Mătti 6

1"Ăjăt ĕnniyăt, wăr-itumaset iqqud-năwăn i-Măssinăɣ a jam i-ad-kăwăn-in-ĕjrăhăn ăddinăt ed afăl a-wen-dăɣ a tajjăm, wăr mad-tĕkrĕšăm marušăt ɣur-Măssinăɣ-i n-Abba-năwăn ihăn išĕnnawăn. 2E-d tĕkkatăd, wăr wetăd tăsinsăɣt data-k šund a-wa tăjjăn ălmunafeɣăn dăɣ-ihănan n-ăddin wi n-kăl-Ălyăhud d-tišarriten i-ad-tăn-amĕlăn ăddinăt; ăsidătteɣ-awăn a-s marušăt-năsăn, imdă-dd ɣur-tĕmmal-ten-dăɣ tăn-tăjjăn ăddinăt. 3A ăniihăjjăn a-s, kăyy, e-d tĕkkatăd, ăj'-e dăɣ-ufăr, wăr-ilămmădet wăla-dăɣ ăfuss-năk wa n-tăšalje a-wa ikfa wa n-aɣil, 4dihen, ad-tumas takute-năk a iṣtarăn, ăkf'-ik Măssinăɣ-i n-Abba-năk ihannăyăn wăla a-wa iṣtarăn, timẓal n-emărked-năk." 5"E-d tĕddalăm Măssinăɣ, wăr tolehăm d-ălmunafeɣăn-i s-e-d tumadăn, tĕjraẓ-asăn tebădde dăɣ-ihănan n-ăddin wi n-kăl-Ălyăhud d-ammas n-tišarriten i-ad-tăn-in-ĕjrăhăn ăddinăt. Ăsidătteɣ-awăn a-s marušăt-năsăn, imdă-dd ɣur-tĕmmal-ten-dăɣ tăn-tăjjăn ăddinăt. 6Kăyy, e-d tĕddalăd Măssinăɣ, ĕjjĕš ider n-ehăn-năk, tĕɣfĕlăd-t-dd făll-iman-năk, tĕdlĕd Abba-năk-i ăttunkălăn ed Abba-năk-i ihannăyăn wăla a-wa ijăn dăɣ-atunkĕl, ad-hak-ăj erhet-năk. 7E-d tĕddalăd Măssinăɣ, wăr tăsjătăd măjrăd wărăn infa hărăt šund a-wa tăjjăn inĕẓẓulam -i ɣur-ija a-s asjĕt n-măjrăd-en-dăɣ a dd-madăn-isĕmmĕnĕnnăḍ ăfuss n-Măssinăɣ, ăkf'-en a-wa dăɣ-s ĕttărăn. 8Wăr dăr-săn tolehăm, a-wa s-tămiɣatărăm, issan-t Abba-năwăn iket-net hărwa wăr dăɣ-s t-tĕtterăm." 9"E-d tĕddalăm Măssinăɣ, ănnăt: 'Abba-nănăɣ-i ihăn išĕnnawăn, 10sĕmɣărnet ăddinăt isĕm-năk wa šăddijăn. Taset-dd Tĕmmĕnĕya-năk, ăjet erhet-năk făll-ărori n-ăkall, s-ĕmmĕk wa s-ija dăɣ-išĕnnawăn. 11Ăkf'-anăɣ isudar wi s-nămiɣatăr ašăl-i-dăɣ, 12ănš-anăɣ uḍlemăn-nănăɣ s-ĕmmĕk wa s-nĕnašš i-inaḍlamăn-nănăɣ. 13Wăr toyyed Iblis ăžžurrăbăt-anăɣ isiḍĕw-anăɣ dăɣ-abăkkaḍ, agĕẓ-anăɣ dăɣ-s, ((ed Tĕmmĕnĕya, tărna hakd ălxurmăt, i-năk hărkuk. Amin!))' 14Afăl naššăm i-ăddinăt wi kăwăn-ḍallămnen, ad-hawăn-in-ănš daɣ Abba-năwăn-i ihăn išĕnnawăn, 15măšan afăl wăr nĕššĕm i-ăddinăt wi kăwăn-ḍallămnen, wăr hawăn-in-e-ănš daɣ Măssinăɣ-i n-Abba-năwăn ibăkkaḍăn-năwăn." 16"Ašăl wa d-tuẓamăm i-ad-tăɣbĕdăm Măssinăɣ, wăr tăsbănẓăẓăm šund a-wa tăjjăn ălmunafeɣăn-i sawărnen tekenẓart idmawăn-năsăn i-ad-sĕlmĕdăn ăddinăt a-s ăẓumăn; ăsidătteɣ-awăn a-s marušăt-năsăn, imdă-dd ɣur-tĕmmal-ten-dăɣ tăn-tăjjăn ăddinăt, 17ănn-ak, kăyy, e-d tăẓumăd, ĕrdĕb-in, sănɣĕlăd aḍutăn 18i-ad-wăr-ilĕmmĕd ăwadĕm a-s tăẓumăd i-ad-tăɣbĕdăd Măssinăɣ ed igdăh-ak a-wa dăɣ s-Abba-năk-i ăttunkălăn, ihannăy a-wa ijăn dăɣ-atunkĕl, ad-hak-ăj erhet-năk." 19"Wăr tĕjmerăm ărrĕzăɣ i-ăddunya ed tăddoobăt tukmadt d-tenekt ad-t-tăkš, ăddooben daɣ imăkrăḍăn ad-t-akrĕn. 