayăt temălsit, tăj amĕnd ojărăn wĕnnin. 17Ăddinăt, wăr tĕjjĕn aman n-lăɣnăb ăynaynen, ăxxiimmărnen dăɣ-ijdad; ere ijăn a-wen har kăfăn aman-ĕnnin dăɣ-ijdad, ad-has-sĕbbuqqen ijdad-net, ifut dăɣ-lăɣnăb hakd-dăɣ dăɣ-ijdad. Aman n-lăɣnăb ăynaynen, ăxxiimmărnen, iddidăn ăynaynen a dăɣ-tăn-itajj ăwadĕm, dihen, wăr-e ifut măssi-săn dăɣ-wi wăla wi." 18Ămmiijrăd Ɣisa i-tamĕtte dăɣ-isălan-win-dăɣ a-s a ĕnḍărrăn-dăɣ, iyyăn dăɣ-imănnăhăḍăn n-taɣrĕmt-en-dăɣ da-dăɣ t-dd-osăn, irkăɣ data-s, inn'-as: "Talyaḍt-in, iket tăt-ăba măšan nidawet săr-s, sĕnsĕd fălla-s ăfuss-năk, ad-dd-tĕddăr." 19Ibdăd Ɣisa, ăddew dăr-s ĕnta d-inĕṭṭulab-net. 20Igla har šik-dăɣ tamăḍt tiyyăt lat măraw iwĕtyan d-ĕssin ijammăḍ-tăt ašni da-dăɣ dd-mălăt ḍara-s, ḍăs afăr n-erăswăy-net 21ed a-s tăjj a-wen-dăɣ, janna dăɣ-iman-net: "Afăl ḍăsăɣ wăla-dăɣ erăswăy-net, ad-ĕzzĕyăɣ." 22Innăḍ-dd săr-s Ɣisa, inhăy-tăt, inn'-as: "Talyaḍt-in, wăr tĕkkesăd ăṭṭăma, ăzozăy-kăm immun-năm." Tĕzzăy tamăḍt ăssaɣăt-wen-dăɣ. 23A-s hin-iwwăḍ Ɣisa d-inĕṭṭulab-net ehăn n-emănnăhăḍ, inhăy imăwatăn n-tiɣnab ti n-uḍĕf n-iba d-ăddinăt wi hasăn-hallănen, ăsikălăl a-wen-dăɣ iket-net, ja tăkat dăɣ-išĕnnawăn. 24Omăr s-ad-ĕzjărăn ăddinăt fălla-s ed inn'-asăn: "Tarat, wăr tăt-ăba, eḍĕs ɣas a ja." Jăn-t tekăškăšt. 25Tĕzjăr fălla-s tamĕtte ɣas, ijjăš ehăn wa dăɣ-tĕnsa talyaḍt, irmăs-tăt-dd s-ăfuss, tĕnkăr-dd. 26Ǝntăjăn isălan n-a-wen-dăɣ dăɣ-teje-ten-dăɣ iket-net. 27Ašăl iyyăn, irjaš Ɣisa a-s t-ăɣrăn ĕssin imĕddorɣal, ăsiɣăren, jannen-as: "Ya Ăgg-Dawĕd, aḍĕn-anăɣ tăhanint!" 28Iwwăḍ-in Ɣisa ehăn wa ikka, ĕjjăšăn-t-dd fălla-s imĕddorɣal ĕnnin n-ĕssin ɣas, inn'-asăn: "Ak tidĕt-dăɣ a-s tĕflasăm a-s ăddobeɣ ad-arăɣ tiṭṭawen-năwăn?" Ǝnnăn-as: "Ălɣalim, nĕflas a-wen." 29Iḍăs Ɣisa tiṭṭawen-năsăn, inn'-asăn: "Itwĕjjet-awăn a-wa dăr-ogdăh immun-năwăn." 30Ămerănăt tiṭṭawen-năsăn măšan, ikna asĕmmăhĕḍ dăɣ-săn, inn'-asăn: "He kăwăneḍ! Wăr jem isălan n-a-wa ijăn dăɣ-ăwadĕm wăl' iyyăn", 31măšan, ĕzjărăn ehăn fălla-s ɣas, ĕffăyăn isălan dăɣ-ăkall iket-net. 32Diha-dăɣ d-ĕglăn imĕddorɣal, a-s amălšon iyyăn s-ikras alšin wa t-ihăn ilĕs-net da-dăɣ săr-s dd-ăwwăyăn ăddinăt. 33Ikkăs dăɣ-s Ɣisa alšin wa t-ihăn, ad-itamăjrad. Tĕqqăl-dd tamĕtte ɣas tor' emm, janna: "Wăr kăla ătwănhăy šund a-wa-dăɣ dăɣ-ăkall wa n-Iṣrayil." 34Măšan, kăl-faris ĕntăneḍ a jannen: "A-wa tărna n-Iblis-i n-ămănokal n-alšinăn a-s itakkăs alšinăn dăɣ-ăddinăt." 35Ăllil Ɣisa ḍarăt-a-wen iɣărman d-tidbi iket-năsnăt, isaɣra dăɣ-ihănan n-ăddin wi n-kăl-Ălyăhud, ixaṭṭăb Ălĕnžil wa n-Tĕmmĕnĕya n-Măssinăɣ, izizuy ăddinăt dăɣ-turhĕnnawen d-ălɣibăn. 36Inhăy Ɣisa tamĕtte ta tăjjet has-tĕlkămăt ɣas, tănɣ'-e tăhanint-net; inhăy fălla-săn alĕḍḍeš d-ezărri, olăhăn-as ɣas d-tihatten wăren la amăḍan. 37Innăḍ-dd s-inĕṭṭulab-net, inn'-asăn: "Ašĕkrĕš ăggolăt, ĕttăɣam ijjĕt măšan, wăr-ĕjjĕtăn inaxdimăn t-olăynen. 38Ădĕlăt măssi-s n-ašĕkrĕš i-ad-dd-išĕmmišĕl inaxdimăn olăynen ašĕkrĕš-net."

will be added

X\