Mătti 8

1Ătrară-dd Ɣisa taḍaɣt ɣas, tĕlkăm-as tamĕtte tăjjeet. 2Dăɣ-a-wen-dăɣ ad-has-dd-ilkăḍ ăhalĕs ijraw jĕri, irkăɣ data-s, inn'-as: "Ălɣalim, afăl tărhed a-wen-dăɣ, tăddoobed ad-hi-šĕšdĕjăd." 3Iẓẓăl ăfuss-net, iḍăs-t, inn'-as: "Ărheeɣ-t, išdaj." Šăddij dăɣ-jĕri ălwăqq-wen-dăɣ. 4Inn'-as Ɣisa ḍarăt-a-wen: "Wăr jed isălan i-ăwadĕm wăl' iyyăn n-a-s năkk a kăy-ăzozăyăn, ĕglĕw, sĕkĕn iman-năk i-u-tikutawen, tĕjĕd takute ta s-inna ănnăbi Mosa dăɣ-isălan n-tĕšĕdje n-kăl-jĕri i-ad-umas a-wen tajuhe i-tamĕtte n-a-s tĕzzăyăd." 5Ijjăš Ɣisa ḍarăt-a-wen aɣrĕm wa n-Qăfărnaxum, ilkăḍ-as kăbtăn iyyăn, ad-t-ilaqqăd, ijann'-as: 6"Ălɣalim, ănaxdim-in insa ɣur-ehăn, tĕbdan-t tiẓẓurt d-tisnant." 7Inn'-as Ɣisa: "Ad-t-asăɣ, zuzĕyăɣ-t." 8Ăwwežăb-as kăbtăn, inn'-as: "Aha-aha ălɣalim! Wăr-ănhăjjăɣ d-ad-tĕkkĕd ehăn-in, tĕjjĕšăd-t, ănn ɣas tăfert, ad-izzĕy ănaxdim-in 9făl-a-s năkk-i-hi, ĕllan-t imănokalăn daw-t-ĕlleɣ, leɣ daɣ năkk ĕssărdusa daw-i t-ĕllanen; e-d ĕnneɣ i-iyyăn: 'Ǝglĕw', ad-iglĕw; e-d ĕnnĕɣ i-wa iyyăḍăn: 'Ǝyyăw', ad-hi-dd-ass. Akli-nin daɣ e-d has-ĕnneɣ: 'Ăj a-wa', ad-t-ăj." 10Islă Ɣisa i-măjrăd-wen-dăɣ ija kăbtăn ɣas, ijrăẓ-as ălxal-net; innăḍ-dd ḍarăt-a-wen s-ăddinăt wi has-ĕlkamnen, inn'-asăn: "Ăsidătteɣ-awăn a-s, wăla dăɣ-ăkall wa n-Iṣrayil, wăr kăla ĕnhăyăɣ ere s-ogdăh immun-net d-wa n-ăhalĕs-i-dăɣ. 11Ăssiilmădăɣ-kăwăn a-s ilkam ad-dd-asĕn ăddinăt ăjjootnen, dd-falnen emăynăj d-atăram ĕnɣĕymĕn d-Ibrahim d-Isxaqq d-Yaqub dăɣ-amăjaru wa madăn-ăj dăɣ-Tĕmmĕnĕya n-Măssinăɣ. 12A-s ij'-a-wen, ăddinăt wi s-ăniihăjja a-s ĕntăneḍ a ănnuflăynen dăɣ-Tĕmmĕnĕya n-Măssinăɣ, ad-hin-ĕtwĕjărăn dăɣ-tihay ti n-ajăma, ad-hallăn, ẓimĕkărkiẓăn isenăn făl tămujriẓt." 13Innă Ɣisa ḍarăt-a-wen i-kăbtăn: "Ǝglĕw, ijrăw-ak Măssinăɣ a-wa s-tomănăd." Izzăy ănaxdim-net ăssaɣăt-wen-dăɣ. 14Ifăl Ɣisa dihen, ikkă ehăn wa n-Bĕṭrus. A-s hin-iwwăḍ, tĕnsa taḍăggalt n-Bĕṭrus, tărmas-tăt tenăde. 15Iḍăs afuss-net, tărẓa fălla-s tenăde, tĕbdăd, tăsmăjarăt-t. 16Toḍa tăfukt ɣas, ămewăyăn-dd săr-s imĕlšan ăjjootnen, innă tăfert ɣas, ĕzzayăn; ăzozăy daɣ dihen e d t-illăm ere ărhinăn. 