Mătti 7

1"Wăr toẓemăm ăwadĕm i-ad-wăr kăwăn-itiẓĕm ăwadĕm 2făl-a-s, a-wa s-toẓămăm ăddinăt wi iyyăḍnen a-s kăwăn-e-aẓĕmăn kăwăneḍ-dăɣ; a-wa s-kătăm ăddinăt wi iyyăḍnen a-s kăwăn-e-ĕkĕtĕn ĕntăneḍ-dăɣ. 3Mafăl hannăyăd teẓewt ta hăt tiṭṭ n-ă/n/na-k, a-s ija a-wen, wăr hĕnnĕyăd afăɣot wa ihăn tiṭṭ ta-năk? 4Meɣ daɣ, ĕndek ĕmmĕk wa s-mad-tĕnnĕd i-ă/n/na-k: 'Ăyy-ahi ad-ĕkkĕsăɣ teẓewt dăɣ-tiṭṭ-năk', a-s ija a-wen, kăyy iman-năk, iha afăɣot tiṭṭ ta-năk. 5Ălmunafeɣ yaden! Ǝkkĕs-in afăɣot wa ihăn tiṭṭ-năk tĕzzar, dihen, ad-tudabed ahănay, tudabed ukĕs n-teẓewt ta hăt tiṭṭ n-ă/n/na-k. 6Ǝllan-t ăddinăt-i s-dăɣ-a-wa tăjjăn, wăr-ĕẓleyăn d-iyyăḍan, wăr tăn-tĕkfem a šăddijăn ed hălăn ad-kăwăn-dd-ĕqqĕlăn, aḍwĕn fălla-wăn; iyyăḍ, wăr-ĕẓleyăn d-ĕlxĕnžărăn, wăr daw-săn-in-jerăm tisɣalen-năwăn ed ad-tănăt-ĕfkĕlfĕkĕlăn." 7"Ădĕlăt Măssinăɣ, ad-kăwăn-ăkf; ĕmmăɣăt, ad-tĕjrĕwăm; ăɣrăt-t, ad-hawăn-ăkawăn. 8Ere idălăn, ad-ikrĕš, ere immăɣăn ad-ijrĕw; ere iɣrăn Măssinăɣ dăɣ-tămăɣatert t-tărmasăt, ad-has-tăt-ikkĕs. 9Ǝndek dăɣ-wăn wa s-e-d dăɣ-s ittăr rure-s tajĕlla ad-t-ăkf tăhunt? 10Meɣ wa s-e-d t-idăl dăɣ-emăn, ad-t-ăkf taššălt? 11Ɣas, kunta kăwăneḍ-i n-inăllăbăsăn, tĕssanăm isuf n-a-wa olăɣăn i-aratăn-năwăn, ăb' ăṭṭăma n-ad-wăr kăwăn-ikfa Abba-năwăn-i ihăn išĕnnawăn a-wa ufăn, afăl t-dălăm dăɣ-s. 12Tajjăt i-ăddinăt a-wa s-tărhăm ad-hawăn-t-tajjăn ed a-wen-dăɣ a innă alămăr wa n-ănnăbi Mosa d-ănnăbităn wi iyyăḍnen." 13"Ǝjjĕšăt tămudre ta n-tidĕt s-emm wa kărruẓăn făl-a-s ill'-ee zăbo hărĕwăn, olwan, ĕnta a tilal tĕššĕm n-ăddinăt măšan, ajilal-net, ĕlhĕllak, 14a-s ija a-wen, emm wa kărruẓăn d-zăbo wa sădidăn, wăr-ĕjjĕtăn ăddinăt wi săr-s tajjăšnen măšan, tămudre ta n-tidĕt a-s itiɣĕd." 15"Ăgĕẓăt iman-năwăn dăɣ-ănnăbităn wi n-bahu-i s-a-s kăwăn-dd-tisĕn, jan iman-năsăn ikĕrwatăn wăr ih' ăššar, a-s ija a-wen, tiɣĕs ĕnsaynen a ămoosăn. 16Wăr hawăn-tĕmtĕllĕnet, ad-tăn-tĕzzĕyăm s-timašalen-năsăn. Ajăn ewărwăr, itiirĕw-dd lăɣnăb? Meɣ ajăn ajărof itiirĕw-dd tehăyne? 17Ahĕšk olaɣăn, ad-dd-arĕw aratăn olaɣnen măšan erk ahĕšk, wăr dd-e-arĕw a săl aratăn lăbasnen. 18Ahĕšk olaɣăn, wăr-itirĕw aratăn lăbasnen, ahĕšk daɣ lăbasăn, wăr-e arĕw aratăn olaɣnen. 19E d t-illăm ahĕšk wărăn itirĕw aratăn ih' ălfăyda, ad-hin-ăttănkăḍ, itwĕjăr-in dăɣ-efew. 20Ǝmmĕk-wen-dăɣ daɣ a-s ănnăbităn wi n-bahu, timašalen-năsăn a-s tăn-e-tĕzzĕyăm." 21"Wădden ăddinăt iket-năsăn wi hi-jannănen: 'Emăli, Emăli', a he-ĕjjĕšnen Tĕmmĕnĕya n-Măssinăɣ. Tĕmmĕnĕya n-Măssinăɣ, wăr tăt-e-ijjĕš ar ere wa itamašalăn erhet n-Abba-nin-i ihăn išĕnnawăn. 22Ašăl wa ilkămăn, ad-dd-ĕggĕdăn ăddinăt ăjjootnen, ĕnnĕn-ahi: 'Emăli, Emăli! Wădden măjrăd wa dăɣ-nălolăy i-ăddinăt, kăyy a t-ijăn dăɣ-imawăn-nănăɣ? Wădden nĕkkăs alšinăn dăɣ-ăddinăt s-isĕm-năk? Wădden nĕja tikunen ăjjootnen s-isĕm-năk?' 23Ăddinăt-en, ašăl-en, ad-hasăn-ănnăɣ s-afălla: 'Năkk ya wăr kăwăn-ĕzzeyăɣ, ajĕjăt-ahi, inămăšrayăn a tămoosăm.' " 24"Ere islăn i-măjrăd-wa-dăɣ s-iket t-jeɣ, ad-itamašal a-wa ĕnnĕɣ, ad-alăh d-ăhalĕs ijrahăn hărăt iɣăšăn ăkall har iwwăḍ tăhunt i-ăssas, idăy fălla-s ehăn-net. 25Ij' akăsa, ărtăynăt timḍĕl d-anji făll-ehăn-en măšan, wăr-oḍa ed iday făll-tăhunt. 26Măšan wa islăn i-măjrăd-in, ăqqima wăr t-ămešăl, olăh d-ere irmas iba n-tayĕtte idăyăn ehăn-net dăɣ-tasĕnjit. 27Ij' akăsa, ărtăynăt timḍĕl d-anji făll-ehăn-en, oḍa, ălhahăm-in s-iyyăt." 28Iḍăs ălxuṭbăt-wen-dăɣ ija Ɣisa tamĕtte, ĕqqălăn-dd ăddinăt ɣas oran imawăn 29făll-ĕjjăruẓăt-i-dăɣ hasăn-ija a-wa isăɣra ed isaɣr'-en s-ălxikmăt n-ere issanăn a-wa iha wădden šund ălɣulam wi n-Ăṭṭăwrăt.

will be added

X\