20Ănn-ak, a-wa jammărăd, ĕjmăr-t i-ălžănnăt-i wăr ha tukmadt wăla tenekt wăla imăkrăḍăn t-ărẓănen wăla-i t-okărnen. 21Ădduuttăt a-s inĕzjam n-ulh n-ăwadĕm, wăr tĕffilăn edăgg wa dăɣ-itwăr tĕla-net." 22"Tiṭṭ n-ăgg-adĕm a-s tefătelt n-taɣĕssa-net, afăl tolaɣ tiṭṭ-năk, ad-hannăy taɣĕssa-năk iket-net, 23măšan afăl ijraw hărăt tiṭṭawen-năk, adiš taɣĕssa-năk daɣ, wăr hĕnnĕy hărăt. Ɣas kunta kăyy ănnur wa hak-ămoosnăt tiṭṭawen-năk, iha tihay, adiš tidĕt-dăɣ a-s, ad-kăy-ărmĕsnăt tihay ăssuksăḍnen." 24"Wăr t-illa ăwadĕm ăddooben ad-ixdam i-ĕssin imălan: iyyăt-i-dăɣ, ad-akĕḍ d-iyyăn, ărh wa iyyăḍăn meɣ daɣ ikf'-iman-net i-iyyăn, iksĕn wa iyyăḍăn. Wăr-ăddoobăt ăwadĕm ad-ixdam i-Măssinăɣ, ošal daɣ ḍarăt terše n-aẓrĕf. 25A-wen-dăɣ a-făl hawăn-janneɣ: wăr kăwăn-jărrăwnet inĕzjam n-a-wa mad-tĕkšĕm d-a-wa mad-tĕswĕm d-a-wa mad-tĕlsĕm; iman-năwăn, ajăn wădden ojărăn tetăte? Ăssexăt n-taɣĕssa-năwăn daɣ, wădden ojăr isĕlsa? 26Sĕjrăhăt ɣas igḍaḍ-wi ĕllăynen dăɣ-ălhăwa, wăr tĕdumun, wăr tĕjlubun, wăr tĕggărăn dăɣ-ijăndăn măšan, ăssodăr-tăn Abba-năwăn-i ihăn išĕnnawăn. Ajăn wădden tufăm-tăn s-a ăjjeen! 27Ǝndek ɣas dăɣ-wăn wa ăddooben s-inĕzjam-net ad-isiwĕḍ taɣrĕst-net wăla s-a ogdăhăn d-emm n-asĕnnan? 28Adiš, mafăl kăwăn-ĕjrawăn inĕzjam n-a-wa mad-tĕlsĕm? Săɣret-kăwăn tăboyt n-išĕkraš hărăt, ĕnhĕywăt-tăt-ak, daggăl, wăr ẓĕtt, wăr ẓĕmmĕy 29măšan ăsidătteɣ-awăn a-s wăla ămănokal Sulăyman hakd terše-net iket-net, wăr kăla ojăr tăboyt-i-dăɣ asĕssihăɣ n-ašăl. 30Ɣas kunta Măssinăɣ isalsa teyĕšše n-išĕkraš s-ašăl-i-dăɣ tĕbdaj, ašĕkka ad-hin-tiɣar, tărɣ s-ĕmmĕk-wen-dăɣ, ăb' ăṭṭăma n-ad-wăr hawăn-iẓẓĕẓmăy kăwăneḍ? Tĕmmĕtkit ija immun-năwăn! 31Wăr kăwăn-ɣăllăbnet inĕzjam har dd-tĕqqĕlăm jannem: 'Ma mad-năkš? Ma mad-nĕsĕw? Ma mad-năls?' 32Inĕzjam šund-win-dăɣ, inĕẓẓulam a dăɣ-săn ošalnen, ɣallăbăn-tăn. Kăwăneḍ, Abba-năwăn-i ihăn išĕnnawăn, wăr t-illa a-s tămiɣatărăm s-wădden, issan-t. 33Ǝdgĕẓăt s-tizarăt dăɣ-umăɣ n-Tĕmmĕnĕya n-Măssinăɣ d-iqqud dăɣ-isălan-net, dihen, ad-hawăn-in-isiwĕḍ Măssinăɣ a-wa iyyăḍăn iket-net. 34Wăr kăwăn-ɣăllăbnet inĕzjam n-ašĕkka ed hak ašăl d-a-wa ăwwăy dăɣ-inĕzjam, hak ašăl-dăɣ, tĕgdăh-as tămăɣatert-net."

will be added

X\