17Ijă a-wen i-ad-itbĕt a-wa innă ănnăbi Saya a-s innă: "Iḍkăl fălla-năɣ ălɣibăn-nănăɣ, ăzozăy-anăɣ dăɣ-turhĕnnawen-nănăɣ." 18Inhăy Ɣisa aɣliɣĕli wa t-dd-ja tamĕtte s-ĕjut ɣas, innă i-inĕṭṭulab-net, ad-ĕjlĕyăn ejănš s-ašrut wa iyyăḍăn. 19Ilkăḍ-as-dd ălɣalim n-Ăṭṭăwrăt iyyăn, inn'-as: "Ălɣalim, e-s tĕkked-dăɣ, ĕlkamăɣ-ak." 20Inn'-as Ɣisa: "Ibăggan lan tihaliwen, igḍaḍ lan iskak măšan, Ăgg-ăgg-adĕm, wăr ila wăla edăgg dăɣ-issĕnsă eɣăf-net." 21Iggăd-dd ăhalĕs iyyăn irhan alkum-has, inn'-as: "Ălɣalim, ăkf'-ahi turhajăt n-ad-ăglăɣ ĕẓkăɣ abba-nin, ĕqqĕlăɣ-dd, ĕlkĕmăɣ-ak." 22Inn'-as Ɣisa: "Ǝlkĕm-ahi, tĕyyĕd fălla-k inĕmmuttan ad-ĕẓkĕn inĕmmuttan-năsăn." 23Ănmăjjaš Ɣisa turăft n-aman d-inĕṭṭulab-net ḍarăt-a-wen, 24wăr-ăhojăn a-s aḍu-i-dăɣ ăṣṣoohen-da-dăɣ dd-inkărăn, ad-tibhilbĕhilnăt tinăzzămăren i-turăft siha d-siha. A-s ităjj a-wen-dăɣ, Ɣisa ĕnta, iṭṭas. 25Ǝssĕnkărăn-t inĕṭṭulab-net dăɣ-eḍĕs, ĕnnăn-as: "Ălɣalim, agĕẓ-anăɣ, nĕhlăk." 26Inkăr-dd, inn'-asăn: "Ma kăwăn-ăssirmăɣăn? Tĕmmĕtkit ija immun-năwăn!" Ibdăd ălwăqq-wen, ăsmăhăḍ făll-aḍu d-ejănš, sămmeḍ-in a-wen-dăɣ iket-net. 27Ǝqqălăn-dd ɣas inĕṭṭulab oran imawăn, jannen: "Uwwuww! Wa ăwadĕm s-wăla aḍu d-ejănš, sajadăn-as, ma ămoos?" 28Ăsjăn Ɣisa d-inĕṭṭulab-net făll-ašrut n-ejănš wa n-teje ta n-Gadara ɣas, ĕlkăḍăn-as-dd ĕssin imĕlšan ĕzzaɣnen tiɣĕnneren, janen tăllăbăst-ta-dăɣ s-ăbas t-illa ere ihălăn ad-dd-ăj tiṭṭ-ten-dăɣ hăn. 29Ǝnhăyăn Ɣisa ɣas, ăɣwătten alšinăn, ad-jannen: "Ya Rure-s n-Măssinăɣ, ma dăɣ-năɣ tărhed? Ajăn tissust-nănăɣ a-s dd-tosed iket-di dd-tiwĕḍ tăqqăn n-a-wen?" 30Ḍann tahrut n-ĕlxĕnžărăn dăɣ-attayăn n-dihen, 31dălăn alšinăn Ɣisa, ĕnnăn-as: "Kunta takkăsăd-anăɣ dăɣ-ăkall, suk-anăɣ tahrut ta n-ĕlxĕnžărăn." 32Inn'-asăn: "Ăglăt!" Ǝzjărăn alšinăn meddĕn-ĕnnin, ĕjjăšăn ĕlxĕnžărăn, ad-dd-titrĕktĕrikăn, wa-dăɣ n-afălla n-taḍaɣt, tiḍĕwăn dăɣ-ejănš, tattăn-tăn aman. 33Ošălăn imăḍanăn-năsăn s-aɣrĕm, jăn isălan n-a-wa ijăn d-a-wa dd-išreyăn făll-imĕlšan wi n-ĕssin i-ăddinăt. 34A ĕnḍărrăn, aɣrĕm iket-dăɣ-net da-dăɣ dd-izjărăn s-Ɣisa, ĕnhăyăn-t ăddinăt ɣas, ad-t-tĕddalăn dăɣ-ad-ifĕl ăkall-năsăn.

will be added

X\